18

കല്‍പ്പറ്റ: വയനാട് പഴയവൈത്തിരിയില്‍ കെഎസ്ആര്‍ടിസി മിന്നല്‍ ബസും ഓട്ടോറിക്ഷയും കൂട്ടിയിടിച്ച് ഒരേ കുടുംബത്തിലെ മൂന്നു പേര്‍ മരിച്ചു. ഓട്ടോ ഡ്രൈവര്‍ ബത്തേരി ചീരാല്‍ മൂച്ചിയില്‍ നാരായണന്‍(44), ഭാര്യ ഷിജി(40), മകന്‍ അമന്‍(16) എന്നിവരാണ് മരിച്ചത്.

ഇന്നു രാവിലെ ഏഴോടെയാണ് അപകടം. തിരുവനന്തപുരത്തുനിന്നു മാനന്തവാടിക്കുള്ള ബസും കോഴിക്കോടിന് പോകുകയായിരുന്ന ഓട്ടോറിക്ഷയുമാണ് കൂട്ടിയിടിച്ചത്. നാരായണന്‍ സംഭവസ്ഥലത്ത് മരിച്ചു. മേപ്പാടി ഡോ.മൂപ്പന്‍സ് മെഡിക്കല്‍ കോളജ് ആശുപത്രിയിലാണ് ഷിജി, അമന്‍ എന്നിവരുടെ മരണം സ്ഥിരീകരിച്ചത്.

ആശുപത്രി ആവശ്യത്തിനു യാത്രയിലായിരുന്നു നാരായണനും കുടുംബാംഗങ്ങളും. ഇടിയുടെ ആഘാതത്തില്‍ ഓട്ടോയുടെ മുന്‍ ഭാഗം തകര്‍ന്നു. പ്രദേശവാസികളും ബസ് യാത്രക്കാരില്‍ ചിലരും ഉള്‍പ്പെടെ പങ്കെടുത്തായിരുന്നു രക്ഷാപ്രവര്‍ത്തനം.

Tags : accident Vythiri Wayanad