ആലുവ: ആലുവ ശിവരാത്രി മണപ്പുറത്ത് പോലീസ് എയ്ഡ് പോസ്റ്റ് സ്ഥിരമായി വേണമെന്ന് ആലുവ നഗരസഭ കൗൺസിൽ യോഗം ആവശ്യപ്പെട്ടു. മണപ്പുറത്ത് സാമൂഹ്യ വിരുദ്ധരുടെ ശല്യം വർധിച്ചതിനെ തുടർന്നാണ് ഭരണ- പ്രതിപക്ഷ ഭേദമെന്യേ ആവശ്യം ഉന്നയിച്ചത്. ചെയർപേഴ്സൺ സൈജി ജോളി അധ്യക്ഷയായി.
നഗരസഭയുടെ ഗ്രൗണ്ട് രണ്ട് കോടി രൂപ എംപി ഫണ്ട് ഉപയോഗിച്ച് ഫുട്ബോൾ ടർഫാക്കി മാറ്റാനുള്ള തീരുമാനം പുനഃപരിശോധിക്കണമെന്ന് പ്രതിപക്ഷം ആവശ്യപ്പെട്ടു. ടർഫിന്റെ പരിപാലനച്ചെലവ് നഗരസഭയുടെ തനത് വരുമാനത്തെയും വികസന പദ്ധതികളെയും പ്രതികൂലമായി ബാധിക്കുമെന്ന് പ്രതിപക്ഷം കൗൺസിൽ യോഗത്തിൽ ചൂണ്ടിക്കാട്ടി.
നഗരത്തിൽ ഉദ്യോഗസ്ഥ-രാഷ്ട്രീയ പിന്തുണയോടെ നടക്കുന്ന അനധികൃത നിർമാണങ്ങൾ, കൈയേറ്റങ്ങൾ, വഴിയോര കച്ചവടങ്ങൾ എന്നിവയ്ക്കെതിരെ നഗരസഭ നടപടി സ്വീകരിക്കാത്തതും വിമർശനത്തിനിടയായി. ഇത്തരം നിയമലംഘനങ്ങൾ അവസാനിപ്പിക്കാൻ കർശന നടപടി സ്വീകരിക്കണമെന്ന് കൗൺസിൽ തീരുമാനിച്ചു.
Tags : Local News Nattuvishesham Ernakulam