29

വാഷിംഗ്ടൺ ഡിസി:  മുഖ്യശത്രുവായ ചൈനയ്ക്ക് ആയുധം വിൽക്കാൻ അമേരിക്ക തയാറാണെന്ന് പ്രസിഡന്‍റ് ട്രംപ്. കഴിഞ്ഞയാഴ്ച വൈറ്റ് ഹൗസ് സന്ദർശിച്ച ചൈനീസ് പ്രസിഡന്‍റ് ഷി ചിൻപിംഗിനോടാണ് ട്രംപ് ഇക്കാര്യം പറഞ്ഞത്.

ചൈനയിലെ യുഎസ് അംബാസഡർ ഡേവിഡ് പെർഡ്യു ഒരഭിമുഖത്തിൽ ഇക്കാര്യം വെളിപ്പെടുത്തുകയായിരുന്നു. തായ്‌വാനെക്കുറിച്ചുള്ള സംസാരത്തിനിടെയാണ് ചൈനയ്ക്കും ആയുധം നല്കാൻ തയാറാണെന്ന് ട്രംപ് പറഞ്ഞത്.

അമേരിക്ക ലോകത്തെല്ലായിടത്തും ആയുധം വിൽക്കുന്നുണ്ടെന്നും ഏതെങ്കിലുമൊരു ഘട്ടത്തിൽ അമേരിക്കൻ ആയുധം വാങ്ങാൻ ചൈനയ്ക്കു താത്പര്യമുണ്ടോയെന്നും ഷിയോട് ട്രംപ് ചോദിച്ചുവെന്നാണ് അംബാസഡർ പെർഡ്യൂ പറഞ്ഞത്. തായ്‌വാൻ വിഷയത്തിൽ അമേരിക്കൻ നിലപാടിൽ മാറ്റമില്ലെന്നും പെർഡ്യൂ കൂട്ടിച്ചേർത്തു.

ജനാധിപത്യഭരണകൂടം നിലവിലുള്ള തായ്‌വാനെ വിഘടിത പ്രവിശ്യയായിട്ടാണ് ചൈന പരിഗണിക്കുന്നത്. ബലം പ്രയോഗിച്ചും തായ്‌വാനെ പിടിച്ചെടുക്കുമെന്നുള്ളത് ചൈനയുടെ ഔദ്യോഗിക നയമാണ്. അതേസമയം തായ്‌വാന്‍റെ സംരക്ഷണത്തിന് ആയുധം നല്കാൻ നിർദേശിക്കുന്ന നിയമം അമേരിക്കൻ പാർലമെന്‍റ് പാസാക്കിയിട്ടുണ്ട്. പ്രസിഡന്‍റ് ട്രംപിന്‍റെ കാലത്താണ് അമേരിക്ക തായ്‌വാന് ഏറ്റവും കൂടുതൽ ആയുധം വിറ്റിട്ടുള്ളത്.

അമേരിക്കയുമായുള്ള ബന്ധത്തിലെ ഏറ്റവും വലിയ കല്ലുകടി തായ്‌വാനാണെന്ന് ചൈന കരുതുന്നു. തായ്‌വാൻ വിഷത്തിൽ ഇടപെടുന്പോൾ ജാഗ്രത കാട്ടണമെന്ന് ഷി വൈറ്റ്ഹൗസ് സന്ദർശനത്തിനിടെ ട്രംപിനോട് പറഞ്ഞുവെന്നാണ് റിപ്പോർട്ട്.

Tags : Trump China Xi Jinping America White House