Kerala
കൊച്ചി: കോതമംഗലത്ത് വാഹനാപകടത്തിൽ ദമ്പതികൾക്ക് ദാരുണാന്ത്യം. ഭൂതത്താൻകെട്ട് - വടാട്ടുപാറ റോഡിൽ ആണ് അപകടമുണ്ടായത്.
ബസും സ്കൂട്ടറും കൂട്ടിയിടിച്ചായിരുന്നു അപകടം. കുട്ടമ്പുഴ, ഉരുളൻ തണ്ണി സ്വദേശികളായ ജോസ് (65), സൂസൻ (60) എന്നിവരാണ് മരിച്ചത്.
Kerala
കോതമംഗലം: കോതമംഗലം പല്ലാരിമംഗലത്ത് വീട് കുത്തിത്തുറന്ന് മോഷണം. പല്ലാരിമംഗലം സ്വദേശി സഹൽ സിദ്ദിഖിന്റെ വീട്ടിലാണ് മോഷണം നടന്നത്. 11 പവൻ സ്വർണവും 25,000 രൂപയും നഷ്ടപ്പെട്ടതായാണ് പരാതി.
പണവും സ്വർണാഭരണങ്ങളും സൂക്ഷിച്ചിരുന്ന അലമാര തകർത്താണ് കവർച്ച. ബന്ധുവിനെ നെടുമ്പാശേരി വിമാനത്താവളത്തിൽ നിന്ന് കൂട്ടിക്കൊണ്ടുവരുന്നതിനായി വീട്ടുകാർ പുറത്തുപോയ സമയത്താണ് സംഭവം.
രാവിലെ വീട്ടിൽ തിരിച്ചെത്തിയപ്പോഴാണ് മോഷണം നടന്നതായി വീട്ടുകാർ അറിയുന്നത്. പൊലിസ് സ്ഥലത്തെത്തി പരിശോധന നടത്തി. സംഭവത്തിൽ കേസെടുത്ത് അന്വേഷണം ആരംഭിച്ചതായി പൊലിസ് അറിയിച്ചു.
Kerala
കോതമംഗലം: കോട്ടപ്പടി വടക്കുംഭാഗത്ത് സ്വകാര്യ വ്യക്തിയുടെ പറമ്പില് പൊട്ടിവീണ വൈദ്യുതിലൈനില് നിന്ന് ഷോക്കേറ്റ് കുട്ടിയാന ചരിഞ്ഞു. കോട്ടപ്പടി പഞ്ചായത്ത് മൂന്നാം വാര്ഡില് വടക്കുംഭാഗത്ത് ജോണ്സന്റെ പറമ്പിലാണ് കുട്ടിയാനയെ വൈദ്യുതി ആഘാതമേറ്റ് ചരിഞ്ഞ നിലയില് കണ്ടെത്തിയത്.
രാത്രി റബ്ബര് തോട്ടത്തിലെത്തിയ കാട്ടാനക്കൂട്ടം റബ്ബര് മരങ്ങള് മറിച്ചിട്ടപ്പോള് പൊട്ടി വീണ വൈദ്യുതിലൈനില് നിന്ന് ഷോക്കേറ്റ് ആണ് കുട്ടിയാന ചരിഞ്ഞത്. വനപാലകരും പൊലിസും സ്ഥലത്തെത്തിയിട്ടുണ്ട്. പ്രദേശത്ത് കാട്ടാന ശല്യം രൂക്ഷമാണെന്ന് വാര്ഡ് മെമ്പര് എം.കെ എല്ദോസ് പറഞ്ഞു.
Kerala
കോതമംഗലം: കാരുണ്യവും മികവും സമന്വയിപ്പിച്ച ആതുരസേവനത്തിലൂടെ കോതമംഗലത്തിന്റെ ഹൃദയത്തിൽ ഇടം നേടിയ ജനകീയ ഡോക്ടർക്കു യാത്രാമൊഴി. അയനാടൻ ഡോക്ടർ എന്നറിയപ്പെടുന്ന ചെങ്കര അയനാട്ട് ഡോ. ജോർജ് പോൾ (79) ചികിത്സ തേടിയെത്തുന്ന സാധാരണക്കാരുടെ താങ്ങും തണലുമായിരുന്നു.
കോതമംഗലം മുനിസിപ്പൽ ബസ്സ്റ്റാൻഡിനു സമീപം മാർക്കറ്റ് റോഡിലെ ആനന്ദ് നഴ്സിംഗ് ഹോം ഒരുകാലത്ത് ചികിത്സ തേടുന്ന ആയിരങ്ങളുടെ ആശ്രയമായിരുന്നു. പണം നോക്കാതെ ചികിത്സ നൽകി സന്തോഷത്തോടെ മടക്കി അയയ്ക്കുന്ന ഡോക്ടറെക്കുറിച്ചു പഴമക്കാർക്ക് അഭിമാനത്തോടെ പറയാൻ നല്ല വിശേഷങ്ങളേറെ.
ഹൈറേഞ്ച് മേഖലയിൽനിന്നുൾപ്പടെ സാധാരണക്കാരും പാവപ്പെട്ടവരുമായ നൂറുകണക്കിനു രോഗികളാണ് ദിവസേന ചികിത്സ തേടി എത്തിയിരുന്നത്. ആതുരസേവനം മാനവസേവയാക്കിയ ഡോക്ടർ ഏതാനും ആഴ്ച മുമ്പുവരെ ക്ലിനിക്കിൽ എത്തിയിരുന്നു.
ചെങ്കര അയനാട്ട് വീട്ടിൽ എ.വി. പൗലോസിന്റെയും ശോശാ പൗലോസിന്റെയും രണ്ടാമത്തെ മകനായിരുന്നു. കീരംപാറ സെന്റ് സ്റ്റീഫൻസ് ഹൈസ്കൂളിൽനിന്ന് പ്രാഥമിക വിദ്യാഭ്യാസവും എം.എ. കോളജിൽനിന്ന് ബിഎസ്സിയും നേടി. കോട്ടയം മെഡിക്കൽ കോളജിൽനിന്നാണ് എംബിബിഎസ് പൂർത്തിയാക്കിയത്.
കഴിഞ്ഞ ശനിയാഴ്ച അന്തരിച്ച ഡോ. ജോർജ് പോളിന്റെ സംസ്കാരം ഇന്നു രണ്ടിന് ഭവനത്തിലെ ശുശ്രൂഷകൾക്കുശേഷം ചെങ്കര മാർ ഇഗ്നാത്തിയോസ് നൂറോനോ യാക്കോബായ പള്ളിയിൽ നടത്തും.
കോട്ടയം മറ്റക്കര വാക്കയിൽ കുടുംബാംഗം ലില്ലി ജോർജ് പോളാണു ഭാര്യ. ആനന്ദ് ജോർജ് (ബിസിനസ്, ഓസ്ട്രേലിയ), ഡോ. അനൂപ് ജോർജ് (യുഎസ്എ), ഡോ. അരുൺ ജോർജ് പോൾ (യുഎസ്എ) എന്നിവരാണു മക്കൾ. മരുമക്കൾ: ജൂലി ആനന്ദ് അയ്മനത്തുപറമ്പിൽ (നഴ്സ്, ഓസ്ട്രേലിയ), റീജാ അനൂപ് തൈപറാംപാട്ട് (നഴ്സ്, യുഎസ്എ).
Kerala
കോതമംഗലം: അർജുൻ ആയങ്കിക്ക് കോതമംഗലത്ത് ഒരു കേസിൽ ജാമ്യം ലഭിച്ചു.കോതമംഗലം എസ്എച്ച്ഒയെ സമൂഹമാധ്യമം വഴി ഭീഷണിപ്പെടുത്തിയ കേസിലാണ് കോതമംഗലം കോടതി ജാമ്യം അനുവദിച്ചത്.
ചേലാട് റിസോർട്ടിൽനിന്നു പിടികൂടിയ കേസിൽ നേരത്തേ ഇയാളുടെ ജാമ്യം റദ്ദാക്കിയിരുന്നു. ആദ്യം ഈ കേസിൽ ജാമ്യത്തിലിറങ്ങിയശേഷമാണ് കോതമംഗലം എസ്എച്ച്ഒയ്ക്കെതിരേ സമൂഹമാധ്യമത്തിൽ ഭീഷണിയുമായി ഇയാൾ രംഗത്തു വരുന്നത്. തുടർന്ന് ഈ കേസന്വേഷിച്ച ഊന്നുകൽ എസ്എച്ച്ഒയ്ക്കെതിരേ ഭീഷണിയുമായി രംഗത്തുവരികയും ചെയ്തു.
തലശേരിയിൽ റിമാൻഡിൽ കഴിയുന്ന അർജുൻ ആയങ്കിക്കെതിരേ ജില്ലാ ഭരണകൂടം കാപ്പ ചുമത്തുകകൂടി ചെയ്തതോടെ ജയിൽവാസം നീളുന്ന സാഹചര്യമാണു നിലവിലുള്ളത്.
Kerala
കൊച്ചി: കോതമംഗലം പോത്താനിക്കാട് പെട്രോൾ പമ്പിന് സമീപം വാഹനത്തിന് തീപിടിച്ചു. ഇന്ന് ഉച്ചയോടെയാണ് സംഭവം.
പെട്രോൾ പമ്പിന് സമീപം വച്ച് സ്കോർപ്പിയോ വാഹനത്തിനാണ് തീപിടിച്ചത്. ഉടനെ കോതമംഗലം ഫയർഫോഴ്സ് എത്തി തീയണക്കുകയായിരുന്നു.
Kerala
കൊച്ചി: വിദ്യാര്ഥിയുടെ മരണത്തില് പ്രതിഷേധിച്ച് കോതമംഗലം എംഎ എന്ജിനിയറിംഗ് കോളേജില് നടന്ന സമരം പിന്വലിച്ചു. ചര്ച്ചകളില് അനുകൂല തീരുമാനം ഉണ്ടായതോടെയാണ് സമരം പിന്വലിച്ചത്. ആഭ്യന്തര പരാതി പരിഹാര സമിതി രൂപീകരിച്ച് അന്വേഷണം നടത്താനമെന്നും വിദ്യാര്ഥികള് ഉന്നയിച്ച 12 ആവശ്യങ്ങളിലും നടപടി എടുക്കാമെന്നും കോളജ് മാനേജ്മെന്റ് ഉറപ്പു നല്കി.
അന്വേഷണ റിപ്പോര്ട്ട് വരുന്നത് വരെ എച്ച്ഒഡിയും കെടിയു കോര്ഡിനേറ്ററും കോളേജ് ക്യാമ്പസില് നിന്നും മാറി നില്ക്കും. കോളജ് അധികൃതരും വിദ്യാര്ഥികളും ഭാഗമാകുന്ന ആഭ്യന്തര പരാതി പരിഹാര സമിതി രൂപീകരിച്ച ശേഷം ജീവനൊടുക്കിയ വിദ്യാര്ഥിയുടെ കുടുംബത്തിന് നഷ്ടപരിഹാരം നല്കുന്നത് അടക്കമുള്ള കാര്യങ്ങള് പരിഗണിക്കും.
മിച്ചി മര്പ്പുവിന്റെ മരണത്തില് കോളജ് അധികൃതര് ഉത്തരവാദിത്തം ഏറ്റെടുക്കുക, ഉത്തരവാദികളായവര്ക്കെതിരെ നടപടികള് സ്വീകരിക്കുക, കുടുംബത്തിന് നഷ്ടപരിഹാരം നല്കുക, തങ്ങള് ഉന്നയിക്കുന്ന വിഷയങ്ങള് ഗൗരവപൂര്വം പരിഗണിക്കുക എന്നീ ആവശ്യങ്ങള് ഉയര്ത്തിയാണ് വിദ്യാര്ഥികള് ഇന്ന് രാവിലെ എട്ടു മുതല് പ്രതിഷേധം ആരംഭിച്ചത്.
രാവിലെ കോളജിലേക്ക് ആരും പ്രവേശിക്കാതെ ഗേറ്റ് അടച്ച് വിദ്യാര്ഥികള് ഒന്നടങ്കം പ്രതിക്ഷേധിക്കുകയായിരുന്നു. കോളജിലേക്കുള്ള അധ്യാപകരുടെ വാഹനങ്ങള് കവാടത്തില് തടഞ്ഞു. കോളജ് അസോസിയേഷന് സെക്രട്ടറി ഡോ. വിന്നി വര്ഗീസ് വന്ന വാഹനം വിദ്യാര്ഥികള് തടഞ്ഞത് സംഘര്ഷാവസ്ഥ സൃഷ്ടിച്ചിരുന്നു.
പോലീസിന്റെ സഹായത്തോടെ വാഹനമില്ലാതെയാണ് ഒടുവില് സെക്രട്ടറിക്ക് അകത്ത് പ്രവേശിക്കാനായത്. തുടര്ന്ന് ഗേറ്റ് തള്ളിത്തുറന്ന് വിദ്യാര്ഥികള് കോളജിന് അകത്തേക്ക് കടക്കുകയും പ്രിന്സിപ്പലിന്റെ റൂമിന് മുന്നിലിരുന്ന് പ്രതിഷേധിക്കുകയും ചെയ്തിരുന്നു. കെഎസ്യു, എസ്എഫ്ഐ തുടങ്ങിയ വിദ്യാര്ഥി സംഘടനകളും കോളജില് വിദ്യാര്ഥികള്ക്ക് പിന്തുണയുമായി രംഗത്തെത്തിയിരുന്നു.
കേരള സാങ്കേതിക സര്വകലാശാല നിഷ്കര്ഷിക്കുന്ന ക്രെഡിറ്റ് മാര്ക്ക് പരിധി 18 ആയിരിക്കെ, സ്വയംഭരണ സ്ഥാപനമായ എംഎ കോളജ് മാത്രം 22 ക്രെഡിറ്റ് മാനദണ്ഡം നിര്ബന്ധമാക്കിയതാണ് വിദ്യാര്ഥിയെ ആത്മഹത്യയിലേക്ക് നയിച്ചതെന്ന് സഹപാഠികള് ആരോപിക്കുന്നു. ഇത് നേടാന് കഴിയാത്ത വിദ്യാര്ഥികള് ഇയര് ബാക്ക് ആകുകയും പഠനവും ഹോസ്റ്റല് സൗകര്യവും നഷ്ടപ്പെടുകയും ചെയ്യുന്ന അവസ്ഥയായിരുന്നു.
Kerala
കൊച്ചി: കോതമംഗലം എംഎ എന്ജിനിയറിംഗ് കോളജില് വിദ്യാര്ഥികളുടെ പ്രതിഷേധം തുടരുന്നു. മിച്ചി മര്പ്പുവിന്റെ മരണത്തില് കോളജ് അധികൃതര് ഉത്തരവാദിത്തം ഏറ്റെടുക്കുക, ഉത്തരവാദികളായവര്ക്കെതിരെ നടപടികള് സ്വീകരിക്കുക, വിദ്യാര്ഥിയുടെ കുടുംബത്തിന് നഷ്ടപരിഹാരം നല്കുക, തങ്ങള് ഉന്നയിക്കുന്ന വിഷയങ്ങള് ഗൗരവപൂര്വം പരിഗണിക്കുക തുടങ്ങിയ ആവശ്യങ്ങളാണ് വിദ്യാര്ഥികള് ഉന്നയിക്കുന്നത്.
കോളജിന്റെ ഗേറ്റ് തള്ളിത്തുറന്ന് വിദ്യാര്ഥികള് അകത്തേക്ക് കടന്നു. പ്രിന്സിപ്പലിന്റെ റൂമിന് മുന്നിലിരുന്ന് വിദ്യാര്ഥികള് പ്രതിഷേധിക്കുകയാണ്. പ്രിന്സിപ്പല് നല്കിയ ഉറപ്പുകള് രേഖാമൂലം എഴുതി നല്കണമെന്നാണ് വിദ്യാര്ഥികളുടെ ആവശ്യം. കെഎസ്യു, എസ്എഫ്ഐ തുടങ്ങിയ വിദ്യാര്ഥി സംഘടനകളും കോളജില് വിദ്യാര്ഥികള്ക്ക് പിന്തുണയുമായി രംഗത്തെത്തിയിട്ടുണ്ട്.
കേരള സാങ്കേതിക സര്വകലാശാല നിഷ്കര്ഷിക്കുന്ന ക്രെഡിറ്റ് മാര്ക്ക് പരിധി 18 ആയിരിക്കെ, സ്വയംഭരണ സ്ഥാപനമായ എംഎ കോളജ് മാത്രം 22 ക്രെഡിറ്റ് മാനദണ്ഡം നിര്ബന്ധമാക്കിയതാണ് വിദ്യാര്ഥിയെ ആത്മഹത്യയിലേക്ക് നയിച്ചതെന്ന് സഹപാഠികള് ആരോപിക്കുന്നു. ഇത് നേടാന് കഴിയാത്ത വിദ്യാര്ഥികള് ഇയര് ബാക്ക് ആകുകയും പഠനവും ഹോസ്റ്റല് സൗകര്യവും നഷ്ടപ്പെടുകയും ചെയ്യുന്ന അവസ്ഥയാണുള്ളത്.
ഇന്ന് രാവിലെ കോളജിലേക്ക് ആരും പ്രവേശിക്കാതെ ഗേറ്റ് അടച്ച് വിദ്യാര്ഥികള് ഒന്നടങ്കം പ്രതിഷേധിക്കുകയായിരുന്നു. കോളജിലേക്കുള്ള അധ്യാപകരുടെ വാഹനങ്ങള് കവാടത്തില് തടഞ്ഞു. കോളജ് അസോസിയേഷന് സെക്രട്ടറി ഡോ. വിന്നി വര്ഗീസ് വന്ന വാഹനം വിദ്യാര്ഥികള് തടഞ്ഞത് സംഘര്ഷാവസ്ഥ സൃഷ്ടിച്ചു.
പോലീസിന്റെ സഹായത്തോടെ വാഹനമില്ലാതെയാണ് ഒടുവില് സെക്രട്ടറിക്ക് അകത്ത് പ്രവേശിക്കാനായത്. നിലവില് സമരം ചെയ്ത കുട്ടികള്ക്കെതിരെ അച്ചടക്ക നടപടി സ്വീകരിക്കില്ലെന്ന് ഉറപ്പു നല്കിയിട്ടില്ല. ഇതിലും പ്രതിഷേധമുണ്ട്.
Kerala
കൊച്ചി: പോലീസ് ഉദ്യോഗസ്ഥരെ ഭീഷണിപ്പെടുത്തുകയും സമൂഹമാധ്യമങ്ങളിലൂടെ വെല്ലുവിളിക്കുകയും ചെയ്ത കേസിൽ അർജുൻ ആയങ്കിയെ രണ്ട് ദിവസത്തേക്ക് പോലീസ് കസ്റ്റഡിയിൽ വിട്ടു. കോതമംഗലം, ഊന്നുകൽ പോലീസ് സ്റ്റേഷനുകളിലെ ഇൻസ്പെക്ടർമാരെ ഭീഷണിപ്പെടുത്തിയ കേസിലാണ് നടപടി.
കോതമംഗലം ഇൻസ്പെക്ടർ കെ.ആർ. പ്രശാന്ത് കുമാറിനെ സമൂഹമാധ്യമത്തിലൂടെ ഇയാൾ ഭീഷണിപ്പെടുത്തിയിരുന്നു. ഈ സംഭവത്തിൽ കേസെടുത്ത് അന്വേഷണം നടത്തിയ ഊന്നുകൽ ഇൻസ്പെക്ടർ ബി.എസ്. ആദർശിന് ഇൻസ്റ്റഗ്രാമിലൂടെ അർജുൻ ആയങ്കി വെല്ലുവിളിച്ചിരുന്നു.
ഈ കേസിൽ ചോദ്യം ചെയ്ത് തെളിവെടുക്കുന്നതിനാണ് കസ്റ്റഡിയിൽവിട്ടത്. ആഭ്യന്തര മന്ത്രിയെ ഉൾപ്പെടെ വെല്ലുവിളിച്ചതിന് പിന്നാലെ കണ്ണൂരിൽ നിന്നാണ് അർജുൻ ആയങ്കിയെ കസ്റ്റഡിയിലെടുത്തത്. വെള്ളിയാഴ്ച രാത്രി ഏഴോടെ കോതമംഗലം മജിസ്ട്രേറ്റ് കോടതിയിൽ ഹാജരാക്കിയ പ്രതിയെ റിമാൻഡ് ചെയ്തിരുന്നു.
കുട്ടമ്പുഴ ഇൻസ്പെക്ടർ എ. ഷൈൻ കുമാറിനാണ് കേസിന്റെ അന്വേഷണ ചുമതല. പുന്നേക്കാട് റിസോർട്ടിൽ നിന്ന് ക്രിമിനൽ ഗൂഢാലോചന കേസിൽ പിടിയിലായ അർജുൻ ആയങ്കിക്ക് കോതമംഗലം മജിസ്ട്രേറ്റ് കോടതി നേരത്തെ അനുവദിച്ച ജാമ്യം റദ്ദാക്കിയിരുന്നു. കോതമംഗലം ഇൻസ്പെക്ടറെ ഭീഷണിപ്പെടുത്തിയതിലൂടെ ജാമ്യവ്യവസ്ഥ ലംഘിച്ചതായി കണ്ടെത്തിയതിനെ തുടർന്നായിരുന്നു നടപടി.
Kerala
കൊച്ചി: കോതമംഗലം എംഎ കോളജിലെ രണ്ടാം വർഷ എൻജിനിയറിംഗ് വിദ്യാർഥി വാടക വീട്ടിൽ മരിച്ച നിലയിൽ. അരുണാചൽ പ്രദേശ് സ്വദേശി മിച്ചി മാർപ്പുവിനെ ആണ് തൂങ്ങി മരിച്ച നിലയിൽ കണ്ടെത്തിയത്. മുറിയിൽ നിന്ന് മിച്ചി മാർപ്പുവിന്റെ കുറിപ്പും കണ്ടെത്തിയിട്ടുണ്ട്.
ഉയർന്ന ക്രെഡിറ്റ് സ്കോർ ഇല്ലാത്തിനാൽ ഇയർ ഔട്ട് ആകുമെന്ന ഭയത്താൽ മിച്ചി മാർപ്പു ജീവനൊടുക്കിയെന്നാണ് ലഭിക്കുന്ന വിവരം. സംഭവത്തിൽ പ്രതിഷേധവുമായി വിദ്യാർഥികൾ രംഗത്തെത്തിയിട്ടുണ്ട്.
ശനിയാഴ്ച വൈകിട്ട് നാലോടെയായിരുന്നു സംഭവം. മിര്ച്ചി മാര്പ്പുവിനെ അടക്കം 22 ഓളം വിദ്യാര്ഥികളെ യാതൊരു അറിയിപ്പുമില്ലാതെ പുറത്താക്കിയതായി വിദ്യാർഥികള് പറഞ്ഞു. ഒന്നര മാസം മുന്പായിരുന്നു ഈ സംഭവം.
മറ്റെല്ലാ എൻജിനീയറിംഗ് കോളജുകളിലും കുറഞ്ഞ ക്രെഡിറ്റ് സ്കോർ 18 ആണെന്നും എംഎ കോളേജിൽ മാത്രം 22 ആണെന്നും വിദ്യാർഥികൾ ആരോപിച്ചു. കോളജ് മാനേജ്മെന്റ് ക്രെഡിറ്റ് സ്കോർ കുറയ്ക്കാൻ തയാറാകുന്നില്ലെന്നും മന്ത്രിയടക്കം ഇടപെട്ടിട്ടും കോളജ് വഴങ്ങുന്നില്ലെന്നും വിദ്യാർഥികൾ പറഞ്ഞു.
Kerala
കോതമംഗലം: ബക്കറ്റിലെ ചൂട് വെള്ളം മറിഞ്ഞ് പൊള്ളലേറ്റ് ചികിത്സയിലായിരുന്ന രണ്ട് വയസുകാരി മരിച്ചു. കോട്ടപ്പടി മുട്ടത്തുപാറ മേൽഭാഗത്ത് വീട്ടിൽ ലിജു-എൽബി ദമ്പതിമാരുടെ മകൾ ബിൽഗ മറിയം ലിജു (2) ആണ് മരിച്ചത്.
അണുബാധയെ തുടർന്നാണ് ബിൽഗ മറിയം ലിജു മരിച്ചത്. ഒരാഴ്ച മുൻപായിരുന്നു അപകടം. കുട്ടിയെ കുളിപ്പിക്കാനായി ബക്കറ്റിൽ ചൂട് വെള്ളം വച്ചിരുന്നു. അമ്മ മാറിയ സമയത്ത് കുട്ടി ബക്കറ്റിൽ പിടിച്ചതോടെ അത് അബദ്ധത്തിൽ മറിഞ്ഞ് ചൂട് വെള്ളം ദേഹത്ത് വീഴുകയായിരുന്നു.
ഉടൻതന്നെ കുട്ടിയെ ആശുപത്രിയിൽ പ്രവേശിപ്പിക്കുകയായിരുന്നു. ചികിത്സ കഴിഞ്ഞെങ്കിലും പിന്നീട് അണുബാധയുണ്ടായി. ഞായറാഴ്ച രാവിലെയാണ് കുട്ടി മരിച്ചത്.
Kerala
കൊച്ചി: അർജുൻ ആയങ്കിയെ വീണ്ടും ജയിലിലെത്തിച്ചത് കോതമംഗലത്ത് തുടങ്ങിയ വെല്ലുവിളി. പോലീസിനെ വെല്ലുവിളിച്ച് തുടങ്ങിയ അർജുൻ ആയങ്കി പിന്നീട് മുഖ്യമന്ത്രിയെയും ആഭ്യന്തരമന്ത്രിയെയുമടക്കം അധിക്ഷേപിച്ചതോടെ കരിപ്പുർ സ്വർണം പൊട്ടിക്കൽ കേസിലൂടെ കുപ്രസിദ്ധനായ അർജുന്റെ പേരിൽ എറണാകുളം ജില്ലയിൽ രജിസ്റ്റർ ചെയ്തത് മൂന്ന് കേസുകൾ.
കഴിഞ്ഞ മേയിൽ കോതമംഗലം പുന്നേക്കാട് കരിയിലപ്പാറയിലെ ഹോം സ്റ്റേയിൽ അർജുനും സംഘവും എത്തിയതറിഞ്ഞ് ഇവിടെയെത്തിയ റൂറൽ പോലീസ് ഇയാളെയും അഞ്ചു കൂട്ടാളികളെയും കരുതൽ തടങ്കലിലാക്കി.
ഈ കേസിൽ ജാമ്യത്തിൽ ഇറങ്ങിയതിനു പിന്നാലെ റെയ്ഡിനു നേതൃത്വം നൽകിയ കോതമംഗലം ഇൻസ്പെക്ടർക്കും ഊന്നുകൽ സ്റ്റേഷൻ ഹൗസ് ഓഫീസർക്കുമെതിരേ അർജുൻ സമൂഹമാധ്യമങ്ങളിലൂടെ ഭീഷണി മുഴക്കി.
ഇതോടെ എറണാകുളം റൂറൽ പോലീസ് ജാമ്യമില്ലാ വകുപ്പ് പ്രകാരം കേസെടുത്തു. പിന്നാലെ ഇയാൾ ഒളിവിൽപ്പോയി. ഹൈക്കോടതി മുൻകൂർ ജാമ്യാപേക്ഷ തള്ളി. ജാമ്യവ്യവസ്ഥകൾ ലംഘിച്ചതിനാൽ പഴയ ജാമ്യവും റദ്ദാക്കപ്പെട്ടു.
ഇതിനിടയിലും ഭീഷണിയും വെല്ലുവിളിയും തുടർന്ന അർജുൻ പോലീസിനെ പരിഹസിച്ചും മുഖ്യമന്ത്രി വി.ഡി. സതീശനെ അധിക്ഷേപിച്ചും പോസ്റ്റിട്ടു. മൂവാറ്റുപുഴ ഡിവൈഎസപിയുടെ നേതൃത്വത്തിലുള്ള പ്രത്യേക അന്വേഷണസംഘം ഇയാളെ സംസ്ഥാനത്തിന്റെ വിവിധ ഭാഗങ്ങളിൽ തെരയുന്നതിനിടെയായിരുന്നു ഇത്.
District News
കോതമംഗലം: കോതമംഗലം മൺസൂൺ ഫെസ്റ്റിവൽ – മൺസൂൺ മാജിക്കിന് തട്ടേക്കാട് മിനി സ്വിറ്റ്സർലൻഡിൽ തുടക്കമായി. മന്ത്രി മോൻസ് ജോസഫ് ഉദ്ഘാടനം നിർവഹിച്ചു. ഷിബു തെക്കുംപുറം എംഎൽഎ അധ്യക്ഷത വഹിച്ചു.
കുട്ടമ്പുഴ പഞ്ചായത്ത് പ്രസിഡന്റ് മേരി കുര്യാക്കോസ്, ബ്ലോക്ക് പഞ്ചായത്ത് പ്രസിഡന്റ് ജെസി സാജു, ജില്ലാ പഞ്ചായത്ത് അംഗങ്ങളായ ജോമി തെക്കേക്കര, പി.എ.എം. ബഷീർ, പൊതുപ്രവർത്തകരായ എ.ടി. പൗലോസ്, മുഹമ്മദ് ഇക്ബാൽ, എൻ.സി. ചെറിയാൻ, എൽദോസ് ബേബി, ശ്രീജിത്ത് ശിവൻ എന്നിവർ പങ്കെടുത്തു. ഫെസ്റ്റിവലിന്റെ ഭാഗമായി സംഘടിപ്പിച്ച ടൂർ ഡി കോതമംഗലം സൈക്ലത്തൺ ശ്രദ്ധേയമായി.
മഴ അനുഭവത്തിനായി കോതമംഗലത്തേക്ക് വരൂ എന്ന പ്രമേയത്തിലാണ് മൺസൂൺ ഫെസ്റ്റ്. എംഎൽഎയുടെ 100 ദിന കർമപരിപാടിയുടെ ഭാഗമായാണ് ഫെസ്റ്റിവൽ ആസൂത്രണം ചെയ്തിരിക്കുന്നത്. മഴപ്പാട്ട് സന്ധ്യ, ബൈക്ക് റൈഡ്, ഓഫ് റോഡ് ജീപ്പ് ഡ്രൈവ്, ഷൂട്ട് ദി റെയിൻ, ട്രെക്കിംഗ് ട്രയൽ, മഴനൃത്ത മത്സരം തുടങ്ങി മഴയും പ്രകൃതിയും പ്രമേയമാക്കിയ വൈവിധ്യമാർന്ന പരിപാടികളാണ് ഫെസ്റ്റിവലിന്റെ ഭാഗമായി ഒരുക്കിയിട്ടുള്ളത്. നാട്ടുരുചികളുടെ മേളയും നടക്കും.
അഞ്ചിന് ഉച്ചയ്ക്ക് രണ്ടിന് മാമലക്കണ്ടത്തുനിന്ന് ഓഫ് റോഡ് ജീപ്പ് റൈഡ് ആരംഭിക്കും. ആറിന് രാവിലെ ഏഴിന് ഉരുളൻതണ്ണിയിൽ നിന്ന് ട്രെക്കിംഗ് ട്രയൽ നടക്കും. എട്ടിന് വൈകുന്നേരം നാലിന് പ്രധാന വേദിയിൽ മഴനൃത്ത മത്സരം സംഘടിപ്പിക്കും. ഒമ്പതിന് രാവിലെ ഒമ്പത് മുതൽ കോതമംഗലം ടൂറിസം സർക്യൂട്ടിലെ വിവിധ കേന്ദ്രങ്ങളിലൂടെ ബൈക്ക് റൈഡ് നടക്കും.മഴനൃത്ത മത്സരത്തിൽ കോളജ്, ഹയർസെക്കൻഡറി വിഭാഗങ്ങളിലെ ടീമുകൾക്ക് പങ്കെടുക്കാം. ട്രെക്കിംഗ്, ബൈക്ക് റൈഡ്, സൈക്കിൾ റൈഡ് എന്നിവയ്ക്കും മുൻകൂട്ടി രജിസ്റ്റർ ചെയ്യണം. രജിസ്ട്രേഷനായി 8589995060 ബന്ധപ്പെടണം.
സമാപന സമ്മേളനം ഒമ്പതിന് മന്ത്രി അനൂപ് ജേക്കബ് ഉദ്ഘാടനം ചെയ്യും.
District News
കോതമംഗലം: നിയോജക മണ്ഡലത്തിലെ പഞ്ചായത്ത്, ബ്ലോക്ക് പഞ്ചായത്ത് പ്രസിഡന്റുമാർ, വൈസ് പ്രസിഡന്റുമാർ, ജില്ലാ പഞ്ചായത്ത് അംഗങ്ങൾ, എന്നിവരുടെ യോഗം ഷിബു തെക്കുംപുറം എംഎൽഎയുടെ നേതൃത്വത്തിൽ എംഎൽഎ ഓഫീസിൽ ചേർന്നു. നിയോജക മണ്ഡലത്തിലെ വികസന പ്രവർത്തനങ്ങൾ കൂടുതൽ കാര്യക്ഷമമായി മുന്നോട്ടുകൊണ്ടുപോകുന്നതിനും ജനകീയ പ്രശ്നങ്ങൾ നേരിട്ട് മനസിലാക്കി പരിഹാരം കാണുന്നതിനുമാണ് യോഗം ചേർന്നത്. സർക്കാർ അധികാരത്തിൽ വന്നതിന് ശേഷം ആദ്യമായാണ് തദ്ദേശ സ്ഥാപനങ്ങളുടെ ജനപ്രതിനിധികളെ ഉൾപ്പെടുത്തി ഇത്തരമൊരു ഏകോപന യോഗം സംഘടിപ്പിച്ചത്.
ജനപ്രതിനിധികൾ ഉന്നയിച്ച വിഷയങ്ങൾ പരിഗണിച്ച് അടിയന്തരമായി പരിഹരിക്കേണ്ട പ്രശ്നങ്ങൾക്ക് സമയബന്ധിതമായി പരിഹാരം കാണുന്നതിനുള്ള നടപടികൾ കൈക്കൊള്ളുമെന്ന് എംഎൽഎ പറഞ്ഞു. അടിയന്തര പ്രാധാന്യമുള്ള ജനകീയ വിഷയങ്ങൾക്കും പ്രധാന വികസന പദ്ധതികൾക്കും മുൻഗണന നൽകാനും യോഗം നിർദേശിച്ചു. എംഎൽഎ ഫണ്ടിന്റെ വിനിയോഗവും യോഗം വിശദമായി വിലയിരുത്തി. ഓഗസ്റ്റ് മുതൽ നിയോജക മണ്ഡലത്തിലെ ഓരോ പ്രദേശങ്ങളെയും ലക്ഷ്യമാക്കി എംഎൽഎ ഫണ്ട് വിനിയോഗിക്കുന്നതിനുള്ള പ്രവർത്തനങ്ങൾ ആരംഭിക്കും.
കോതമംഗലം മൺസൂൺ ഫെസ്റ്റിവലിനോടനുബന്ധിച്ചുള്ള വിവിധ പരിപാടികളും പ്രവർത്തനങ്ങളും ചർച്ച ചെയ്തു. ഇതോടൊപ്പം ഓണത്തോടനുബന്ധിച്ച് നിയോജക മണ്ഡലത്തിലെ വിവിധ തദ്ദേശ സ്ഥാപനങ്ങളുടെ സഹകരണത്തോടെ സംഘടിപ്പിക്കേണ്ട പരിപാടികളും ആസൂത്രണവും ചെയ്തു.
മണ്ഡലത്തിലെ വികസന പ്രവർത്തനങ്ങളും ജനകീയ വിഷയങ്ങളും തുടർച്ചയായി വിലയിരുത്തുന്നതിനും തദ്ദേശ സ്ഥാപനങ്ങളുമായി കൂടുതൽ ഫലപ്രദമായ ഏകോപനം ഉറപ്പാക്കുന്നതിനുമായി എല്ലാ മാസവും രണ്ടാമത്തെ ശനിയാഴ്ച തദ്ദേശ ജനപ്രതിനിധികളുടെ യോഗം ചേരാനും തീരുമാനിച്ചു.
District News
മുവാറ്റുപുഴ: കെസിഎസ്എല് കോതമംഗലം രൂപത കൗണ്സിലും ആനിമേറ്റേഴ്സ് സംഗമവും മാര്ഗരേഖ പ്രകാശനവും മൂവാറ്റുപുഴ നെസ്റ്റ് പാസ്റ്ററല് സെന്ററില് നടന്നു. രൂപത വികാരി ജനറാള് മോണ്. ഡോ. പയസ് മലേക്കണ്ടത്തില് ഉദ്ഘാടനം ചെയ്തു.
കഴിഞ്ഞ പ്രവര്ത്തന വര്ഷത്തിലെ മികച്ച യൂണിറ്റുകളായ സെന്റ് ജോസഫ് എല്പിഎസ് നെല്ലിമറ്റം, സെന്റ് ജോസഫ് ഹൈസ്കൂള് ആരക്കുഴ, സെന്റ് ജോസഫ് ഹയര് സെക്കന്ഡറി സ്കൂള് കരിമണ്ണൂര്, സെന്റ് അഗസ്റ്റിന്സ് ഗേള്സ് ഹയര് സെക്കന്ഡറി സ്കൂള് കോതമംഗലം എന്നിവര്ക്കുള്ള അവാര്ഡുകള് സമ്മേളനത്തില് വിതരണം ചെയ്തു.
കഴിഞ്ഞ പ്രവര്ത്തന വര്ഷത്തിലെ മികച്ച ആനിമേറ്ററായ കരിമണ്ണൂര് സെന്റ് ജോസഫ് ഹയര്സെക്കന്ഡറി സ്കൂളിലെ സിസ്റ്റര് നിസ്തുലയ്ക്ക് ബഹുമതിപത്രം സമ്മാനിച്ചു. സംസ്ഥാനതലത്തില് കഴിഞ്ഞ വര്ഷത്തെ മികച്ച ആനിമേറ്റര് അവാര്ഡ് കരസ്ഥമാക്കിയ രൂപത ഓര്ഗനൈസര് ആരക്കുഴ സെന്റ് ജോസഫ് ഹൈസ്കൂളിലെ സിസ്റ്റര് ലിറ്റില് ട്രീസയെ ആദരിച്ചു.
രൂപതാ പ്രസിഡന്റ് ജിജോ മാനുവല് അധ്യക്ഷത വഹിച്ചു. രൂപത ചെയര്മാന് തൊമ്മി ചന്ദ്രന്കുന്നേല്, ഡയറക്ടര് ഫാ. മാത്യു രാമനാട്ട്, ജനറല് സെക്രട്ടറി എല്സ മരിയ ജോഫി, ട്രഷറര് ലൗഷ സിറിയക്ക്, ഓര്ഗനൈസര് സിസ്റ്റര് ലിറ്റില് ട്രീസ, സിസ്റ്റര് ടെസ്മി, സിസ്റ്റര് ലിന്ഡ, സിസ്റ്റര് ഡോണിയ, സിസ്റ്റര് ഷെറിന്, സിസ്റ്റര് ഫ്രാന്സ്ലെറ്റ്, അധ്യാപകരായ സൂസന് ചാക്കോ, ആന് മേരി, ബ്രദര് റീജന്റ് കെവിന് എന്നിവര് പങ്കെടുത്തു.
Kerala
കൊച്ചി: കോതമംഗലത്ത് അജ്ഞാത വാഹനമിടിച്ച് വയോധിക മരിച്ചു. നെല്ലിക്കുഴി ഇളമ്പ്ര സ്വദേശി പുലിക്കുന്നത്ത്കുടി കാർത്തിക കുറുമ്പൻ (95) ആണ് മരിച്ചത്.
തങ്കളം - കാക്കനാട് നാലുവരിപ്പാതയിൽ 11.30 ഓടെയാണ് സംഭവം. മൃതദേഹം കോതമംഗലം താലൂക്ക് ആശുപത്രിയിൽ സൂക്ഷിച്ചിട്ടുണ്ട്. വയോധികയെ ഇടിച്ചതിന് ശേഷം വാഹനം നിർത്താതെ പോയതായും പരാതിയുണ്ട്.
Kerala
കൊച്ചി: കോതമംഗലത്ത് കിണറ്റില് വീണ കാട്ടാനയെ രക്ഷപ്പെടുത്തി കാട്ടിലേക്ക് തുരത്തി. ആനയെ മയക്കുവെടി വെക്കണമെന്ന് ആവശ്യപ്പെട്ട് നാട്ടുകാർ പ്രതിഷേധിച്ചതിനെ തുടർന്ന് താത്കാലികമായി നിർത്തിവച്ച രക്ഷാപ്രവർത്തനം ചൊവ്വാഴ്ച ഉച്ചകഴിഞ്ഞാണ് വീണ്ടും ആരംഭിച്ചത്.
ഉച്ചയ്ക്ക് 2.30 ഓടെ ജെസിബിയുടെ സഹായത്തോടെ കിണറിന്റെ സൈഡ് ഇടിച്ച് ആനയെ കരയ്ക്ക് കയറ്റുകയായിരുന്നു. കുട്ടമ്പുഴ പൂയംകുട്ടി കൂവപ്പാറയിൽ കട്ടായത്ത് അലിയാരുടെ പുരയിടത്തിലെ ഉപയോഗശൂന്യമായി കിടന്ന കിണറ്റിലാണ് കാട്ടാന വീണത്. ആനയുടെ തുമ്പിക്കൈയ്ക്ക് മുറിവേറ്റിട്ടുള്ളതിനാൽ കാട്ടിലേക്ക് വിട്ടാലും തിരിച്ചു വരാൻ സാധ്യതയുണ്ടെന്ന് ആരോപിച്ചായിരുന്നു നാട്ടുകാരുടെ പ്രതിഷേധം.
ഈ ഒറ്റയാനെ മയക്കുവെടി വെച്ച് ഇവിടെനിന്ന് കൊണ്ടുപോകണമെന്ന ആവശ്യത്തിൽ നാട്ടുകാർ ഉറച്ചുനിന്നു. തുടർന്ന് ഉദ്യോഗസ്ഥർ നാട്ടുകാരെ അനുനയിപ്പിച്ച ശേഷമാണ് കിണറിടിച്ച് ആനയെ മുകളിലേക്ക് കയറ്റാനുള്ള നടപടികൾ പൂർത്തിയാക്കിയത്. മയക്കുവെടി വച്ചാൽ ആനയ്ക്ക് ശാരീരിക ബുദ്ധിമുട്ടുകൾ ഉണ്ടാകുമെന്നും ഇങ്ങനെ ആനയെ മാറ്റുന്നത് പ്രായോഗികമല്ലെന്നും ബോധ്യപ്പെടുത്തിയതോടെയാണ് നാട്ടുകാർ പ്രതിഷേധം അവസാനിപ്പിച്ചത്.
ആനയ്ക്ക് നേരിയ പരിക്കുകൾ ഉണ്ടെങ്കിലും ആരോഗ്യനില നിലവിൽ തൃപ്തികരമാണെന്ന് അധികൃതർ പറഞ്ഞു. കാട്ടിലേക്ക് കയറ്റി വിട്ട ആനയെ വനം വകുപ്പ് ഉദ്യോഗസ്ഥർ കൃത്യമായി നിരീക്ഷിക്കുമെന്ന് നാട്ടുകാർക്ക് ഉറപ്പുനൽകിയിട്ടുണ്ട്. പ്രദേശത്ത് ഉടൻ തന്നെ ഫെൻസിംഗ് ഒരുക്കുമെന്നും ഇതോടെ പ്രദേശത്തെ കാട്ടാന ശല്യത്തിന് ശാശ്വത പരിഹാരം കാണാനാകുമെന്നും ഷിബു തെക്കുംപുറം എംഎൽഎ വ്യക്തമാക്കി.
Kerala
കൊച്ചി: കോതമംഗലം കീരംപാറയില് ജനവാസ മേഖലയില് ഇറങ്ങിയ കാട്ടാന വീടിന്റെ മേല്ക്കൂര തകര്ത്തു. പുന്നേക്കാട് കൂരികുളം സ്വദേശി ഷെജി കുമാറിന്റെ വീടിന്റെ മേല്ക്കൂരയാണ് തകര്ത്തത്. ഇന്നലെ രാത്രി 11.30 ഓടെയാണ് ആന എത്തിയത്. എന്നാല് വീട്ടുകാര്ക്ക് പരിക്കേറ്റില്ല.
കാട്ടാന ഭീതിയില് പേടിച്ചാണ് ഷെജിയും മാതാപിതാക്കളും ഭാര്യയും കുട്ടികളും അടങ്ങുന്ന കുടുംബം കഴിയുന്നത്. എട്ടു വര്ഷമായി കാട്ടാന ഈ പ്രദേശത്ത് എത്തുന്നുണ്ട്. ആനയെ ഓടിച്ചു വിടുമെങ്കിലും ആന തിരിച്ചെത്തും. നേരത്തെ രാത്രിയാണ് ആന എത്തിക്കൊണ്ടിരുന്നതെങ്കില് ഇപ്പോള് വൈകുന്നേരം ആറിനുള്ളില് ജനവാസ മേഖലയില് എത്തുകയാണ്.
വനംവകുപ്പ് ഉദ്യോഗസ്ഥരോട് നടപടി എടുക്കാന് ആവശ്യപ്പെട്ടെങ്കിലും ഇതുവരെ ഒരു തീരുമാനവും ഉണ്ടായിട്ടില്ല. ഇന്നലെ രാത്രി ഒരു കാട്ടാന മാത്രമാണ് എത്തിയതെങ്കിലും ദിവസങ്ങള്ക്ക് മുമ്പ് ഒരു കൊമ്പനും രണ്ടു പിടിയാനുകളും ഒരു കുട്ടിയാനയുമാണ് പ്രദേശത്ത് എത്തിയത് എന്നാണ് ഷെജി കുമാര് പറയുന്നത്.
Kerala
കൊച്ചി: കോതമംഗലം പിണ്ടിമന പഞ്ചായത്തില് തമ്പടിച്ച കാട്ടാനയെ മയക്കുവെടി വയ്ക്കാന് അനുമതി. മയക്കുവെടി വയ്ക്കുന്നതിനായി വനംവകുപ്പ് മന്ത്രി ഷിബു ബേബി ജോണ് ഡിഎഫ്ഒക്ക് അനുമതി നല്കി.
ഒരു മാസക്കാലമായി പിണ്ടിമന പഞ്ചായത്തിലെ ജനങ്ങളില് ഭീതി സൃഷ്ടിച്ച് തമ്പടിച്ച കാട്ടാന ഇപ്പോള് വൈറ്റിലപ്പാറ ഭാഗത്ത് 14-ാം വര്ഡിലാണ് നിലയുറപ്പിച്ചിട്ടുള്ളത്.
നേരത്തെ കാട്ടാനയെ ഉള്വനത്തിലേക്ക് തുരത്താന് എറണാകുളം ജില്ലാ കളക്ടര് നിര്ദേശിച്ചിട്ടും നടപടി ഉണ്ടായിരുന്നില്ല. ജനവാസ മേഖലയില് എത്തിയ കാട്ടാന കൃഷയിടങ്ങളില് നാശം വരുത്തുകയും വൈദ്യുതി കണക്ഷന് കേബിളുകള് പൊട്ടിച്ചു കളയുകയും ചെയ്തിരുന്നു.
Kerala
കൊച്ചി: കോതമംഗലം കുട്ടമ്പുഴയിൽ വീടിന് നേരെ കാട്ടാനയുടെ ആക്രമണം. മാമലക്കണ്ടം സ്വദേശി ഡെനീഷ് ജോസഫിൻ്റെ വീടാണ് കാട്ടാന അക്രമിച്ചത്.
രാവിലെയാണ് കാട്ടാനക്കൂട്ടം വീട്ടുമുറ്റത്ത് എത്തിയത്. കതകടക്കം നശിപ്പിച്ചാണ് കാട്ടാനകൾ മടങ്ങിയത്. രണ്ട് വര്ഷത്തിനിടെ ഇത് നാലാം തവണയാണ് കാട്ടാനകൾ വീടിനു നേരെ നീങ്ങുന്നത്.
പലപ്പോഴായി നഷ്ടപരിഹാരം ആവശ്യപ്പെട്ട് അധികൃതരെ സമീപിച്ചെങ്കിലും നിരാശയായിരുന്നു ഫലമെന്ന് പറയുന്നു കുടുംബം.
Kerala
കോതമംഗലം: ഭാരത് ലജ്ന ഹൗസിംഗ് കോപറേറ്റീവ് സൊസൈറ്റിയിലെ കോതമംഗലം ബ്രാഞ്ചിൽ നിന്ന് 35 ലക്ഷം രൂപ തട്ടിയ കേസിൽ മുൻ ജീവനക്കാരി ഉൾപ്പെടെ നാല് പേർക്കെതിരെ കേസെടുത്ത് പോലീസ്. സൊസൈറ്റിയുടെ ലീഗൽ റിക്കവറി വിഭാഗം നൽകിയ പരാതിയിലാണ് കേസെടുത്തിരിക്കുന്നത്.
സംഭവത്തിൽ ആഭ്യന്തര അന്വേഷണവും നടപടികളും സ്വീകരിക്കുമെന്ന് സൊസൈറ്റി അധികൃതര് വ്യക്തമാക്കി. കോട്ടയം സ്വദേശി സോണിയ സെബാസ്റ്റ്യൻ, നിതിൻ ഗിരീഷ്, അലക്സിൻ ജിജോ, ടി.ടി. ജേക്കബ് എന്നിവര്ക്കെതിരെയാണ് കേസെടുത്തത്.
2021ൽ ജോലിയിരിക്കെ സോണിയയുടെ നേതൃത്വത്തിലാണ് 35 ലക്ഷം രൂപ ജേക്കബിന്റെ അക്കൗണ്ടിലേക്ക് മാറ്റിയത്. പിന്നീട് ഇത് പ്രതികൾ പിൻവലിച്ചു. പണം മാറ്റിയതിന്റെ അടക്കം ബാങ്ക് രേഖകൾ സഹിതമാണ് സൊസൈറ്റിയുടെ ലീഗൽ ആൻഡ് റിക്കവറി വിഭാഗത്തിന്റെ പരാതി.
സോണിയ സെബാസ്റ്റ്യൻ നേരത്തേയും പണം തട്ടിയ കേസിൽ അറസ്റ്റിലായിട്ടുണ്ട്. നേരത്തെ ചാര്ട്ടേഡ് അക്കൗണ്ടിൽ നിന്ന് 50 ലക്ഷം തട്ടിയ കേസിൽ സോണിയയെ എറണാകുളം പോലീസ് അറസ്റ്റു ചെയ്തിരുന്നു.
Kerala
കൊച്ചി: കോതമംഗലത്ത് കാട്ടാന ആക്രമണത്തിൽ ഒരാൾ കൊല്ലപ്പെട്ടു. കോതമംഗലം പൊങ്ങൻചുവട് ഉന്നതിയിലെ പുഷ്പാകരൻ വെള്ളക്കയ്യൻ ആണ് മരിച്ചത്.
വനവിഭവങ്ങൾ ശേഖരിക്കാനായി കാട്ടിൽ പോയപ്പോഴാണ് കാട്ടാന ആക്രമണം ഉണ്ടായത്. ഉടൻ തന്നെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.
Kerala
കൊച്ചി: അമീബിക് മസ്തിഷ്കജ്വരം ബാധിച്ച് കോതമംഗലത്ത് വയോധിക മരിച്ചു. നെല്ലിക്കുഴി പഞ്ചായത്തിൽ താമസിക്കുന്ന 73 വയസുകാരിയാണ് മരിച്ചത്. ആശുപത്രി റിപ്പോർട്ടിന്റെ അടിസ്ഥാനത്തിൽ ആരോഗ്യ വകുപ്പ് രോഗം സ്ഥിരീകരിച്ചു.
ഈ മാസം ആറിനാണ് വയോധികയിൽ രോഗലക്ഷണം കണ്ടുതുടങ്ങിയത്. എട്ടിന് കോതമംഗലത്തെ സ്വകാര്യ ആശുപത്രിയിൽ ചികിത്സയ്ക്ക് എത്തിച്ചു. അന്നു തന്നെ ആലുവയിലെ സ്വകാര്യ ആശുപത്രിയിൽ പ്രവേശിപ്പിച്ചു.
രോഗാവസ്ഥയിൽ കാര്യമായ വ്യത്യാസം കാണാതെ വന്നപ്പോൾ മൂന്നുദിവസം കഴിഞ്ഞ് കോതമംഗലത്തെ സ്വകാര്യ ആശുപത്രിയിലേക്ക് കൊണ്ടുവന്നു. ഇവിടെയാണ് മരിച്ചത്.
തൊഴിലുറപ്പ് തൊഴിലാളി കൂടിയായ വയോധിക കൃഷിയിടങ്ങളിലെ പണിക്കും പോകാറുണ്ടായിരുന്നു. ഇവർക്കൊപ്പം തൊഴിലുറപ്പ് പണിക്കുപോകുന്ന 20-ഓളം പേരെ പരിശോധിച്ചതിൽ ആർക്കും രോഗലക്ഷണമില്ല.
മരിച്ചയാളുടെ വീടിനുസമീപത്തെ 80-ഓളം വീടുകൾ സന്ദർശിച്ച് ആരോഗ്യവകുപ്പ് അധികൃതർ വിവരം ശേഖരിച്ചിരുന്നു. കിണറുകളിൽ സൂപ്പർ ക്ലോറിനേഷനും നടത്തി. ചെറുവട്ടൂർ കുടുംബക്ഷേമ കേന്ദ്രത്തിൽ ചൊവ്വാഴ്ച അവലോകനയോഗം ചേർന്ന് രോഗപ്രതിരോധ നടപടി ഊർജിതമാക്കാൻ തീരുമാനിച്ചു.
രോഗപ്രതിരോധ പ്രവർത്തനത്തിന്റെ ഭാഗമായുള്ള ബോധവത്കരണ പരിപാടി ബുധനാഴ്ച രാവിലെ 11.30-ന് ആയക്കാടുള്ള തൃക്കാരിയൂർ ആരോഗ്യ ഉപകേന്ദ്രത്തിൽ നടത്തുവാനും തീരുമാനിച്ചു.
Kerala
കൊച്ചി: കോതമംഗലത്ത് വി.ഡി. സതീശന് അനുകൂല പ്രകടനത്തിനിടെ കെ.സി. വേണുഗോപാലിന്റെ ഫ്ളെക്സ് നശിപ്പിച്ചു. 200 ഓളം പ്രവര്ത്തകര് പങ്കെടുത്ത പ്രകടനം പിഒ ജംഗ്ഷനില് എത്തിയപ്പോഴാണ് കെസിക്കായി വച്ച ഫ്ളെക്സ് നശിപ്പിച്ചത്. ഇന്നു രാവിലെ പത്തോടെയാണ് വി.ഡി. സതീശന് അനുകൂലമായി പ്രകടനം നടന്നത്.
പിഒ ജംഗ്ഷനില് വിഡിയുടെ കെസിയുടെയും ഫ്ളെക്സ് അടുത്തടുത്തായാണ് വച്ചിരുന്നത്. ചില പ്രവര്ത്തകര് കെസിയുടെ ഫ്ളെക്സ് വലിച്ചു കീറി നശിപ്പിക്കുകയായിരുന്നു. വലിച്ചു കീറിയ ഫ്ളെക്സിന്റെ പകുതി ഭാഗം റോഡില് ഉപേക്ഷിക്കുകയും ചെയ്തു. കഴിഞ്ഞ ദിവസം കളമശേരിയിലും ഒരു സംഘം കെസിയുടെ ബാനര് കീറിയിരുന്നു.
ബ്ലേഡ് കൊണ്ട് മുഖം കീറിയ നിലയിലായിരുന്നുഫ്ളെക്സ്. എന്നാല്, ഇതിനു പിന്നില് ആരെന്നു വ്യക്തമായിട്ടില്ല. യുഡിഎഫിന്റെ ചരിത്ര വിജയത്തിന്റെ ശോഭ കെടുത്തുന്ന പ്രകടനങ്ങള് പാടില്ലെന്ന് ഇന്നലെ പങ്കുവച്ച ഫേസ്ബുക്ക് പോസ്റ്റില് വി.ഡി. സതീശൻ പറഞ്ഞിരുന്നു.
ഇതിനിടെ, പലേടത്തും ന്നു നേതാക്കളുടെയും ഫ്ളെക്സുകളും ബാനറുകളും ഉയര്ത്തുകയും മറ്റു ഗ്രൂപ്പിന്റെ അണികള് അതു നശിപ്പിക്കുകയും ചെയ്യുന്നുണ്ട്. അതേസമയം, കേരളത്തില് മുഖ്യമന്ത്രി ആരെന്നു തീരുമാനിക്കാന് നിര്ണായക ചര്ച്ചകള് നടക്കുകയാണ്. ഇന്നു വൈകുന്നേരത്തോടെ മുഖ്യമന്ത്രിയെ പ്രഖ്യാപിക്കുമെന്നാണ് പ്രതീക്ഷിക്കപ്പെടുന്നത്.
Kerala
കൊച്ചി: കോതമംഗലത്ത് ലഭിക്കുന്ന വിജയം ഐക്യ ജനാധിപത്യ മുന്നണിക്കും കോതമംഗലത്തെ ജനങ്ങള്ക്കും സമര്പ്പിക്കുന്നുവെന്ന് യുഡിഎഫ് സ്ഥാനാര്ഥി ഷിബു തെക്കുംപുറം. 3701 വോട്ടുകള്ക്കാണ് ഷിബു തെക്കുംപുറം ലീഡ് ചെയ്യുന്നത്.
ജനങ്ങളെ ചേര്ത്തു നിര്ത്തിയ വലിയ പ്രവര്ത്തനങ്ങള്, എല്ലാ കാര്യങ്ങളിലും ഇടപെട്ട് മുന്നോട്ടു പോകാന് കഴിഞ്ഞ വലിയ നേട്ടമാണ് തെരഞ്ഞെടുപ്പിലെ ഫലം. ഈ വിജയം ഐക്യ ജനാധിപത്യ മുന്നണിക്കും കോതമംഗലത്തെ ജനങ്ങള്ക്കും സമര്പ്പിക്കുന്നു. ചരിത്ര ഭൂരിപക്ഷം കോതമംഗലത്തു നിന്നും കിട്ടും. യുഡിഎഫിന്റെ വലിയൊരു മുന്നേറ്റമാണ് കേരളത്തില് ഉടനീളം കാണാന് കഴിയുന്നത്.
100 സീറ്റുകള്ക്ക് മുന്നില് യുഡിഎഫ് മുന്നിലെത്തും. ഞങ്ങളുടെ പ്രതീക്ഷയ്ക്ക് അനുസരിച്ചാണ് ഓരോ പഞ്ചായത്തും എണ്ണുമ്പോള് ലീഡ് ലഭിക്കുന്നത്. കഴിഞ്ഞ അഞ്ചു വര്ഷക്കാലം ഐക്യജനാധിപത്യ മുന്നണി കോതമംഗലത്ത് നടത്തിയ പ്രവര്ത്തനങ്ങളാണ് ഉജ്ജ്വല വിജയത്തിലേക്ക് എത്തിച്ചിരിക്കുന്നത് എന്ന് ഷിബു തെക്കുംപുറം മാധ്യമങ്ങളോട് പ്രതികരിച്ചത്.
അതേസമയം, ഷിബുവിന്റെ അതേ പേരില് രണ്ടു വിതമ സ്ഥാനാര്ഥികള് ഉണ്ടായിരുന്നെങ്കിലും വോട്ടെണ്ണലിന്റെ ആദ്യ ഘട്ടത്തില് തന്നെ അദ്ദേഹം ലീഡ് ഉയര്ത്തുകയായിരുന്നു. ആന്റണി ജോണ് ആണ് കോതമംഗലത്ത് എല്ഡിഎഫ് സ്ഥാനാര്ഥി. അജി നാരായണ് ആണ് എന്ഡിഎ സ്ഥാനാര്ഥി.
Kerala
കോതമംഗലം: കോതമംഗലം രൂപതയിലെ കുടുംബങ്ങളുടെ കുലീനതയാണ് ഈ രൂപതയിലെ ദൈവവിളികളുടെ സമ്പന്നതയെന്ന് സീറോമലബാർ സഭ മേജർ ആർച്ച്ബിഷപ് മാർ റാഫേൽ തട്ടിൽ.
കോതമംഗലം രൂപതാദിനാഘോഷവും മാർ ജോർജ് പുന്നക്കോട്ടിലിന്റെ നവതിയും എപ്പിസ്കോപ്പൽ ഗോൾഡൻ ജൂബിലി ആരംഭവും മാർ ജോർജ് മഠത്തിക്കണ്ടത്തിലിന്റെയും രൂപതയുടെയും സപ്തി ആഘോഷത്തോടുമനുബന്ധിച്ച് നടന്ന പൊതുസമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു മാർ തട്ടിൽ. മികച്ച സാമൂഹ്യപ്രവർത്തനം നടത്തുന്ന രൂപതയാണ് കോതമംഗലം. മിഷനറി ദൈവവിളികളെ ഇനിയും കൂടുതൽ നൽകുവാൻ കോതമംഗലം രൂപത തയാറാകണമെന്നും അദ്ദേഹം ഉദ്ബോധിപ്പിച്ചു.
കോതമംഗലം രൂപതയിലും ഇടുക്കി രൂപതയിലും നിറഞ്ഞുനിന്ന് പ്രവർത്തിച്ച ഇടയശ്രേഷ്ഠനാണു മാർ ജോർജ് പുന്നക്കോട്ടിൽ. ഒരിക്കലും അലസനായിരിക്കാതെ അശ്രാന്ത പരിശ്രമം നടത്തുന്ന വ്യക്തിത്വമാണ് മാർ പുന്നക്കോട്ടിലിന്റേത്. ലാളിത്യവും നിലപാടുകളുമുള്ള ഇടയശ്രേഷ്നാണ് ഇപ്പോഴത്തെ ഇടയൻ മാർ ജോർജ് മഠത്തിക്കണ്ടത്തിലെന്നും മാർ തട്ടിൽ പറഞ്ഞു. ചരിത്രത്തിൽ ആദ്യമായി ഒരു മലയാളി ജർമനിയിൽ മെത്രാനായി എന്നതു കോതമംഗലം രൂപതാംഗമായ മാർ ജോഷി പൊട്ടക്കലിലൂടെ അന്വർഥമായത് ഏറെ അഭിമാനമാണെന്നും മാർ റാഫേൽ തട്ടിൽ പറഞ്ഞു.
കർദിനാൾ മാർ ജോർജ് ആലഞ്ചേരി അനുഗ്രഹപ്രഭാഷണം നടത്തി. നവതി ആഘോഷിക്കുന്ന മാർ ജോർജ് പുന്നക്കോട്ടിൽ, സപ്തതി ആഘോഷിക്കുന്ന മാർ ജോർജ് മഠത്തിക്കണ്ടത്തിൽ, ജർമനിയിലെ മയിൻസ് രൂപത സഹായമെത്രാൻ മാർ ജോഷി പൊട്ടക്കൽ എന്നിവരെ പൊന്നാടയണിയിച്ച് ഉപഹാരം നൽകി കർദിനാൾ മാർ ജോർജ് ആലഞ്ചേരി ആദരിച്ചു.
70 വർഷക്കാലം പൗരോഹിത്യ ശുശ്രൂഷ ചെയ്ത ഫാ. ജോർജ് ഓലിയപ്പുറം സീനിയർ, ജസ്റ്റീസ് ജെ.ബി. കോശി കമ്മീഷൻ പഠന സെക്രട്ടറിയായി സേവനം ചെയ്ത വാഴക്കാല ഇടവകാംഗം ജസ്റ്റീസ് സി.വി. ഫ്രാൻസിസ്, ആതുരശുശ്രൂഷാ മേഖലയിലും കുടുംബ പ്രേഷിതത്വത്തിലും തന്റെ അധ്വാനത്തിന്റെ പാദമുദ്ര പതിപ്പിച്ച എസ്ഡി സന്യാസ സൂഹത്തിലെ സിസ്റ്റർ ഫൗസ്റ്റിൻ എന്നിവരെയും ചടങ്ങിൽ ആദരിച്ചു.
ചടങ്ങിൽ യാക്കോബായ സഭ കോതമംഗലം മേഖല മെത്രാൻ ഏലിയാസ് മാർ ജൂലിയോസ്, കോതമംഗലം രൂപതയിൽനിന്നുള്ള ബിഷപ്പുമാരായ മാർ തോമസ് പുല്ലോപ്പിള്ളി, മാർ ചാക്കോ തോട്ടുമാരിക്കൽ, മാർ ജോസഫ് കൊടകല്ലിൽ, മാർ ബെന്നി ഇടത്തട്ടേൽ, സിഎംഐ കാർമൽ പ്രോവിൻസ് പ്രൊവിൻഷ്യൽ ഫാ. ജോബി കൊച്ചുമുട്ടം, ഫാ. ഡോ. ഫ്രാൻസിസ് ആലപ്പാട്ട്, പി.ജെ. ജോസഫ് എംഎൽഎ , എംപിമാരായ ഫ്രാൻസിസ് ജോർജ്, ഡീൻ കുര്യാക്കോസ്, എംഎസ്ജെ പ്രൊവിൻഷ്യൽ സുപ്പീരിയർ സിസ്റ്റർ അഭയ, പാസ്റ്ററൽ കൗൺസിൽ ജോയിന്റ് സെക്രട്ടറി ജിബിൻ ജോസ് എന്നിവർ പ്രസംഗിച്ചു.
മാർ ജോർജ് പുന്നക്കോട്ടിൽ, മാർ ജോർജ് മഠത്തിക്കണ്ടത്തിൽ, മാർ ജോഷി പൊട്ടക്കൽ എന്നിവർ മറുപടി പ്രസംഗം നടത്തി.രൂപത വികാരി ജനറാൾമാരായ മോൺ. പയസ് മലേക്കണ്ടത്തിൽ സ്വാഗതവും മോൺ. വിൻസന്റ് നെടുങ്ങാട്ട് നന്ദിയും പറഞ്ഞു. സമ്മേളനത്തിനു മുന്നോടിയായി മാർ ജോർജ് പുന്നക്കോട്ടിലിന്റെ മുഖ്യകാർമികത്വത്തിൽ കൃതജ്ഞതാബലിയർപ്പിച്ചു. ഇടുക്കി ബിഷപ് മാർ ജോൺ നെല്ലിക്കുന്നേൽ വചനസന്ദേശം നൽകി.
Kerala
കോതമംഗലം: ഏഴു പതിറ്റാണ്ടിന്റെ നിറവിലെത്തിയ കോതമംഗലം രൂപതയുടെ ശുശ്രൂഷാ പൈതൃകത്തിന് ഇന്ന് കൃതജ്ഞതയുടെ സുദിനം. രൂപതയുടെ 70-ാം വാർഷികവും രൂപതാ ദിനവും 36 വർഷം രൂപതയെ നയിച്ച മാർ ജോർജ് പുന്നക്കോട്ടിലിന്റെ തൊണ്ണൂറാം ജന്മദിനവും ഇന്ന് ആഘോഷിക്കും.
ജർമനിയിലെ മയിൻസ് രൂപത മെത്രാനായി അഭിഷിക്തനായ കോതമംഗലം രൂപതയിലെ മീങ്കുന്നം ഇടവകാംഗം ബിഷപ് ഡോ. ജോഷി പൊട്ടയ്ക്കലിനു സ്വീകരണവും ഇതോടൊപ്പം നടക്കും.
കോതമംഗലം സെന്റ് ജോർജ് കത്തീഡ്രലിൽ ഉച്ചകഴിഞ്ഞ് 2.30 ന് രൂപതയിൽനിന്നുള്ള ഒന്പത് മെത്രാന്മാർക്ക് സ്വീകരണത്തോടെ ചടങ്ങുകൾ ആരംഭിക്കും. തുടർന്ന് മാർ ജോർജ് പുന്നക്കോട്ടിലിന്റെ മുഖ്യകാർമികത്വത്തിൽ സമൂഹബലി. ബിഷപ് മാർ ജോർജ് മഠത്തിക്കണ്ടത്തിലും വിവിധ മെത്രാന്മാരും കോതമംഗലം, ഇടുക്കി രൂപതകളിലെ വൈദികരും സഹകാർമികരാകും. ഇടുക്കി ബിഷപ് മാർ ജോൺ നെല്ലിക്കുന്നേൽ വചനസന്ദേശം നൽകും.
തുടർന്ന് കത്തീഡ്രൽ ഓഡിറ്റോറിയത്തിൽ നടക്കുന്ന സമ്മേളനം സീറോമലബാർ സഭ മേജർ ആർച്ച്ബിഷപ് മാർ റാഫേൽ തട്ടിൽ ഉദ്ഘാടനം ചെയ്യും. കർദിനാൾ മാർ ജോർജ് ആലഞ്ചേരി അനുഗ്രഹ പ്രഭാഷണം നടത്തും.
മാർ പുന്നക്കോട്ടിലിന്റെ നവതിയും എപ്പിസ്കോപ്പൽ ഗോൾഡൻ ജൂബിലിയും മാർ മഠത്തിക്കണ്ടത്തിലിന്റെ സപ്തതിയും സമ്മേളനത്തിൽ ആഘോഷിക്കും. ബിഷപ് ഡോ. ജോഷി പൊട്ടയ്ക്കലിന് ചടങ്ങിൽ സ്വീകരണം നൽകും.
ബിഷപ്പുമാരായ മാർ ചാക്കോ തോട്ടുമാരിക്കൽ, മാർ ജോസഫ് കൊടകല്ലിൽ, മാർ ബെന്നി വർഗീസ് എടത്തട്ടേൽ, മാർ തോമസ് പുല്ലോപ്പിള്ളിൽ എന്നിവർ പങ്കെടുക്കും. എംപിമാരായ ഡീൻ കുര്യാക്കോസ്, ഫ്രാൻസിസ് ജോർജ്, എംഎൽഎമാരായ പി.ജെ. ജോസഫ്, മാത്യു കുഴൽനാടൻ, ആന്റണി ജോൺ എന്നിവർ പ്രസംഗിക്കും.
Business
കൊച്ചി: ചാവറ മാട്രിമണിയുടെ നവീകരിച്ച കോതമംഗലം, കട്ടപ്പന ബ്രാഞ്ചുകൾ ഉദ്ഘാടനം ചെയ്തു.
കോതമംഗലം ബ്രാഞ്ചിന്റെ ഉദ്ഘാടനം കോതമംഗലം രൂപത വികാരി ജനറാൾ മോൺ. വിൻസെന്റ് നെടുങ്ങാട്ട് നിർവഹിച്ചു. സെന്റ് ജോർജ് കത്തീഡ്രൽ പള്ളി സഹവികാരി ഫാ. മാത്യു എടാട്ട് വെഞ്ചരിപ്പുകർമ്മം നിർവഹിച്ചു. മുനിസിപ്പൽ ചെയർപേഴ്സൺ ഭാനുമതി രാജു മുഖ്യാതിഥിയായിരുന്നു.
കട്ടപ്പന ബ്രാഞ്ച് നഗരസഭ ചെയർപേഴ്സൺ ജോയ് വെട്ടിക്കുഴി ഉദ്ഘാടനം ചെയ്തു. ഇടുക്കി രൂപത വികാരി ജനറാൾ മോൺ. ഏബ്രഹാം പുറയാറ്റ് വെഞ്ചരിപ്പുകർമ്മം നിർവഹിച്ചു.
ഉദ്ഘാടനച്ചടങ്ങുകളിൽ ചാവറ മാട്രിമണി ഡയറക്ടർ ഫാ. അനിൽ ഫിലിപ്പ് അധ്യക്ഷത വഹിച്ചു. എക്സിക്യൂട്ടീവ് ഡയറക്ടർ ജോൺസൺ സി. ഏബ്രഹാം, ജനറൽ മാനേജർ ജോസഫ് മാത്യു തുടങ്ങിയവർ പരിപാടികൾക്കു നേതൃത്വം നൽകി.
Kerala
കോതമംഗലം: ഇടിമിന്നലിൽ പള്ളിയുടെ മുകൾഭാഗം അടർന്നുവീണു. കോതമംഗലത്ത് ചൊവ്വാഴ്ച വൈകുന്നേരമുണ്ടായ ശക്തമായ ഇടിമിന്നലിൽ കോതമംഗലം സെന്റ് ജോർജ് കത്തീഡ്രലിന്റെ മുകൾഭാഗമാണ് അടർന്നുവീണത്.
പള്ളിയിലെ മിന്നൽ രക്ഷാചാലകത്തോട് ചേർന്നുള്ള കെട്ടിടത്തിന്റെ ഒരു ചെറിയ ഭാഗമാണ് തകർന്ന് താഴേക്ക് പതിച്ചത്. കെട്ടിടത്തിന്റെ ഭാഗങ്ങൾ പള്ളി അങ്കണത്തിൽ വീണ് ചെറിയ തോതിലുള്ള നാശനഷ്ടങ്ങൾ സംഭവിച്ചിട്ടുണ്ട്.
Kerala
കൊച്ചി: കോതമംഗലം കോട്ടപ്പടിക്ക് സമീപം പാടശേഖരത്തിൽ ജീർണിച്ച നിലയിൽ മൃതദേഹം കണ്ടെത്തി. രണ്ടാഴ്ചയിലേറെ പഴക്കമുള്ള മൃതദേഹമാണ് കണ്ടെത്തിയത്.
കോട്ടപ്പടി പഞ്ചായത്തിലെ പുത്തൻകുളം പാടശേഖരത്തിലാണ് മൃതദേഹം കണ്ടെത്തിയത്. രാവിലെ പാടത്ത് പുലരിയാൻ പോയവർ ദുർഗന്ധം വന്നതിന് തുടർന്ന് നടത്തിയ തിരച്ചിലിൽ മൃതദേഹം കാണുകയായിരുന്നു.
സമീപപ്രദേശമായ വേങ്ങൂരിൽ നിന്ന് രണ്ടാഴ്ച മുമ്പ് തെങ്ങ് കയറ്റ തൊഴിലാളിയായ യുവാവിനെ കാണാതായിരുന്നു. ഇയാളെ കേന്ദ്രീകരിച്ചാണ് പോലീസ് അന്വേഷണം നടക്കുന്നത്.
മൃതദേഹത്തിനു സമീപത്തുനിന്ന് വാക്കത്തിയും തേങ്ങകളും കണ്ടു. ഫോറൻസിക് സംഘം എത്തി പ്രാഥമിക പരിശോധനകൾ പൂർത്തിയാക്കി. പോസ്റ്റ്മോർട്ടത്തിനുശേഷം കൂടുതൽ വ്യക്തത വരും എന്നാണ് പോലീസിന്റെ നിഗമനം.
Kerala
കോതമംഗലം: സ്നേഹഗിരി മിഷനറി സന്യാസിനീ സമൂഹത്തിന്റെ കോതമംഗലം സെന്റ് മേരീസ് പ്രോവിന്സിന്റെ പ്രൊവിന്ഷ്യല് സുപ്പീരിയറായി സിസ്റ്റര് സെലിന് റോസ് തെരെഞ്ഞെടുക്കപ്പെട്ടു.
പ്രൊവിന്ഷ്യല് കൗണ്സിലേഴ്സായി സിസ്റ്റര് മെല്വി ടോം, സിസ്റ്റര് ജോളി, സിസ്റ്റര് മരിയ ജോസ്, സിസ്റ്റര് ജോസി എന്നിവരും പ്രൊവിന്ഷ്യല് സെക്രട്ടറിയായി സിസ്റ്റര് ഇവാന, പ്രൊവിന്ഷ്യല് ബര്സാര് ആയി സിസ്റ്റര് ലിജിന് മരിയ എന്നിവരും തെരെഞ്ഞെടുക്കപ്പെട്ടു.
ഊന്നുകല് സെന്റ് മേരീസ് പ്രൊവിന്ഷ്യല് ഹൗസില് മദര് ജനറല് സിസ്റ്റര് ദിവ്യയുടെ അധ്യക്ഷതയില് ചേര്ന്ന പൊതുസംഘമാണ് തെരെഞ്ഞെടുപ്പു നടത്തിയത്.
District News
കോതമംഗലം: നഗരത്തിലെ ലിങ്ക് റോഡ് ഇടിഞ്ഞ് ഗർത്തം രൂപപ്പെട്ടത് അപകടക്കെണിയാകുന്നു. എഎം റോഡിൽനിന്ന് കോൺഗ്രസ് ഓഫീസ് വഴി ദേശീയപാതയിലേക്കെത്തുന്ന ലിങ്ക് റോഡിന്റെ അവസാന ഭാഗത്ത് കലുങ്കിനോടു ചേർന്നാണ് റോഡ് ഇടിഞ്ഞിട്ടുള്ളത്.
കലുങ്കിന്റെ സംരക്ഷണഭിത്തിയും തകർന്നിട്ടുണ്ട്. ടാറിംഗിന്റെ അടിയിൽ മണ്ണിടിഞ്ഞിരിക്കുന്നതിനാൽ വാഹനങ്ങൾ അരികു ചേർത്താൽ കുഴിയിലോ തോട്ടിലോ പതിക്കും. റോഡ് ഇടിഞ്ഞ് ഒരാഴ്ച കഴിഞ്ഞിട്ടും ഇഷ്ടിക വച്ചു മുന്നറിയിപ്പ് നൽകിയിരിക്കുന്നതല്ലാതെ അപകട സാഹചര്യം ഒഴിവാക്കാൻ നടപടിയുണ്ടായിട്ടില്ല.
വേനൽക്കാലമായതിനാൽ ഒഴുക്കു നിലച്ച തോട്ടിൽ മാലിന്യം കുന്നുകൂടിയിരിക്കുകയാണ്. ഇവിടെ മാലിന്യം തള്ളുന്നത് തടയാൻ നഗരസഭാധികൃതർ നിരീക്ഷണ കാമറകൾ സ്ഥാപിക്കാണമെന്നും ആവശ്യം ഉയർന്നിട്ടുണ്ട്.
Kerala
കോതമംഗലം: ആലുവ-മൂന്നാർ രാജപാത തുറന്നുനൽകണമെന്നാവശ്യപ്പെട്ട് ആക്ഷൻ കൗൺസിലും കോതമംഗലം നഗരസഭയും കീരംപാറ, കുട്ടമ്പുഴ, മാങ്കുളം പഞ്ചായത്തുകളും ചേർന്നു നടത്തിയ പ്രതിഷേധമാർച്ച് കോതമംഗലത്തെ ജനസാഗരമാക്കി. ചെറിയപള്ളി താഴത്തുനിന്ന് പിഡബ്ല്യുഡി ഓഫീസിനു മുന്നിലേക്ക് നടത്തിയ പ്രതിഷേധമാർച്ച് ഫാ.ഡോ. തോമസ് ജെ. പറയിടം ഉദ്ഘാടനം ചെയ്തു.
രാവിലെ പെയ്ത ചാറ്റൽമഴ വകവയ്ക്കാതെയാണു സ്ത്രീകളടക്കമുള്ളവർ മാർച്ചിൽ അണിനിരന്നത്. കോതമംഗലം നഗരസഭ, കീരംപാറ, കുട്ടമ്പുഴ, മാങ്കുളം പഞ്ചായത്തുകളിലെ ജനപ്രതിനിധികളും ആക്ഷൻ കൗൺസിൽ ഭാരവാഹികളും വൈദികരും വിവിധ രാഷ്ട്രീയകക്ഷി നേതാക്കളും ബാനറിനു കീഴിൽ മുൻനിരയിൽ അണിനിരന്നു. നേതൃനിരയ്ക്കു മുൻനിരയിലായി ആദിവാസി ഉന്നതികളിൽനിന്നുള്ളവർ തങ്ങളുടെ തനത് കലാരൂപമായ ആദിവാസി നൃത്തച്ചുവടുകളും വാദ്യമേളങ്ങളുമായി പങ്കെടുത്തു.
കുട്ടമ്പുഴ, മാങ്കുളം ആദിവാസി ഉന്നതികളിൽനിന്ന് ഉരുമൂപ്പന്മാരുടെയും കാണിക്കാരന്മാരുടെയും നേതൃത്വത്തിലെത്തിയവരും ആവേശത്തോടെ മാർച്ചിൽ പങ്കെടുത്തു. രാജപാത വനംവകുപ്പിന്റേതല്ല തങ്ങളുടേതാണെന്ന് സമരക്കാർ ഒന്നടങ്കം പ്രഖ്യാപിച്ചു. പിഡബ്ലുഡി ഓഫീസിനു മുന്നിൽ നടത്തിയ ധർണ കോതമംഗലം ബിഷപ് മാർ ജോർജ് മഠത്തിക്കണ്ടത്തിൽ ഉദ്ഘാടനം ചെയ്തു. മുൻ എംഎൽഎ എ.കെ. മണി മുഖ്യപ്രഭാഷണം നടത്തി. ഫാ. ജോസ് ചിറപ്പറമ്പിൽ, ഫാ. ജോർജ് കൊല്ലംപറമ്പിൽ, കോതമംഗലം മുനിസിപ്പൽ ചെയർപേഴ്സൺ ഭാനുമതി രാജു, ബ്ലോക്ക് പഞ്ചായത്ത് പ്രസിഡന്റ് ജെസി സാജു , ലീഗൽ അഡ്വൈസർ എ.സി. ദേവസ്യ, ഷാജി പയ്യാനിക്കൽ, യുഡിഎഫ് എറണാകുളം ജില്ലാ കൺവീനർ ഷിബു തെക്കുംപുറം തുടങ്ങിയവർ പ്രസംഗിച്ചു. ഫാ. അഡ്വ. റോബിൻ പടിഞ്ഞാറേക്കുറ്റ്, ആദർശ് പണിക്കർ, പി.എക്സ്. പോൾ, ജില്ലാ പഞ്ചായത്ത് അംഗം ജോമി തെക്കേക്കര, ബ്ലോക്ക്പഞ്ചായത്ത് സ്ഥിരം സമിതി ചെയർപേഴ്സൺ റാണിക്കുട്ടി ജോർജ് തുടങ്ങിയവർ നേതൃത്വം നൽകി.
കോതമംഗലം: സംസ്ഥാന സർക്കാർ ഇച്ഛാശക്തിയോടെ പഴയ ആലുവ-മൂന്നാർ രാജപാത തുറക്കണമെന്ന് ബിഷപ് മാർ ജോർജ് മഠത്തിക്കണ്ടത്തിൽ ആവശ്യപ്പെട്ടു. കോതമംഗലം പിഡബ്ലുഡി ഓഫീസിനു മുന്നിൽ രാജപാത ജനകീയ ആക്ഷൻ കൗൺസിലിന്റെ നേതൃത്വത്തിൽ നടത്തിയ പ്രതിഷേധമാർച്ചും ധർണയും ഉദ്ഘാടനം ചെയ്യുകയായിരുന്നു ബിഷപ്.
റവന്യു വകുപ്പിന്റെ അധീനതയിലുള്ള പൊതുമരാമത്ത് റോഡ് വനം വകുപ്പ് അന്യായമായി കൈയേറി കൈവശം വച്ചിരിക്കുന്നത് അനീതിയാണ്. എൻഎച്ച്-85ൽ ഏതെങ്കിലും വിധത്തിൽ തടസം വന്നാൽ ഹൈറേഞ്ച് ഒറ്റപ്പെടും. രാജപാത തുറന്നാൽ ഇത്തരം പ്രതിസന്ധികളെ തരണം ചെയ്യാൻ സാധിക്കും. റോഡ് സഞ്ചാരയോഗ്യമാക്കിയാൽ സംസ്ഥാനത്തിനാകെ ഉപകാരപ്രദമാണ്. അനന്തമായ ടൂറിസം സാധ്യതയ്ക്കാണ് ഇതു വഴിയൊരുക്കുന്നത്. വിവിധ പഞ്ചായത്തുകളിലെ ആയിരക്കണക്കിന് ജനങ്ങൾക്കും കർഷകർക്കും വിവിധ ഗോത്രവർഗ ഉന്നതികളിൽ താമസിക്കുന്നവർക്കും ഏറെ പ്രയോജനം കിട്ടുന്ന റോഡ് തുറക്കാൻ അടിയന്തരമായി തയാറാകണം. 12 കിലോമീറ്റർ റോഡ് മാത്രമേ രാജപാതയിൽ തടസങ്ങൾ നീക്കി പുനർനിർമിക്കേണ്ടതുള്ളൂ. അതിന് നടപടിയുണ്ടാകണം.
പൊതുമരാമത്ത് വകുപ്പിന്റേതാണു റോഡ് എന്നുള്ളതിന്റെ എല്ലാ രേഖകളും ഉണ്ടായിട്ടും അനധികൃത കൈയേറ്റക്കാരായ വനംവകുപ്പിനെ റോഡിൽനിന്ന് ഇറക്കിവിടാൻ പിഡബ്ല്യുഡി ഡിപ്പാർട്ട്മെന്റിനു ഭയമാണോയെന്നും ബിഷപ് ചോദിച്ചു.
എല്ലാ രാഷ്ട്രീയ കക്ഷികളും രാജപാതയ്ക്ക് അനുകൂലമാണെന്നു പറയുമ്പോൾ വാക്കുകൾക്കപ്പുറത്ത് പ്രവൃത്തികളാണു വേണ്ടത്. ജനങ്ങൾ എത്രമാത്രം രാജപാതയ്ക്കുവേണ്ടി ആഗ്രഹിക്കുന്നു എന്നുള്ളതിന്റെ അടയാളമാണ് ഇവിടെ കൂടിയിരിക്കുന്ന ജനസമൂഹം. രാജപാത തുറക്കുംവരെ സമരരംഗത്തുനിന്ന് പിന്നോട്ടില്ലെന്നും അദ്ദേഹം വ്യക്തമാക്കി.
Kerala
കൊച്ചി: കോതമംഗലത്ത് കിണറ്റില് വീണ മ്ലാവിനെ സാഹസികമായി രക്ഷിച്ച് ഫയര് ഫോഴ്സ്. കോതമംഗലം നെല്ലിക്കുഴി കനാല് പാലത്തിന് സമീപത്തെ നജീബിന്റെ വീട്ടിലെ കിണറ്റിലാണ് ബുധനാഴ്ച മ്ലാവ് വീണത്.
കിണറിന്റെ ചുറ്റും കെട്ടിയിരുന്ന ഷീറ്റ് കീറിക്കിടക്കുന്നതു കണ്ട് നോക്കിയപ്പോഴാണ് മ്ലാവ് കിണറ്റില് വീണത് കണ്ടത്. കാട് പിടിച്ചു കിടന്നിരുന്ന പറമ്പ് വൃത്തിയാക്കാന് എത്തിയവരാണ് മ്ലാവ് കിണറ്റില് വീണത് ആദ്യം കണ്ടത്.
ഉടനെ വനം വകുപ്പ് അധികൃതരെയും ഫയര് ഫോഴ്സിനെയും വിവരം അറിയിക്കുകയായിരുന്നു. ഫയര്ഫോഴ്സ് വടം ഉപയോഗിച്ച് കിണറ്റില് ഇറങ്ങിയാണ് മ്ലാവിനെ വലിച്ചു മുകളിലേക്ക് കയറ്റിയത്. തുടര്ന്ന് ഇതിനെ കാട്ടിലേക്ക് തന്നെ പറഞ്ഞുവിട്ടു.
Kerala
കൊച്ചി: ബിജെപി കോതമംഗലം മണ്ഡലം കമ്മിറ്റി നേതാക്കള്ക്കെതിരെ ഉയര്ന്ന സാമ്പത്തിക തട്ടിപ്പു കേസില് നടപടിയുമായി ബിജെപി ജില്ലാ നേതൃത്വം.
ആരോപണ വിധേയനായ ടി.എസ്. സുനീഷിന്റെ രാജി നേതൃത്വം എഴുതി വാങ്ങി. അതേസമയം, കോതമംഗലം ഓഫീസിനു മുന്നില് നടന്ന കുത്തിയിരിപ്പു നാടകം പാര്ട്ടിയെ മോശമാക്കുന്നതിനു വേണ്ടി നടത്തിയ രാഷ്ട്രീയ ഗൂഢാലോചനയുടെ ഭാഗമാണെന്നു ബിജെപി ജില്ലാ പ്രസിഡന്റ് പി.പി. സജീവ് പ്രസ്താവനയില് കുറ്റപ്പെടുത്തി.
സൈബർ കേസ് ഒതുക്കി തീര്ക്കാമെന്നു പറഞ്ഞ് കോമതംഗലം ബിജെപി മണ്ഡലം കമ്മിറ്റി ജനറല് സെക്രട്ടറിമാരായ ടി.എസ്. സുനീഷും ഉണ്ണികൃഷ്ണന് മാങ്ങോടും 10,58,000 രൂപ തട്ടിയെന്ന് ആരോപിച്ച് ചേലാട് സ്വദേശിയായ ജോര്ജും കുടുംബവുമാണ് ബിജെപി ഓഫീസിനു മുന്നില് ഇന്നലെ കുത്തിയിരിപ്പു സമരം നടത്തിയതു വാർത്തകളിൽ നിറഞ്ഞിരുന്നു.
പരാതിക്കു കാരണമായ സാമ്പത്തിക ഇടപാടുകളും വ്യാജ സര്ട്ടിഫിക്കറ്റ് നിർമാണവും ബോധ്യമായതോടെ ഇതിന്റെ പിന്നില് പ്രവര്ത്തിച്ചിട്ടുള്ള മുഴുവന് കുറ്റവാളികളെയും നിയമത്തിന്റെ മുന്നില് കൊണ്ടുവരുന്നതിനു സമഗ്രമായ പോലീസ് അന്വേഷണം വേണമെന്നു ബിജെപി ജില്ലാ കമ്മിറ്റി ആവശ്യപ്പെട്ടു. ഇക്കാര്യം പരാതിക്കാരനെ ബോധിപ്പിക്കുകയും ചെയ്തിരുന്നു. രാഷ്ട്രീയ കക്ഷികളുമായി കൂട്ടുചേര്ന്ന നടത്തിയിട്ടുള്ള ഒരു പൊറാട്ട് നാടകം മാത്രമാണ് കുത്തിയിരിപ്പു സമരം. വ്യാജപ്രചരണങ്ങളില് പൊതുജനങ്ങളും പാര്ട്ടി പ്രവര്ത്തകരും വീണുപോകില്ലെന്നു പാര്ട്ടിക്ക് ഉത്തമ ബോധ്യമുണ്ടെന്നും ബിജെപി ജില്ലാ ഘടകത്തിന്റെ പ്രസ്താവനയിൽ പറയുന്നു.
പ്രസ്താവനയുടെ പൂര്ണരൂപം:
ബിജെപി കോതമംഗലം മണ്ഡലം കമ്മിറ്റി ഓഫീസ് മുമ്പാകെ നടത്തിയ കുത്തിയിരുപ്പ് നാടകത്തിന് ഹേതുവായ കാരണത്തെ സംബന്ധിച്ച് ജില്ല ഓഫീസില് ലഭിച്ച പരാതിയുടെ അടിസ്ഥാനത്തില് സമയബന്ധിതമായി നടപടി സ്വീകരിക്കുകയും ലഭിച്ച പരാതിയുടെ നിജസ്ഥിതി മനസിലാക്കുന്നതിന് പാര്ട്ടിയുടെ ജില്ല ജനറല് സെക്രട്ടറിമാരെ ചുമതലപ്പെടുത്തുകയും ചെയ്തു.
അവര് നടത്തിയ അന്വേഷണത്തില് രാജ്യത്തിന്റെ സുസ്ഥിരതയെ ബാധിക്കുന്ന ഓണ്ലൈന് തട്ടിപ്പുമായി ബന്ധപ്പെട്ട നിയമസഹായം ചെയ്യുന്നതിനു വേണ്ടി സംസ്ഥാനത്തിന് അകത്തും പുറത്തുമായിട്ടുള്ള പോലീസ് ഉദ്യോഗസ്ഥരുമായും അഭിഭാഷകരുമായി പണ ഇടപാടുകള് നടത്തിയിട്ടുള്ളതായി ബോധ്യപ്പെടുകയും കൂടാതെ പരാതിക്കാരന്റെ ആവശ്യത്തിനു വേണ്ടി വ്യാജ സര്ട്ടിഫിക്കറ്റുകളുടെ നിര്മാണം നടത്തിയിട്ടുള്ളതായി ബോധ്യപ്പെട്ടതിന്റെ അടിസ്ഥാനത്തില് കേസ് പോലീസ് അന്വേഷിച്ചാല് മാത്രമേ നിജസ്ഥിതി ബോധ്യമാവുകയുള്ളൂ എന്നു ജനറല് സെക്രട്ടറിമാര് പാര്ട്ടിക്ക് റിപ്പോര്ട്ട് നല്കുകയും ചെയ്തിട്ടുള്ളതാണ്.
ഈ വിവരം പരാതിക്കാരനെ ധരിപ്പിക്കുകയും ചെയ്തിരുന്നു. അതിന്റെ അടിസ്ഥാനത്തില് പരാതിക്കാരന് പോലീസ് അധികാരികള്ക്കു മുമ്പാകെ എഴുതി തയാറാക്കിയ പരാതി ബോധിപ്പിക്കുകയും ചെയ്തിട്ടുള്ളതാണ്.
പാര്ട്ടി റിപ്പോര്ട്ടിന്റെ അടിസ്ഥാനത്തില് മണ്ഡലം ചുമതലയില് ഉണ്ടായിരുന്ന ആരോപണ വിധേയനായ ടി.എസ്. സുനീഷിന്റെ പക്കല്നിന്ന് മണ്ഡല അധ്യക്ഷ രാജി എഴുതി വാങ്ങിയിട്ടുണ്ട്. ഇതിന്റെ പിന്നില് പ്രവര്ത്തിച്ചിട്ടുള്ള മുഴുവന് കുറ്റവാളികളെയും നിയമത്തിന്റെ മുന്നില് കൊണ്ടുവരുന്നതിനു സമഗ്രമായ പോലീസ് അന്വേഷണം വേണമെന്നു ബിജെപി ജില്ലാ കമ്മിറ്റി ആവശ്യപ്പെടുന്നു.
വ്യക്തിപരമായി തല്പരകക്ഷികള് നടത്തിയിട്ടുള്ള സാമ്പത്തിക ഇടപാടുകള് ചില രാഷ്ട്രീയ ഗൂഢാലോചനയുടെ ഭാഗമായി പാര്ട്ടി ഓഫീസിനു മുമ്പില് നടത്തിയ കുത്തിയിരിപ്പ് നാടകം പാര്ട്ടിയെ ബഹുജന മധ്യത്തില് മോശമാക്കുന്നതിന് പരാതിക്കാര് ചില ദേശവിരുദ്ധശക്തികളും അവര്ക്ക് ഒത്താശ ചെയ്യുന്ന രാഷ്ട്രീയ കക്ഷികളുമായി കൂട്ടുചേര്ന്ന നടത്തിയിട്ടുള്ള ഒരു പൊറാട്ട് നാടകം മാത്രമാണെന്ന് ശരിയായ ഒരു പോലീസ് അന്വേഷണത്തില് വെളിവാകും. ഇത്തരത്തിലുള്ള വ്യാജ പ്രചരണങ്ങളില് പൊതുജനങ്ങളും പാര്ട്ടി പ്രവര്ത്തകരും വീണുപോകില്ലെന്നു പാര്ട്ടിക്ക് ഉത്തമ ബോധ്യമുണ്ട്.
Kerala
കോതമംഗലം: ധന്യാത്മാവിന്റെ സ്മരണകൾ അലയടിച്ച സായാഹ്നത്തിൽ കൃതജ്ഞതയോടെ കോതമംഗലം രൂപതയും എംഎസ്ജെ സന്യാസിനീ സഭയും പൊതുസമൂഹവും. എംഎസ്ജെ സന്യാസിനീ സമൂഹത്തിന്റെ സ്ഥാപകപിതാവ് ദൈവദാസൻ ജോസഫ് പഞ്ഞിക്കാരനച്ചനെ ധന്യൻപദവിയിലേക്ക് ഉയർത്തിയതിന്റെ കോതമംഗലം രൂപതാതല ആഘോഷങ്ങളുടെ ഭാഗമായി നടന്ന കൃതജ്ഞതാബലി ഭക്തിസാന്ദ്രമായിരുന്നു.
കോതമംഗലം സെന്റ് ജോർജ് കത്തീഡ്രലിൽ നടന്ന കൃതജ്ഞതാബലിയിൽ ബിഷപ് മാർ ജോർജ് മഠത്തിക്കണ്ടത്തിൽ മുഖ്യകാർമികത്വം വഹിച്ചു. മുൻ ബിഷപ് മാർ ജോർജ് പുന്നക്കോട്ടിൽ, ഇടുക്കി ബിഷപ് മാർ ജോൺ നെല്ലിക്കുന്നേൽ, വികാരി ജനറാൾമാരായ മോൺ. പയസ് മലേക്കണ്ടത്തിൽ, മോൺ. വിൻസന്റ് നെടുങ്ങാട്ട് എന്നിവരും വിവിധ രൂപതകളിൽനിന്നും സന്യാസ സഭകളിൽനിന്നുമായി എത്തിയ നൂറോളം വൈദികരും സഹകാർമികരായിരുന്നു.
തുടർന്ന് കത്തീഡ്രലിലെ മാർ മാത്യൂസ് ഓഡിറ്റോറിയത്തിൽ നടന്ന സമ്മേളനം മാർ ജോൺ നെല്ലിക്കുന്നേൽ ഉദ്ഘാടനം ചെയ്തു. മാർ ജോർജ് മഠത്തിക്കണ്ടത്തിൽ അധ്യക്ഷത വഹിച്ചു. സമുദായ ശക്തീകരണ വർഷം ഉദ്ഘാടനം മാർ ജോർജ് പുന്നക്കോട്ടിൽ നിർവഹിച്ചു.
ഡീൻ കുര്യാക്കോസ് എംപി, ആന്റണി ജോൺ എംഎൽഎ, സിഎംഐ മൂവാറ്റുപുഴ കാർമൽ പ്രൊവിൻസിന്റെ പ്രൊവിൻഷ്യൽ റവ.ഡോ. മാത്യു മഞ്ഞക്കുന്നേൽ, എസ്എബിഎസ് വികാർ പ്രൊവിൻഷ്യൽ സിസ്റ്റർ ഡോ. തെരേസ നടുപ്പടവിൽ, കോതമംഗലം മുനിസിപ്പൽ ചെയർപേഴ്സൺ ഭാനുമതി രാജു, വൈസ് ചെയർമാൻ പ്രിൻസ് വർക്കി, ധന്യന്റെ കുടുംബ പ്രതിനിധി ജോവാക്കിം ജേക്കബ് പഞ്ഞിക്കാരൻ എന്നിവർ പ്രസംഗിച്ചു.
സമുദായ ശക്തീകരണവർഷ പ്രമേയം റവ. ഡോ. ആന്റണി പുത്തൻകുളം അവതരിപ്പിച്ചു. ഭവനരഹിതരായ 17 പേർക്കു വീട് വയ്ക്കുന്നതിനുള്ള സ്ഥലത്തിന്റെ രേഖകൾ എംഎസ്ജെ സെന്റ് ജോസഫ് പ്രോവിൻസിന്റെ പ്രൊവിൻഷ്യൽ സുപ്പീരിയർ സിസ്റ്റർ അഭയ കൈമാറി. മോൺ. പയസ് മലേക്കണ്ടത്തിൽ, എംഎസ്ജെ സുപ്പീരിയർ ജനറൽ മദർ മെറീന എന്നിവർ പ്രസംഗിച്ചു. എംഎസ്ജെ സന്യാസിനിമാർ ആലപിച്ച പ്രാർഥനാഗീതത്തോടെയാണു സമ്മേളനം ആരംഭിച്ചത്. സമാപനത്തിൽ സീറോ മലബാർ ആന്തം ആലപിച്ചു.
രൂപതയ്ക്കകത്തും പുറത്തുംനിന്നുള്ള വൈദികരും വിവിധ കോൺഗ്രിഗേഷനുകളിൽനിന്നുള്ള സന്യാസിനിമാരും ധന്യന്റെ കുടുംബാംഗങ്ങളും ബന്ധുക്കളും ഉൾപ്പെടെ ആയിരക്കണക്കിനു വിശ്വാസികൾ കൃതജ്ഞതാബലിയിലും പൊതുസമ്മേളനത്തിലും പങ്കെടുത്തു.
Kerala
തിരുവനന്തപുരം: വന്യജീവി ആക്രമണം തടയുന്നതിനായി കോതമംഗലത്തെ പ്രത്യേക സോണായി കണക്കാക്കി നടപടികൾ സ്വീകരിക്കുമെന്ന് മന്ത്രി എ.കെ.ശശീന്ദ്രൻ നിയമസഭയിൽ പറഞ്ഞു.
കോതമംഗലത്ത് സ്പെഷൽ ടീമിനെ നിയോഗിക്കും. ചീഫ് വൈൽഡ് ലൈഫ് വാർഡൻ കോതമംഗലത്തെത്തി ചർച്ച നടത്തും. 3.75 കോടി രൂപ ചെലവിൽ 30 കിലോമീറ്ററിൽ സോളാർ ഫെൻസിംഗ് സ്ഥാപിക്കുമെന്നും ആന്റണി ജോണിന്റെ സബ്മിഷന് മന്ത്രി മറുപടി നൽകി.
Business
കോതമംഗലം: സാനിറ്ററി വെയേഴ്സ്, ബാത്ത്റൂം ഫിറ്റിംഗ്സ് മേഖലയിൽ 25 വർഷത്തിലേറെ ഉത്പാദന–വിപണന പരിചയമുള്ള യൂറോടെക്കിനു കീഴിലുള്ള കിലോ ബസാറിന്റെ 31-മത് ഷോറൂം കോതമംഗലം മൂന്നാർ ബൈപ്പാസ് റോഡിൽ പ്രവർത്തനം ആരംഭിച്ചു.
Kerala
കോതമംഗലം: ജീവ മിൽക്ക് യുവതലമുറയ്ക്കും തൊഴിലന്വേഷകർക്കും ഏറെ പ്രചോദനമേകുന്നതാണെന്ന് സീറോമലബാർ സഭ മേജർ ആർച്ച്ബിഷപ് മാർ റാഫേൽ തട്ടിൽ. കോതമംഗലം രൂപതയുടെ ക്ഷീരകർഷക ക്ഷേമപ്രസ്ഥാനമായ ജീവ മിൽക്കിന്റെ രജതജൂബിലി ആഘോഷങ്ങളുടെ സമാപനസമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം.
ക്ഷീരകർഷകർക്കും പൊതുസമൂഹത്തിനും പ്രസ്ഥാനം നൽകുന്ന സേവനങ്ങൾ അഭിമാനകരമാണ്. ഇനിയും കൂടുതൽ കർഷകർക്കു വഴികാട്ടിയായി കോതമംഗലം രൂപതയുടെ ജീവ മിൽക്ക് മാറട്ടേയെന്നും മേജർ ആർച്ച്ബിഷപ് പറഞ്ഞു.
ചടങ്ങിൽ ബിഷപ് മാർ ജോർജ് മഠത്തിക്കണ്ടത്തിൽ അധ്യക്ഷത വഹിച്ചു. ബിഷപ് മാർ ജോർജ് പുന്നക്കോട്ടിൽ അനുഗ്രഹ പ്രഭാഷണം നടത്തി. ലേബർ ഇന്ത്യ മാനേജിംഗ് ഡയറക്ടർ സന്തോഷ് ജോർജ് കുളങ്ങര മുഖ്യപ്രഭാഷണം നടത്തി. ജീവ സൊസൈറ്റികളിൽ ഏറ്റവും കൂടുതൽ പാൽ അളന്ന കർഷകനെ രൂപത വികാരി ജനറാൾ മോൺ. പയസ് മലേക്കണ്ടത്തിൽ, മോൺ. വിൻസെന്റ് നെടുങ്ങാട്ട് എന്നിവർ ആദരിച്ചു. ജീവ സ്റ്റാഫിനുള്ള എട്ടാമത് ഭവനനിർമാണ പദ്ധതിയുടെ സഹായ വിതരണോദ്ഘാടനം ഫാ. മാത്യു കോണിക്കൽ നിർവഹിച്ചു.
കവളങ്ങാട് പഞ്ചായത്ത് പ്രസിഡന്റ് ബിന്ദു ജോർജ്, ജില്ലാ പഞ്ചായത്ത് മെംബർ ജോമി തെക്കേക്കര, ബ്ലോക്ക് പഞ്ചായത്ത് മെംബർ പി.എം. സിദ്ദിഖ് , വാർഡ് മെംബർ സുനി അയ്യപ്പൻ, ജീവ എക്സിക്യൂട്ടീവ് ഡയറക്ടർ ഫാ. ജോസ് മൂർക്കാട്ടിൽ, ജനറൽ മാനേജർ സിബി ജോർജ്, മുൻ ഡയറക്ടർമാരായ ഫാ. കുര്യാക്കോസ് കൊടകല്ലിൽ, ഫാ. ജേക്കബ് തലാപ്പിള്ളിൽ, മാങ്കുളം പഞ്ചായത്ത് മെംബർ എം.ജെ. റോയി, ആർട്ടിസ്റ്റ് ബേസിൽ ബെന്നി എന്നിവർ പ്രസംഗിച്ചു.
ഇന്നു വൈകുന്നേരം അഞ്ചിന് നടക്കുന്ന ജീവ കുടുംബസംഗമം ബിഷപ് മാർ ജോർജ് മഠത്തിക്കണ്ടത്തിൽ ഉദ്ഘാടനം ചെയ്യും. ഫാ. ജോസ് മൂർക്കാട്ടിൽ അധ്യക്ഷത വഹിക്കും. ഡീൻ കുര്യാക്കോസ് എംപി, ആന്റണി ജോൺ എംഎൽഎ എന്നിവർ പ്രസംഗിക്കും.
Kerala
കോതമംഗലം: കോതമംഗലത്ത് ടൂറിസ്റ്റ് ബസിന് തീപിടിച്ചു. തീപിടിത്തത്തിൽ ബസ് പൂര്ണമായും കത്തിനശിച്ചു. എറണാകുളം കോതമംഗലം തലക്കോട് രാത്രിയോടെയാണ് സംഭവം. കോട്ടപ്പടി ഭാഗത്തു നിന്നു വരുകയായിരുന്ന ബസാണ് കത്തിനശിച്ചത്.
ശാന്തൻപാറ സ്വദേശികളാണ് ബസിലുണ്ടായിരുന്നത്. തീ ഉയര്ന്ന ഉടനെ ബസിലുണ്ടായിരുന്നവര് പുറത്തിറങ്ങിയതിനാൽ വലിയ അപകടമാണ് ഒഴിവായത്. സംഭവത്തിൽ ആര്ക്കും പരിക്കില്ല. വിവാഹ ചടങ്ങിന് പോയി തിരിച്ചു വരുന്നതിനിടെയാണ് ബസിന് തീപിടിച്ചത്. ഫയര്ഫോഴ്സെത്തിയാണ് തീയണച്ചത്. ബസിന് തീപിടിച്ചത് റോഡിൽ ഗതാഗത തടസമുണ്ടാക്കി.
Kerala
കൊച്ചി: ഓട്ടത്തിനിടെ ടൂറിസ്റ്റ് ബസിന് തീപിടിച്ചത് പരിഭ്രന്തി പരത്തി. ഞായറാഴ്ച രാത്രി എറണാകുളം കോതമംഗലം തലക്കോട്ടുണ്ടായ സംഭവത്തിൽ ആർക്കും പരിക്കില്ല.
വിവാഹ ചടങ്ങിൽ പങ്കെടുത്ത് മടങ്ങിവന്ന ഇടുക്കി ശാന്തൻപാറ സ്വദേശികളാണ് ബസിലുണ്ടായിരുന്നത്. തീ ഉയര്ന്ന ഉടനെ ബസിലുണ്ടായിരുന്നവര് പുറത്തിറങ്ങിയതിനാൽ വൻ ദുരന്തം ഒഴിവായി.
ഫയര്ഫോഴ്സെത്തിയാണ് തീയണച്ചത്. ബസ് പൂർണമായും കത്തിനശിച്ചു. അപകടത്തെ തുടർന്ന് എറണാകുളം കോതമംഗലം റൂട്ടിൽ വൻ ഗതാഗതക്കുരുക്ക് അനുഭവപ്പെട്ടു.
District News
കോതമംഗലം: കോതമംഗലം താലൂക്ക് ആശുപത്രിയില് എക്സ് റേ യൂണിറ്റ് അടച്ചിട്ട് ഒരു മാസത്തോളമായി. മെഷീൻ തകരാറാണ് കാരണം. ഇതുമൂലം രോഗികള് സ്വകാര്യ സ്ഥാപനങ്ങളെയാണ് ഇപ്പോള് ആശ്രയിക്കുന്നത്. പ്രശ്നം പരിഹരിച്ച് എക്സറേ യൂണിറ്റ് തുറക്കാന് അധികാരികളുടെ ഇടപെടല് ഉണ്ടായില്ല. ആശുപത്രിയുടെ നടത്തിപ്പ് ചുമതലയുള്ള മുനിസിപ്പാലിറ്റിയുടെ ഭാഗത്തുനിന്നും ഇക്കാര്യത്തില് അലംഭാവമാണുണ്ടായത്.
തെരഞ്ഞെടുപ്പ് ആയതിനാല് ആശുപത്രിയുടെ കാര്യത്തില് ശ്രദ്ധപതിപ്പിക്കാന് ആരുമുണ്ടായില്ല. ആദിവാസികള് അടക്കമുള്ളവര് ധാരാളമായി ചികിത്സതേടിയെത്തുന്ന താലൂക്ക് ആശുപത്രിയാണ് കോതമംഗലത്തേത്. എക്സ്റേ സൗകര്യം ഇല്ലാതായതോടെ രോഗികള്ക്ക് അധികസാമ്പത്തിക ചെലവാണുണ്ടാകുന്നത്.
അപകടത്തിലുള്പ്പെടെ പരിക്കേറ്റ് അടിയന്തിര ചികിത്സക്കെത്തുന്നവര് ആണ് എക്സ്റേ യൂണിറ്റ് ഇല്ലാത്തതിന്റെ ബുദ്ധിമുട്ട് കൂടുതലും അനുഭവിക്കുന്നത്. ചികിത്സ ലഭിക്കാന് കാലതാമസം ഉണ്ടാകുമെന്നതും ഒരു പ്രശ്നമാണ്. ഈ സാഹചര്യത്തില് രോഗിയെ സ്വകാര്യ ആശുപത്രിയിലേക്ക് കൊണ്ടുപോകേണ്ട അവസ്ഥയും ഉണ്ടാകും.
Kerala
കൊച്ചി: കോതമംഗലം കാരക്കുന്നത്ത് വാഹനാപകടത്തിൽ വിദ്യാർഥി മരിച്ചു. ബൈക്ക് ലോറിയിലിടിച്ചാണ് അപകടം. ആലപ്പുഴ സ്വദേശി വിഷ്ണു ആണ് മരിച്ചത്. ഇയാൾക്കൊപ്പമുണ്ടായിരുന്ന രണ്ട് സുഹൃത്തുക്കൾ പരിക്കേറ്റ് ചികിത്സയിലാണ്.
പത്തനംതിട്ട സ്വദേശി ആരോമൽ, തൃശൂർ സ്വദേശി ആദിത്യൻ എന്നിവർക്കാണ് പരിക്കേറ്റത്. പുതുപ്പാടി യൽദോ മാർ ബസേലിയോസ് കോളേജ് ബിസിഎ മൂന്നാം വർഷ വിദ്യാർത്ഥികളാണ് മൂവരും.
District News
കോതമംഗലം: നിയമസഭാ തെരഞ്ഞെടുപ്പിനു മാസങ്ങൾ മാത്രം അവശേഷിക്കെ തദ്ദേശ തെരഞ്ഞെടുപ്പിൽ കോതമംഗലം നിയോജകമണ്ഡത്തിൽ യുഡിഎഫിന് 15000 ത്തോളം വോട്ടിന്റെ മേല്ക്കൈ.
പത്തു വര്ഷമായി എല്ഡിഎഫിന്റെ എംഎല്എയുള്ള നിയോജകമണ്ഡലത്തിലാണ് ഇത്രവലിയ തിരിച്ചടിയെന്നതാണ് ശ്രദ്ധേയം. മണ്ഡലത്തിലെ പ്രധാന തെരഞ്ഞെടുപ്പു പ്രചാരകൻ എംഎല്എ ആയിരുന്നു. സംസ്ഥാന സര്ക്കാരിന്റെ വികസന-ക്ഷേമ പ്രവര്ത്തനങ്ങളിലൂന്നിയാണ് പ്രചാരണം നയിച്ചത്. സിപിഎമ്മിന്റെ ജില്ലാ സെക്രട്ടറി എസ്. സതീഷും ജില്ലാ സെക്രട്ടറിയേറ്റംഗം ആര്. അനില്കുമാറും ഈ മണ്ഡലത്തിലെ പ്രധാന നേതാക്കളുമാണ്.
പല പഞ്ചായത്തുകളിലും ശക്തമായ പ്രതിപക്ഷമാകാന്പോലും എല്ഡിഎഫിനു കഴിഞ്ഞിട്ടില്ല. കഴിഞ്ഞ ടേമിൽ ഭരിച്ച പല്ലാരിമംഗലത്ത് ഒരാൾ മാത്രമാണ് സിപിഎമ്മിന് പ്രതിപക്ഷത്തിരിക്കാനുള്ളത്. കോട്ടപ്പടിയിലും കീരമ്പാറയിലും രണ്ടുപേര് മാത്രമാണ് എല്ഡിഎഫിനുള്ളത്. ബ്ലോക്ക് പഞ്ചായത്തില് മൂന്ന് പേരാണ് എല്ഡിഎഫിന്റെ സമ്പാദ്യം. 33 വാര്ഡുകളുള്ള മുനിസിപ്പാലിറ്റിയില് എല്ഡിഎഫിന്റെ കൈകളിലുള്ളത് എട്ടെണ്ണം മാത്രം.
നിയമസഭാ തെരഞ്ഞെടുപ്പിന് മാസങ്ങള് അവശേഷിക്കെ ആന്റണി ജോണിലൂടെ ഹാട്രിക് തികച്ച് ചരിത്രനേട്ടം കൈവരിക്കാനുള്ള തയാറെടുപ്പിനാണ് അപ്രതീഷിത തിരിച്ചടി. തദ്ദേശ സ്വയംഭരണ സ്ഥാപനങ്ങളിലെ ഭരണത്തിന്റെ പിന്ബലമില്ലാതെ നിയമസഭാ തെരഞ്ഞെടുപ്പിനെ നേരിടേണ്ട അവസ്ഥയിലാണ് നിലവിൽ എല്ഡിഎഫ് എത്തിപ്പെട്ടിരിക്കുന്ന
District News
യുഡിഎഫ്
കോതമംഗലം: ബ്ലോക്ക് പഞ്ചായത്തിൽ യുഡിഎഫ് സ്ഥാനാർഥികൾ നാമനിർദേശ പത്രിക സമർപ്പിച്ചു. 16 ഡിവിഷനുകളുള്ള ബ്ലോക്ക് പഞ്ചായത്തിൽ കോൺഗ്രസ് 13, കേരളാ കോൺഗ്രസ് ഒന്ന്, മുസ്ലിം ലീഗ് ഒന്ന്,കേരളാ കോൺഗ്രസ് (ജേക്കബ്) ഒന്ന് എന്നിങ്ങനെയാണ് സീറ്റ് വിഭജനം. കീരംപാറ ഡിവിഷനിൽ കേരളാ കോൺഗ്രസും പല്ലാരിമംഗലം ഡിവിഷനിൽ മുസ്ലിം ലീഗും കോട്ടപ്പടി ഡിവിഷനിൽ കേരളാ കോൺഗ്രസ് (ജേക്കബ്), മറ്റ് ഡിവിഷനുകളിൽ കോൺഗ്രസ് സ്ഥാനാർഥികളും മത്സരിക്കും.
1. കോട്ടപ്പടി- സി.എം. ബേബി, 2. ഭൂതത്താൻകെട്ട്- ജെസി സാജു, 3. ഇടമലയാർ - ബിൻസി മോഹനൻ, 4. കുട്ടമ്പുഴ-ചിഞ്ചു പി. ഏബ്രഹാം, 5. കീരംപാറ- റാണിക്കുട്ടി ജോർജ്, 6. കവളങ്ങാട്- മേഘ ഷിബു, 7. നേര്യമംഗലം - പ്രിയങ്ക ടോമി, 8. നെല്ലിമറ്റം- പി.എം. സിദ്ദീഖ്, 9. പൈങ്ങോട്ടൂർ - സിജോ ജോൺ, 10. പോത്താനിക്കാട് - ജേക്കബ് വർഗീസ്, 11. പല്ലാരിമംഗലം-രാജേഷ് കുഞ്ഞുമോൻ, 12. വാരപ്പെട്ടി- പി.കെ. ചന്ദ്രശേഖരൻ നായർ, 13. ചെറുവട്ടൂർ - പി.ആർ. വൃന്ദകുമാരി, 14. ഇളമ്പ്ര ചന്ദ്രലേഖ ശശിധരൻ, 15. പിണ്ടിമന-വിജോയ് പി. ജോസഫ്, 16. നെല്ലിക്കുഴി- രഹന നൂറുദ്ദീൻ എന്നിവരാണ് സ്ഥാനാർഥികൾ.
എൽഡിഎഫ്
കോതമംഗലം: 16 ഡിവിഷനുകളുള്ള കോതമംഗലം ബ്ലോക്കിൽ സിപിഎം സിപിഎം 13, സിപിഐ 3, കേരളാ കോൺഗ്രസ് (എം) ഒന്ന് എന്നിങ്ങനെയാണ് സീറ്റ് വിഭജനം. പോത്താനിക്കാട്, കവളങ്ങാട്, ഇടമലയാർ ഡിവിഷനുകൾ സിപിഐ, ഭൂതത്താൻകെട്ട് ഡിവിഷൻ കേരളാ കോൺഗ്രസ് (എം), മറ്റ് ഡിവിഷനുകൾ സിപിഎം സ്ഥാനാർഥികൾ എന്നിങ്ങനെയാണ് മത്സരിക്കുന്നത്. എൽഡിഎഫ് സ്ഥാനാർഥികൾ പത്രിക സമർപ്പിച്ചു.
1. കോട്ടപ്പടി - ബിജി പി ഐസക്ക്, 2. ഭൂതത്താൻകെട്ട് - ജിജി പുളിക്കൽ, 3. ഇടമലയാർ ശാന്തമ്മ പയസ്, 4. കുട്ടമ്പുഴ- മുംതാസ് റെജി, 5. കീരമ്പാറ- റമ്മി ബോസ്, 6. കവളങ്ങാട് - ലിസി ജോയി, 7. നേര്യമംഗലം- ലിസി ജോർജ്, 8. നെല്ലിമറ്റം - റിയാസ് തുരുത്തേൽ, 9. പൈങ്ങോട്ടൂർ- സന്തോഷ് ജോർജ്, 10. പോത്താനിക്കാട് - വിൻസൻ ഇല്ലിയ്ക്കൽ, 11. പല്ലാരിമംഗലം- കെ ആർ രതീഷ്, 12. വാരപ്പെട്ടി - ഇ എം അജാസ്, 13. ചെറുവട്ടൂർ- സന്ധ്യ സുരേന്ദ്രൻ, 14. ഇളമ്പ്ര - രഞ്ചിനി രവി, 15. പിണ്ടിമന - എസ് എം അലിയാർ, 16. നെല്ലിക്കുഴി- ശ്രീചിത്ര ശ്രീനിവാസ് എന്നിവരാണ് സ്ഥാനാർഥികൾ.