പാലാ: വോട്ടെണ്ണലിനോടനുബന്ധിച്ച് പോലീസ് നിരീക്ഷണം ശക്തമാക്കി. പാലാ, കടുത്തുരുത്തി നിയോജകമണ്ഡലത്തിലെ വോട്ടെണ്ണല് പാലാ കാര്മല് പബ്ലിക് സ്കൂളിലും പൂഞ്ഞാര് നിയോജകമണ്ഡലത്തിലേത് അരുവിത്തുറ സെന്റ് ജോര്ജ് കോളജിലും നടക്കും. വോട്ടെണ്ണലിനോടനുബന്ധിച്ച് ഗതാഗത നിയന്ത്രണങ്ങള് ഏര്പ്പെടുത്തി. രാവിലെ ആറു മുതല് നിയന്ത്രണങ്ങള് പ്രാബല്യത്തില് വരും.
വോട്ടെണ്ണല് കേന്ദ്രമായ കാര്മല് പബ്ലിക് സ്കൂളിനും പരിസര പ്രദേശങ്ങള്ക്കും 30 മീറ്റര് പരിധിയില് അനാവശ്യ വാഹനങ്ങള് പ്രവേശിക്കാന് അനുവദിക്കില്ല. സുരക്ഷയും തിരക്ക് നിയന്ത്രണവും ഉറപ്പാക്കുന്നതിനാണ് ഈ നടപടികള്.
പാര്ക്കിംഗ് ക്രമീകരണം: യുഡിഎഫ്, എല്ഡിഎഫ്, എന്ഡിഎ പ്രവര്ത്തകര്ക്ക് പ്രത്യേകം പാര്ക്കിംഗ് സ്ഥലങ്ങള് അനുവദിച്ചിട്ടുണ്ട്. എല്ഡിഎഫ്, യുഡിഫ് പ്രവര്ത്തകര്ക്ക് പാലാ ബൈപാസ് റോഡിന്റെ തെക്കുഭാഗത്ത് റോഡിന്റെ മാര്ജിനില് നിന്ന് 50 മീറ്റര് പിന്നിലായി വാഹനങ്ങള് പാര്ക്ക് ചെയ്യാം. എന്ഡിഎ പ്രവര്ത്തകര്ക്ക് പാലാ ബൈപാസ് റോഡിന്റെ വടക്കുഭാഗത്തുള്ള കാര്മല് പബ്ലിക് സ്കൂളിന്റെ പാര്ക്കിംഗ് ഗ്രൗണ്ടിന്റെ മുന്വശത്താണ് സൗകര്യം ഒരുക്കിയിരിക്കുന്നത്.
ട്രാഫിക് നിയന്ത്രണം:
ആര്വി ജംഗ്ഷന് മുതല് സിവില് സ്റ്റേഷന് വരെയുള്ള ഭാഗത്ത് ഗതാഗത നിയന്ത്രണം ഏര്പ്പെടുത്തും. ഈ ഭാഗത്ത് രാവിലെ ആറു മുതല് കൗണ്ടിംഗ് അവസാനിക്കുന്നത് വരെ മറ്റു വാഹനങ്ങള്ക്ക് പ്രവേശനം അനുവദിക്കുന്നതല്ല. രാവിലെ ആറു മുതല് ആവശ്യമായിടങ്ങളില് വഴിതിരിവുകളും നടപ്പാക്കും.
അരുവിത്തുറ സെന്റ് ജോര്ജ് കോളജ് പരിസരത്ത് വോട്ടെണ്ണല് കേന്ദ്രത്തിന് സമീപം അനാവശ്യമായി വാഹനങ്ങള് പ്രവേശിക്കുന്നത് നിയന്ത്രിക്കും. വിവിധ രാഷ്ട്രീയ മുന്നണികളുടെ പ്രവര്ത്തകര്ക്ക് പ്രത്യേകം പാര്ക്കിംഗ് സൗകര്യങ്ങളും ക്രമീകരിച്ചിട്ടുണ്ട്.
പാര്ക്കിംഗ് ക്രമീകരണം: എല്ഡിഎഫ് പ്രവര്ത്തകര്ക്ക് സെന്റ് ജോര്ജ് കോളജിന്റെ മെയിന് ഗേറ്റിന് സമീപമുള്ള പഴയ കോടതി റോഡില് നിന്ന് 50 മീറ്റര് തെക്ക് മാറിയുള്ള സ്ഥലത്ത് വാഹനങ്ങള്ക്ക് പാര്ക്ക് ചെയ്യാം. യുഡിഎഫ് പ്രവര്ത്തകര്ക്ക് കോളജിന്റെ മെയിന് ഗേറ്റിന്റെ പടിഞ്ഞാറ് ഭാഗത്തുള്ള പഴയ കോടതി റോഡില് വാഹന പാര്ക്കിംഗ് അനുവദനീയമാണ്. എന്ഡിഎ പ്രവര്ത്തകര്ക്ക് കോളജിന്റെ മെയിന് ഗേറ്റിന് സമീപമുള്ള പഴയ കോടതി റോഡിന് തെക്ക് പടിഞ്ഞാറുള്ള സ്പോര്ട്സ് ഹോസ്റ്റലിന്റെ മുന്വശത്ത് വാഹനങ്ങള് പാര്ക്ക് ചെയ്യാം.
ട്രാഫിക് നിയന്ത്രണം
ഇന്ന് രാവിലെ ആറു മുതല് മേഖലയില് ആവശ്യമായിടങ്ങളില് വഴിതിരിവുകള് ഏര്പ്പെടുത്തുകയും കൗണ്ടിംഗ് അവസാനിക്കുന്നത് വരെ അരുവിത്തുറ പള്ളിയുടെ മുന്ഭാഗം റോഡ് മുതല് പാലാ- ഈരാറ്റുപേട്ട റോഡിലെ അരുവിത്തുറ കോളജ് ജംഗ്ഷന് വരെയുള്ള ഒരു കിലോമീറ്റര് ദൂരം ബ്ലോക്ക് ചെയ്യുന്നതും അനധികൃത പാര്ക്കിഗുകള് ഒഴിവാക്കുന്നതുമാണ്.