തളിപ്പറമ്പ്: തളിപ്പറമ്പിൽ നടന്ന തദ്ദേശ ദിനാഘോഷത്തിന്റെ സമാപന സമ്മേളനത്തിനിടെ മൈക്ക് തകരാറിലായപ്പോൾ മുഖ്യമന്ത്രി പിണറായി വിജയൻ നടത്തിയ സരസമായ പ്രതികരണം വാർത്തയായിരിക്കുകയാണ്.
മുഖ്യമന്ത്രി പ്രസംഗം തുടങ്ങിയപ്പോൾ തന്നെ മൈക്കിൽ നിന്ന് വലിയ ശബ്ദം ഉയരാൻ തുടങ്ങി. ഇതോടെ അദ്ദേഹം പ്രസംഗം നിർത്തി. വീണ്ടും തുടങ്ങിയപ്പോഴും തകരാർ തുടർന്നപ്പോഴാണ് അദ്ദേഹം പ്രതികരിച്ചത്.
"സാധാരണ ഞാൻ ഉണ്ടാകുമ്പോൾ മൈക്ക് കളിക്കുന്ന കളി"യാണെന്നും ഇത് നേരത്തെ തന്നെ തുടങ്ങിയതാണെന്നും മുഖ്യമന്ത്രി ചിരിച്ചുകൊണ്ട് പറഞ്ഞു. മുൻപ് സമാനമായ സാഹചര്യങ്ങളിൽ അദ്ദേഹം പ്രകോപിതനായിട്ടുണ്ടെങ്കിലും ഇത്തവണ വളരെ ശാന്തനായാണ് പ്രതികരിച്ചത്.
മന്ത്രി എം.ബി. രാജേഷ് അധ്യക്ഷത വഹിച്ച ചടങ്ങിൽ സ്വരാജ് ട്രോഫി ഉൾപ്പെടെയുള്ള വിവിധ പുരസ്കാരങ്ങൾ മുഖ്യമന്ത്രി വിതരണം ചെയ്തു. മൈക്ക് തകരാറിനെ മുഖ്യമന്ത്രി തമാശയോടെ നേരിട്ടത് വേദിയിലുണ്ടായിരുന്നവരിലും കൗതുകമുണർത്തി.
Tags : Microphone Pinarayi Vijayan