മൂലമറ്റം: അശോക രക്ഷാനികേതനു സമീപം വീട്ടില് ഉപയോഗത്തിനിടെ പാചകവാതകം ചോര്ന്നത് പരിഭ്രാന്തി പരത്തി. ഇന്നലെ രാവിലെ ഒമ്പതോടെയാണ് സംഭവം. പൈകട സെബാസ്റ്റ്യന്റെ വീട്ടില് ലഭിച്ച പാചകവാതക സിലിണ്ടര് ഉപയോഗിക്കുന്നതിനിടെയാണ് ചോര്ച്ച ശ്രദ്ധയില്പ്പെട്ടത്. ഇതോടെ ഭീതിയിലായ വീട്ടുകാര് വിവരം അഗ്നിരക്ഷാ സേനയെ അറിയിച്ചു.
ഉടന്തന്നെ മൂലമറ്റത്തുനിന്നു സ്ഥലത്തെത്തിയ സേനാംഗങ്ങള് അതിവേഗം സിലിണ്ടര് അടുക്കളയില്നിന്നു പുറത്തെത്തിക്കുകയും തുടര്ന്ന് ചോര്ച്ച ഒഴിവാക്കുകയുമായിരുന്നു. കൂടുതല് പരിശോധനയില് റെഗുലേറ്ററിന്റെ തകരാറാണ് വാതകം ചോരാന് കാരണമെന്ന് കണ്ടെത്തി. ഗ്യാസ് ഏജന്സിയെ അറിയിച്ച് പുതിയ റെഗുലേറ്റര് ഘടിപ്പിക്കാന് സേനാംഗങ്ങള് നിര്ദേശം നല്കി. വാതകം ചോര്ന്ന സമയത്ത് വീട്ടുകാര് വൈദ്യുതി നിയന്ത്രണ സ്വിച്ചുകള് പ്രവര്ത്തിപ്പിക്കാത്തതിനാല് വന് അപകടം ഒഴിവായി.
Tags : Gas leak nattuvishesham local news