21

ന്യൂഡല്‍ഹി: എന്‍എസ്എസ് ആസ്ഥാനമായ പെരുന്നയില്‍ ശുദ്ധീകരണം വരുത്തണം എന്ന് പറഞ്ഞിട്ടില്ലെന്ന് കേന്ദ്രമന്ത്രി സുരേഷ് ഗോപി. കഴിഞ്ഞ ജൂലൈയില്‍ മന്നം സ്മൃതിമണ്ഡപം ഉദ്ഘാടനച്ചടങ്ങില്‍ താന്‍ പറഞ്ഞ കാര്യങ്ങള്‍ മാധ്യമങ്ങള്‍ വളച്ചൊടിക്കുകയായിരുന്നുവെന്നും അദ്ദേഹം കൂട്ടിച്ചേർത്തു. ഡല്‍ഹി കോണ്‍സ്റ്റിറ്റ്യൂഷന്‍ ക്ലബില്‍ ഗ്ലോബല്‍ നായര്‍ സമാജവും ഡല്‍ഹി-എന്‍എസ്എസും സംയുക്തമായി സംഘടിപ്പിച്ച ആഗോള നായര്‍ സമ്മേളനത്തില്‍ സംസാരിക്കുകയായിരുന്നു അദ്ദേഹം.

എന്തു പറഞ്ഞാലും വക്രസൃഷ്ടിയാക്കുന്ന ചില മാധ്യമങ്ങളുടെ രീതി കാരണമാണ് ശുദ്ധി എന്ന വാക്കുപോലും തെറ്റിദ്ധരിപ്പിക്കപ്പെടാന്‍ ഇടയാക്കിയത്. വന്ദേമാതരം ആലപിക്കുമ്പോള്‍ കൈകള്‍ കൂപ്പുന്ന, മാതാപിതാക്കള്‍ പകര്‍ന്ന് നല്‍കിയ ശീലത്തെപോലും മാധ്യമങ്ങള്‍ വെറുതെവിട്ടിട്ടില്ല. അതിനാല്‍ എന്‍എസ്എസ് പരിപാടികളില്‍ ഇനിമുതല്‍ എഴുതി തയാറാക്കിയ പ്രസംഗങ്ങള്‍ മാത്രമേ നടത്തൂവെന്നും സുരേഷ് ഗോപി വ്യക്തമാക്കി. ഡല്‍ഹി സമ്മേളനത്തിലും മുന്‍കൂട്ടി തയാറാക്കിയ പ്രസംഗമാണ് അദ്ദേഹം വായിച്ചത്.

ആഗോള നായര്‍ സമ്മേളനം ഡല്‍ഹി മുഖ്യമന്ത്രി രേഖ ഗുപ്തയാണ് ഉദ്ഘാടനം ചെയ്തത്. വിദ്യാധിരാജോത്സവത്തിന് തുടക്കം കുറിച്ചത് കേന്ദ്ര ഊര്‍ജ സഹമന്ത്രി ശ്രീപദ് യെസ്സോ നായക് ആണ്. ധാര്‍മികാചാര്യന്‍ ബ്രഹ്‌മര്‍ഷി ഡോ. മോഹന്‍ജി അനുഗ്രഹപ്രഭാഷണം നടത്തി. ഫരിദാബാദ് അമൃത ആശുപത്രി അഡ്മിനിസ്ട്രേറ്റീവ് ഡയറക്ടര്‍ സ്വാമി നിജാമൃതാനന്ദ പുരിയാണ് എന്‍എസ്എസ് ഡല്‍ഹിയുടെ നേതൃത്വത്തില്‍ ആരംഭിച്ച ശ്രീ വിദ്യാധിരാജ വിദ്യാപീഠം പാഠ്യപദ്ധതിയുടെ ശുഭാരംഭം നിര്‍വഹിച്ചത്.

ഗ്ലോബല്‍ എന്‍എസ്എസ് ചെയര്‍മാന്‍ എസ്എസ്എസ് നായര്‍ അധ്യക്ഷത വഹിച്ച ചടങ്ങില്‍ രക്ഷാധികാരിയും ഡല്‍ഹി എന്‍എസ്എസ് പ്രസിഡന്‍റുമായ എംകെജി പിള്ള, ജനറല്‍ സെക്രട്ടറി എംഡി ജയപ്രകാശ്, ബാബു പണിക്കര്‍, സി. ഉദയഭാനു, ശിവപ്രസാദ് നായര്‍, എം.ജി. രാജശേഖരന്‍ നായര്‍, ഗോപകുമാരന്‍ നായര്‍, അഡ്വ. പ്രിയ ബാലകൃഷ്ണന്‍ എന്നിവര്‍ പ്രസംഗിച്ചു.

Tags : SureshGopi Controversy GlobalNairSummit NewDelhi