19

കൊച്ചി: ഇന്ത്യന്‍ സമുദ്രമേഖലയിലെ രാജ്യങ്ങളുമായുള്ള സമുദ്ര പങ്കാളിത്തം ശക്തമാക്കാന്‍ നാവികസേന ആവിഷ്‌കരിച്ച 'ഇന്ത്യന്‍ ഓഷ്യന്‍ ഷിപ് (ഐഒഎസ്) സാഗര്‍' പദ്ധതിയുടെ രണ്ടാം പതിപ്പിന് ഇന്നലെ കൊച്ചിയില്‍ തുടക്കമായി. ഇതിന്‍റെ ഭാഗമായി ഇന്ത്യന്‍ നേവിയുടെ ശക്തിയും ഏകോപനവും ധൈര്യവും പ്രകടിപ്പിക്കുന്ന അഭ്യാസ പ്രകടനങ്ങളില്‍ ഒന്നായ ജാക്ക് സ്റ്റേ നാവികര്‍ കാഴ്ചവച്ചു.

അറബിക്കടലില്‍ 50 നോട്ടിക്കല്‍ മൈല്‍ അകലെ നടന്ന അഭ്യാസ പ്രകടനങ്ങളില്‍ നേവിയുടെ പടക്കപ്പലുകളായ ഐഎന്‍എസ് സുനയനയും ഐഎന്‍എസ് തീറും പങ്കാളികളായി. സഞ്ചാര മാര്‍ഗം തന്നെ ഒരു കപ്പലില്‍നിന്ന് മറ്റൊരു കപ്പലിലേക്കു മനുഷ്യരെയും സാധനങ്ങളെയും എണ്ണയുമൊക്കെ കൈമാറ്റം ചെയ്യുന്ന തികച്ചും അപകട സാധ്യതയുള്ള ഒന്നാണ് ജാക്ക് സ്റ്റേ.

കൊച്ചിയുടെ പുറങ്കടലില്‍ നടന്ന ജാക്ക് സ്റ്റേ അഭ്യാസ പ്രകടനത്തില്‍ ഐഎന്‍എസ് തീറില്‍നിന്ന് വടം ഉപയോഗിച്ചു സാധനങ്ങള്‍ ഐഎന്‍എസ് സുനയനയിലേക്കു കൈമാറി. അതിനുശേഷം അപകടത്തില്‍പ്പെട്ട ആളെ ഐഎന്‍എസ് സുനയനയില്‍നിന്ന് കപ്പലുകള്‍ക്കു മധ്യേ കെട്ടിയ വടത്തിലൂടെ സുരക്ഷിതമായി ഐഎന്‍എസ് തീറിലെത്തിക്കുന്ന അഭ്യാസപ്രകടനമാണ് നാവികര്‍ കാഴ്ചവച്ചത്. ഇന്ത്യന്‍ മഹാസമുദ്ര മേഖലയിലെ 16 അംഗ രാജ്യങ്ങളിലെ നാവികരാണ് സംയുക്ത പരിശീലനത്തില്‍ പങ്കെടുക്കുന്നത്.

Tags : Navy's Jack Stay performance Indian Navy ship sea india