ആലപ്പുഴ: ജനറൽ ആശുപത്രിയിൽ കഴിഞ്ഞദിവസം എത്തിയവർ വിവിധ ഭക്ഷ്യവിഭവങ്ങൾ കണ്ട് കൗതുകം പൂണ്ടു. ചെമ്പരത്തി ജ്യൂസ്, കറിവേപ്പില ചമ്മന്തി, റാഗി അട, ഹെൽത്തി പുട്ട്, മുളപ്പിച്ച ചെറുപയറും കാരറ്റുമൊക്കെ ഉപയോഗിച്ചുണ്ടാക്കിയ ഹെൽത്തി സാലഡ്, ഒരാൾക്ക് ദൈനംദിന ആവശ്യമുള്ള കലോറി അടങ്ങിയ ഭക്ഷണം... അങ്ങനെ ആരോഗ്യകരമായ ജീവിതത്തിനാവശ്യമായ നിരവധി ഭക്ഷണസാധനങ്ങൾ.
ഇതിന്റെ പ്രദർശനം ഒരുക്കിയത് ഡോക്ടർമാരും നഴ്സുമാരും മറ്റു ജീവനക്കാരും നഴ്സിംഗ് വിദ്യാർഥികളും ചേർന്നായിരുന്നു. ഭക്ഷ്യവിഭവങ്ങളൊരുക്കി മേശയ്ക്ക് ചുറ്റുമായി ജീവനക്കാർ നിന്നപ്പോൾ ആശുപത്രിയിൽ എത്തിയവർ രുചിച്ചു നോക്കിയും ഉണ്ടാക്കുന്നവിധം ചോദിച്ചു മനസിലാക്കിയുമാണ് മടങ്ങിയത്. എന്റെ ആരോഗ്യം, എന്റെ അവകാശം എന്ന ലോകാരോഗ്യസംഘടനയുടെ ഈ വർഷത്തെ മുദ്രാവാക്യം പ്രമേയമാക്കി ലോകാരോഗ്യദിനാചരണ പരിപാടിയുടെ ഭാഗമായാണ് ജനറൽ ആശുപത്രി സൂപ്രണ്ട് ഡോ. ആർ. സന്ധ്യ നേതൃത്വത്തിൽ പരിപാടി സംഘടിപ്പിച്ചത്.
കൂടാതെ ആശുപത്രിയിൽ എത്തിയവർക്ക് പ്രത്യേക പരിശോധന, ഓട്ടോഡ്രൈവർമാർക്കായി അടിസ്ഥാന ജീവിത പിന്തുണ പരിശീലനം, പോസ്റ്റർ പ്രദർശന മത്സരം, നഴ്സിംഗ് വിദ്യാർഥികൾക്കായി ക്വിസ് മത്സരവും നടത്തി. ഡിഎംഒ ഡോ. ജമുന വർഗീസ് ഉദ്ഘാടനം നിർവഹിച്ചു. ജനറൽ ആശുപത്രി സൂപ്രണ്ട് ഡോ. സന്ധ്യ അധ്യക്ഷത വഹിച്ചു. ഡെപ്യൂട്ടി ഡിഎംഒ ഡോ. അനു വർഗീസ് വിഷയാവതരണം നടത്തി. ഡോ. ആശ. എം, ഡോ. പ്രിയദർശൻ സി.പി., ഡോ. സംഗീത ജോസഫ്, ഡോ. ലീന, ഡോ. അനുപമ.ആർ., ജയ കെ.കെ., പീറ്റർ, പ്രമീള, ബെന്നി അലോഷ്യസ് എന്നിവർ പ്രസംഗിച്ചു.