ആവശ്യക്കാരില്ലാതായതോടെ വിൽപന മുടങ്ങിയ നഴ്സറിയിലെ തൈകള്
പുല്പ്പള്ളി: കാലവര്ഷം ദുര്ബലമായതോടെ നടീല് വസ്തുക്കള് വില്പന നടത്താന് കഴിയാതെ നഴ്സറി ഉടമകള്. കുരുമുളക്, കാപ്പി, കമുക്, തെങ്ങ്, തുടങ്ങിയ തൈകള് വാങ്ങാന് ആളില്ലാത്ത അവസ്ഥയാണ്. കാലവര്ഷം ശുഷ്കമായതിനാല് കുരുമുളക്, കാപ്പി തൈകളാണ് ഏറെയും നഴ്സറികളില് കെട്ടിക്കിടക്കുന്നത്. മേയ്, ജൂണ് മാസങ്ങളിലാണ് കുരുമുളക് ഉള്പ്പെടെയുള്ള തൈകള് നടേണ്ട സമയം. ജൂലൈ, ഓഗസ്റ്റ് മാസങ്ങളിലെ ശക്തമായ മഴ കുരുമുളക് തൈകള്ക്ക് ദോഷകരമായതിനാല് തൈകള് ഇനി വാങ്ങുമോയെന്ന ആശങ്കയിലാണ് നഴ്സറി ഉടമകള്. ലക്ഷക്കണക്കിന് തൈകളാണ് നഴ്സറികളില് കെട്ടിക്കിടക്കുന്നത്.
ഗുണനിലവാരമുള്ള തൈകള് നല്കുക എന്ന ലക്ഷ്യത്തിന്റെ ഭാഗമായാണ് ഭൂരിഭാഗം നഴ്സറികളിലും കുരുമുളക് തൈകള് ഇറക്കുമതി ചെയ്യാതെ സ്വന്തമായി ഉത്പാദിപ്പിച്ച് വില്പന നടത്താന് തീരുമാനിച്ചത്. എന്നാല് മഴയുടെ കുറവ് മൂലം തൈകള് വാങ്ങാന് ആളെത്താതായതോടെ എന്തു ചെയ്യണമെന്ന് അറിയാത്ത അവസ്ഥയാണ്.
ബാങ്കുകളില് നിന്നും വായ്പയെടുത്തും സ്വകാര്യ പണമിടപാടുകളില്നിന്നുമടക്കം പണം കണ്ടെത്തിയാണ് തൈകള് ഉത്പാദിപ്പിച്ചത്. ഇനി ഈ തൈകള് എന്ന് വില്ക്കാന് കഴിയുമെന്ന ആശങ്കയിലാണ് നഴ്സറി ഉടമകള്.
Tags : Local News Nattuvishesham Wayanad