22

റിയാദ്: ഡ്രോൺ ആക്രമണത്തെത്തുടർന്ന് നിർത്തിവച്ച സൗദിയിലെ ഈസ്റ്റ്- വെസ്റ്റ് പൈപ്പിന്‍റെ പ്രവർത്തനം പുനരാരംഭിച്ചതായി റിപ്പോർട്ട്. പൈപ്പിലൂടെ എത്തിക്കുന്ന എണ്ണ ചെങ്കടൽത്തീരത്തെ യാൻബു തുറമുഖം വഴി കയറ്റുമതി ചെയ്യാൻ തുടങ്ങിയെന്നാണ് റിപ്പോർട്ട്.

ഇറാൻ ഹോർമുസ് കടലിടുക്ക് അടച്ചോടെ ചെങ്കടൽ വഴി എണ്ണ കയറ്റുമതി ചെയ്യാൻ സൗദി ആശ്രയിക്കുന്ന പൈപ്പാണിത്. സെപ്റ്റംബർ 13നായിരുന്നു പൈപ്പിനെ ലക്ഷ്യമിട്ട ആക്രമണം.

സൗദി കയറ്റുമതി പുനരാരംഭിക്കുന്നതു സംബന്ധിച്ച വാർത്തയെത്തുടർന്ന് അന്താരാഷ്‌ട്ര വിപണിയിൽ എണ്ണവില താഴ്ന്നു.

പ്രതിദിനം 40 ലക്ഷം വീപ്പ എണ്ണയാണ് പൈപ്പ് വഴി ചെങ്കടൽത്തീരത്ത് എത്തിച്ചിരുന്നത്. പ്രവർത്തനം പുനരാരംഭിച്ചെങ്കിലും ഈ ശേഷി വീണ്ടെടുക്കാനായിട്ടില്ല. ഇതിന് ആഴ്ചകൾ വേണ്ടിവരുമെന്നാണ് റിപ്പോർട്ട്.

യെമനിലെ ഹൂതികൾ ചെങ്കടൽത്തീരത്ത് മിന്നൽ മുന്നേറ്റം നടത്തുന്നതിനിടെയായിരുന്നു പൈപ്പ് ലൈൻ ആക്രമിക്കപ്പെട്ടത്. ഇറാക്കിൽനിന്നാണ് ഡ്രോണുകൾ വന്നത്.

Tags : Saudi East-West oil pipeline Iran Yemen Gulf War