21

വീടിന്‍റെയും പരിസരത്തിന്‍റെയും സുരക്ഷ ഉറപ്പാക്കാൻ സിസിടിവി സ്ഥാപിക്കുകയും ആ സുരക്ഷാ കാമറകളുടെ സംരക്ഷണത്തിനായി, ചരടു കെട്ടുകയും ചെയ്യുന്ന വിചിത്ര മനുഷ്യരുള്ള നാടാണിത്!
അന്ധവിശ്വാസങ്ങളുടെ ഉറവിടം തേടുകയല്ല, മറിച്ചു നൂറ്റാണ്ടുകളായി മനുഷ്യർ തങ്ങളുടെ സ്വത്തുക്കൾ ദുഷ്ടശക്തികളിൽനിന്നു സംരക്ഷിക്കാൻ മന്ത്രവാദവും ആഭിചാരക്രിയകളും ഉപയോഗിക്കുന്നുണ്ട്. ശാസ്ത്രം പുരോഗമിച്ചിട്ടും ഇത്തരം വിശ്വാസങ്ങൾക്ക് ഒട്ടും കുറവില്ല. ച​രി​ത്ര​കാ​ര​ന്മാ​രും പു​രാ​വ​സ്തു ഗ​വേ​ഷ​ക​രും ന​ട​ത്തി​യ പ​ഠ​ന​ങ്ങ​ളിൽ, മ​നു​ഷ്യ​ർ ത​ങ്ങ​ളു​ടെ താ​മ​സ​സ്ഥ​ല​ങ്ങ​ളി​ൽ സു​ര​ക്ഷ​യും സ​മാ​ധാ​ന​വും ഉറപ്പാക്കുമെന്നു വിശ്വസിക്കുന്ന ചില മാ​ന്ത്രി​കരീ​തി​ക​ളെ വിശദമാക്കുന്നു. അതേസമയം, ഇതു സുരക്ഷ ഉറപ്പുവരുത്തുമോ എന്നതിനു തെളിവുകളൊന്നുമില്ല!

ലണ്ടൻ ഇം​പീ​രി​യ​ൽ കോ​ള​ജിലെ ച​രി​ത്ര​കാ​ര​നാ​യ തോ​മ​സ് വാ​​ട്ടേഴ്സി​ന്‍റെ 'മാ​ജി​ക്: ഡീ​കോ​ഡിം​ഗ് ദി ​വി​ഷ്വ​ൽ ക​ൾ​ച്ച​ർ ഓ​ഫ് സ്പെ​ൽ​സ്, ഇ​ല്യൂ​ഷ​ൻ​സ് ആ​ൻ​ഡ് സൈ​ക്കി​ക് പ​വേ​ഴ്സ്' എ​ന്ന പു​സ്ത​ക​ത്തെ ആ​സ്പ​ദ​മാ​ക്കി​യുള്ളതാണു ​വി​വ​ര​ങ്ങ​ൾ. ച​രി​ത്രാ​തീ​ത കാ​ലം മു​ത​ൽ ആ​ളു​ക​ൾ ത​ങ്ങ​ളു​ടെ വീ​ടു​ക​ളി​ൽ മാ​ന്ത്രി​കപ്ര​തി​രോ​ധ​ങ്ങ​ൾ തീ​ർ​ത്തി​രു​ന്നതായി പഠനഗ്രന്ഥത്തിൽ വിശദമാക്കുന്നു. 

പ്ര​തി​രോ​ധ സ​സ്യ​ങ്ങൾ
വീ​ടു​ക​ളെ സ്വാ​ഭാ​വി​ക​വും അ​ദ്ഭു​ത​ക​ര​വു​മാ​യ അ​പ​ക​ട​ങ്ങ​ളി​ൽനി​ന്നു സം​ര​ക്ഷി​ക്കാ​ൻ പ്ര​ത്യേ​ക​ത​രം മരങ്ങളും ചെ​ടി​ക​ളും ന​ട്ടു​വ​ള​ർ​ത്തു​ന്ന രീ​തി പ​ണ്ടു​മു​ത​ലേയുണ്ടായിരുന്നു. പ​തി​നേ​ഴാം നൂ​റ്റാ​ണ്ടി​ലെ സ​സ്യ​ശാ​സ്ത്ര​ജ്ഞ​നാ​യ നി​ക്കോ​ളാ​സ് കു​ൽ​പെ​പ്പ​റിന്‍റെ കു​റി​പ്പു​ക​ൾ അ​നു​സ​രി​ച്ച്, തോ​ട്ട​ത്തി​ൽ ബേ മരം ന​ട്ടു​വ​ള​ർ​ത്തു​ന്ന​തു വീ​ടി​നെ ആ​ഭി​ചാ​ര​ക്രി​യ​ക​ളി​ൽനി​ന്നും ഇ​ടി​മി​ന്ന​ലി​ൽനി​ന്നും സം​ര​ക്ഷി​ക്കു​മെ​ന്നാ​ണു വി​ശ്വ​സി​ച്ചി​രു​ന്ന​ത്. കൂ​ടാ​തെ, റോ​സ്മേ​രി, ചി​ല പ്ര​ത്യേ​ക​യി​നം മു​ള​കു​ക​ൾ എ​ന്നി​വ വാ​തി​ലു​ക​ളി​ലും പൂ​ന്തോ​ട്ട​ങ്ങ​ളി​ലും സ്ഥാ​പി​ക്കു​ന്ന​ത് ദു​ർ​ഭൂ​ത​ങ്ങ​ളെ​യും രാ​ത്രി​കാ​ല​ങ്ങ​ളി​ൽ എ​ത്തു​ന്ന ദു​ഷ്ട​ശ​ക്തി​ക​ളെ​യും അ​ക​റ്റി​നി​ർ​ത്താ​ൻ സ​ഹാ​യി​ക്കു​മെ​ന്നും ആ​ളു​ക​ൾ വി​ശ്വ​സി​ച്ചി​രു​ന്നു.

ര​ഹ​സ്യചി​ഹ്ന​ങ്ങ​ളും അ​ട​യാ​ള​ങ്ങ​ളും
വീ​ടിന്‍റെ ഭി​ത്തി​ക​ളി​ലും വാ​തി​ലു​ക​ളി​ലും മ​ര​ത്ത​ടി​ക​ളി​ലും മാ​ന്ത്രി​കചി​ഹ്ന​ങ്ങ​ൾ കൊ​ത്തി​വയ്ക്കുന്ന രീ​തി യൂ​റോ​പ്പി​ൽ വ്യാ​പ​ക​മാ​യി​രു​ന്നു. അ​ഞ്ചും ആ​റും കോ​ണു​ക​ളു​ള്ള ന​ക്ഷ​ത്ര ചി​ഹ്ന​ങ്ങ​ൾ, പ​ര​സ്പ​രം പി​ണ​ഞ്ഞു​കി​ട​ക്കു​ന്ന അ​ക്ഷ​ര​ങ്ങ​ൾ, ചക്രമുദ്രകൾ എ​ന്നി​വ ഇ​തി​നാ​യി ഉ​പ​യോ​ഗി​ക്കുന്നു. ശ​ത്രു​ക്ക​ളെ​യും ദു​ർ​മ​ന്ത്ര​വാ​ദ​ത്തെ​യും പ്ര​തി​രോ​ധി​ക്കാ​നും തീ​പി​ടി​ത്തം പോ​ലെ​യു​ള്ള അ​പ​ക​ട​ങ്ങ​ൾ ഒ​ഴി​വാ​ക്കാ​നു​മാ​ണ് ഇ​ത്ത​രം ര​ഹ​സ്യചി​ഹ്ന​ങ്ങ​ൾ പ്ര​ധാ​ന​മാ​യും വീ​ടു​ക​ളിൽ കൊത്തി​വ​ച്ചി​രു​ന്ന​തത്രെ!

വാ​സ്തു​വി​ദ്യ
കെ​ട്ടി​ട​ങ്ങ​ൾ നി​ർമി​ക്കു​മ്പോ​ൾ, മാ​ന്ത്രി​ക സം​ര​ക്ഷ​ണ സം​വി​ധാ​ന​ങ്ങ​ൾ ഉ​ൾ​പ്പെ​ടു​ത്തു​ന്ന രീ​തി പ​ല സം​സ്കാ​ര​ങ്ങ​ളി​ലും ഉ​ണ്ടാ​യി​രു​ന്നു. കി​ഴ​ക്ക​ൻ ഏ​ഷ്യ​യി​ൽ കെ​ട്ടി​ട​ങ്ങ​ളു​ടെ മേ​ൽ​ക്കൂ​ര​ക​ളി​ൽ രാ​ക്ഷ​സ രൂ​പ​ങ്ങ​ളു​ള്ള ഓ​ടു​ക​ളും വി​ഗ്ര​ഹ​ങ്ങ​ളും വയ്ക്കുന്നതു കവർച്ചക്കാരെയും ദു​രാ​ത്മാ​ക്ക​ളെ​യും തു​ര​ത്താ​ൻ സ​ഹാ​യി​ക്കു​മെ​ന്നാ​ണു വി​ശ്വ​സി​ച്ചി​രു​ന്ന​ത്. സ്പെ​യി​നി​ലെ ചി​ല പ്ര​ദേ​ശ​ങ്ങ​ളി​ൽ പു​ക​ക്കു​ഴ​ലു​ക​ൾ​ക്കു മു​ക​ളി​ൽ സ​ങ്കീ​ർ​ണ​മാ​യ ജ്യാ​മി​തീ​യ രൂ​പ​ങ്ങ​ൾ നി​ർ​മി​ച്ചി​രു​ന്നു. ഇ​തു ദു​ഷ്ടശക്തികളെ ആ​ശ​യ​ക്കു​ഴ​പ്പ​ത്തി​ലാ​ക്കു​മെ​ന്നാ​യി​രു​ന്നു ക​രു​ത​പ്പെ​ട്ടി​രു​ന്ന​ത്.

വി​ച്ച് ബോ​ട്ടി​ലു​ക​ൾ
പ​തി​നേ​ഴാം നൂ​റ്റാ​ണ്ടു മു​ത​ൽ ഇ​രു​പ​താം നൂ​റ്റാ​ണ്ടി​ന്‍റെ തു​ട​ക്കം വ​രെ യൂ​റോ​പ്പി​ൽ പ്ര​ചാ​ര​ത്തി​ലു​ണ്ടാ​യി​രു​ന്നതാണ് വി​ച്ച് ബോ​ട്ടി​ലു​ക​ളു​ടെ ഉ​പ​യോ​ഗം. ആ​ഭി​ചാ​രദോ​ഷ​ങ്ങ​ൾ നീ​ക്കം ചെ​യ്യാ​നാ​ണ് ഇ​വ ഉ​പ​യോ​ഗി​ച്ചി​രു​ന്ന​ത്. ഒ​രു ചെ​റി​യ കു​പ്പി​യി​ൽ ആ​ഭി​ചാ​ര​ദോ​ഷം ബാ​ധി​ച്ച വ്യ​ക്തി​യു​ടെ ന​ഖ​ങ്ങ​ൾ, മു​ടി, മൂ​ത്രം എ​ന്നി​വ​യോ​ടൊ​പ്പം വ​ള​ഞ്ഞ ആ​ണി, തു​ണി കൊ​ണ്ടു​ള്ള ഹൃ​ദ​യ​രൂ​പം എ​ന്നി​വ നി​റ​ച്ചാ​ണ് ഇ​വ തയാ​റാ​ക്കി​യി​രു​ന്ന​ത്. ഈ ​കു​പ്പി​ക​ൾ വീ​ടി​ന്‍റെ ത​റ​യിൽ കു​ഴി​ച്ചി​ടും. ഇ​തുവ​ഴി ദു​ർമ​ന്ത്ര​വാ​ദം ചെ​യ്ത വ്യ​ക്തി​ക്ക് ആ​ഘാ​ത​മേ​ൽ​പ്പി​ക്കാ​നും അ​വ​രു​ടെ ശ​ക്തി ഇ​ല്ലാ​താ​ക്കാ​നും ക​ഴി​യു​മെ​ന്നാ​യി​രു​ന്നു വി​ശ്വാ​സം.

പ്ര​ത്യേ​ക ത​രം ക​ല്ലു​ക​ൾ
കി​ഴ​ക്ക​ൻ ഏ​ഷ്യ​ൻ രാ​ജ്യ​ങ്ങ​ളി​ൽ 'ഷി​ഗാ​ൻ​ഡാംഗ്‌' എ​ന്ന​റി​യ​പ്പെ​ടു​ന്ന ക​ല്ലു​ക​ൾ വീ​ടു​ക​ൾ​ക്കു സം​ര​ക്ഷ​ണം ന​ൽ​കാ​ൻ ഉ​പ​യോ​ഗി​ച്ചി​രു​ന്നു. ചൈ​ന​യി​ലെ താ​യ് പ​ർ​വ​ത​ത്തി​ന്‍റെ പ്ര​തീ​ക​മാ​യി ക​രു​ത​പ്പെ​ടു​ന്ന ​ക​ല്ലു​ക​ൾ​ക്കു ദു​ഷ്ട​ശ​ക്തി​ക​ളെ അ​ടി​ച്ച​മ​ർ​ത്താ​ൻ ശേ​ഷി​യു​ണ്ടെ​ന്നാണു വി​ശ്വാസം. അ​തു​പോ​ലെ യു​കെ​യി​ൽ പ്രകൃതിദത്തമായി ദ്വാ​ര​ങ്ങ​ൾ വീ​ണ ക​ല്ലു​ക​ൾ കി​ട​പ്പു​മു​റി​ക​ളി​ലും വീ​ടി​നു മു​ന്നി​ലും തൂ​ക്കി​യി​ടു​ന്ന​തു ദുഃ​സ്വ​പ്ന​ങ്ങ​ളെ​യും മാ​ന്ത്രി​കദോ​ഷ​ങ്ങ​ളെ​യും അ​ക​റ്റു​മെ​ന്ന ധാ​ര​ണ​യും ഉ​ണ്ടാ​യി​രു​ന്നു.

ഇ​ത്ത​രം മാ​ന്ത്രി​ക പ്ര​തി​രോ​ധരീ​തി​ക​ൾ കേ​വ​ലം അ​ന്ധ​വി​ശ്വാ​സം എ​ന്ന​തി​ലു​പ​രി, മ​നു​ഷ്യ​രിലു​ണ്ടാകുന്ന ഭ​യവും ആ​ശ​ങ്ക​യും ല​ഘൂ​ക​രി​ക്കാ​നും മാ​ന​സി​ക സു​ര​ക്ഷി​ത​ത്വം ന​ൽ​കാ​നും സ​ഹാ​യി​ച്ചി​രു​ന്ന മാ​ർ​ഗ​ങ്ങ​ളാ​യി​രു​ന്നു​വെ​ന്നു ച​രി​ത്ര​കാ​ര​ന്മാ​ർ വി​ല​യി​രു​ത്തു​ന്നു. അതായത്, കല്ലു കെട്ടിത്തൂക്കിയിട്ടാലോ, തകിടു കുഴിച്ചിട്ടാലോ കള്ളന്മാരെ പിടികൂടാനാകില്ല, കള്ളന്മാരെ കുടുക്കാൻ ശാസ്ത്രീയ സുരക്ഷാ സംവിധാനങ്ങൾ തേടണമെന്നു സാരം!

Tags : InternationalNews WitchesBottle Hexafoils Baytree Shigandang MagicalPractices BlackMagic