കോട്ടയം മെഡിക്കല് കോളജിന് സമീപത്തെ ജോര്ജ് ജോസഫ് പൊടിപാറയുടെ നാമധേയത്തില് സ്ഥാപിച്ച ട്രാഫിക് ഐലന്റ്.
ഏറ്റുമാനൂർ: ആർപ്പൂക്കരയിൽ മെഡിക്കൽ കോളജ് സ്ഥാപിക്കാൻ മുൻകൈയെടുത്ത മുൻ എംഎൽഎ ജോർജ് ജോസഫ് പൊടിപാറയുടെ സ്മരണ നിലനിർത്താൻ മെഡിക്കൽ കോളജ് ജംഗ്ഷനിൽ നിർമിച്ച ജോർജ് ജോസഫ് പൊടിപാറ റൗണ്ടിന്റെ അനാവരണവും അനുസ്മരണ സമ്മേളനവും ഇന്നു നടക്കും.
ആദ്യ രണ്ടു നിയമസഭകളിൽ ഉൾപ്പെടെ മൂന്നു തവണ എംഎൽഎ ആയിരുന്ന പൊടിപാറയുടെ പേരിൽ ഒട്ടേറെ വികസന പ്രവർത്തനങ്ങൾ രേഖപ്പെടുത്തപ്പെട്ടിട്ടുണ്ടെങ്കിലും കോട്ടയം മെഡിക്കൽ കോളജ് ആർപ്പൂക്കരയിൽ സ്ഥാപിച്ചതാണ് അദ്ദേഹത്തിന്റെ പ്രധാന നേട്ടം.
ജോർജ് ജോസഫ് പൊടിപാറ എന്ന ജനപ്രതിനിധിയുടെ ഇച്ഛാശക്തിയുടെ അടയാളമായി പ്രൗഢിയോടെ കോട്ടയം മെഡിക്കൽ കോളജ് നിലകൊള്ളുമ്പോഴും അദ്ദേഹത്തിന് മെഡിക്കൽ കോളജിൽ ഒരു സ്മാരകമുണ്ടായില്ല. മെഡിക്കൽ കോളജ് - ഗാന്ധിനഗർ റോഡിന്റെ വികസനത്തിനൊപ്പം മെഡിക്കൽ കോളജ് ജംഗ്ഷനും വികസിപ്പിച്ചപ്പോഴാണ് ജംഗ്ഷന് പൊടിപാറയുടെ പേരു നൽകണമെന്ന നിർദേശം ഉയർന്നത്. പൊടിപാറയെ സ്നേഹിക്കുന്നവരുടെ കൂട്ടായ്മയായ ലവേഴ്സ് ഓഫ് പൊടിപാറ ഈ ആവശ്യവുമായി കോട്ടയം നഗരസഭയെ സമീപിക്കുകയും നഗരസഭ ജംഗ്ഷന് ജോർജ് ജോസഫ് പൊടിപാറ റൗണ്ട് എന്ന് നാമകരണം ചെയ്യുകയുമായിരുന്നു. ലവേഴ്സ് ഓഫ് പൊടിപാറയുടെ നേതൃത്വത്തിലാണ് റൗണ്ടിന്റെ നവീകരണവും സൗന്ദര്യവത്കരണവും നടത്തിയത്.
ഇന്ന് ഉച്ചകഴിഞ്ഞ് മൂന്നിന് ആഭ്യന്തരമന്ത്രി രമേശ് ചെന്നിത്തല, ജോർജ് ജോസഫ് പൊടിപാറ റൗണ്ടിന്റെ അനാവരണം നിർവഹിക്കും. തുടർന്ന് നിത്യ ഓഡിറ്റോറിയത്തിൽ നടക്കുന്ന അനുസ്മരണ സമ്മേളനം നിയമസഭാ സ്പീക്കർ തിരുവഞ്ചൂർ രാധാകൃഷ്ണൻ ഉദ്ഘാടനം ചെയ്യും. നാട്ടകം സുരേഷ് എംഎൽഎ അധ്യക്ഷത വഹിക്കും.
കോട്ടയം നഗരസഭാ ചെയർമാൻ എം.പി. സന്തോഷ്കുമാർ, മുൻ എംഎൽഎ കെ. സുരേഷ് കുറുപ്പ്, പഞ്ചായത്ത് പ്രസിഡൻ്റുമാരായ ആനന്ദ് പഞ്ഞിക്കാരൻ, ഒ.എ. സജി, ജില്ലാ പഞ്ചായത്ത് മെംബർ ജിം അലക്സ്, മെഡിക്കൽ കോളജ് പ്രിൻസിപ്പൽ ഡോ. വർഗീസ് പുന്നൂസ്, ലവേഴ്സ് ഓഫ് പൊടിപാറ കൺവീനർ സിറിൾ ജി. പൊടിപാറ, കർമസമിതി അംഗം ജോസ് ഇടുക്കുതറ എന്നിവർ പ്രസംഗിക്കും.
Tags : Local News Nattuvishesham Kottayam