കൊച്ചി: എറണാകുളം കലൂരില്‍ വന്‍ കഞ്ചാവ് വേട്ട. 30 കിലോയില്‍ അധികം കഞ്ചാവുമായി പശ്ചിമബംഗാള്‍ സ്വദേശി പിടിയിലായി. മൂര്‍ഷിദാബാദ് സ്വദേശി അബ്ദുള്‍ ഹായ് മൊല്ലയാണ് പിടിയിലായത്. ഇയാളില്‍ നിന്നും പിടിച്ചെടുത്ത കഞ്ചാവിന് വിപണിയില്‍ 50 ലക്ഷം രൂപ വില വരുമെന്നാണ് പൊലിസ് അറിയിക്കുന്നത്.

ഒഡീഷയില്‍ നിന്നും വന്‍തോതില്‍ കഞ്ചാവ് കേരളത്തിലെത്തിച്ച് മലയാളികള്‍ അടക്കമുള്ള സംസ്ഥാനത്തെ ചെറുകിട കഞ്ചാവ് വില്‍പ്പന റാക്കറ്റിന് നല്‍കിയിരുന്ന സംഘത്തിലെ മുഖ്യകണ്ണിയാണ് പ്രതി. ഇയാളില്‍ നിന്നും കഞ്ചാവ് വാങ്ങുന്ന മലയാളികളിലേക്കും പൊലിസ് അന്വേഷണം വ്യാപിപ്പിച്ചിട്ടുണ്ട്.

നാളുകളായി പൊലിസ് നിരീക്ഷണത്തിലായിരുന്നു പ്രതി. സിറ്റി പൊലിസ് കമ്മിഷണര്‍ക്ക് ലഭിച്ച രഹസ്യവിവരത്തെ തുടര്‍ന്നാണ് പ്രതിയെ റെയില്‍വേ സ്റ്റേഷന് പരിസരത്ത് നിന്നും പിടികൂടിയത്. നാര്‍ക്കോട്ടിക് എസിപി അനന്തലാലിന്‍റെ നേതൃത്വത്തിലുള്ള സംഘമാണ് ഓപ്പറേഷന്‍ തൂഫാന്‍റെ ഭാഗമായി ഇയാളെ പിടികൂടിയത്.

Tags : Ganja Seizure Kochi WestBengal arrest