നടപടി നേരിട്ട ജീവനക്കാരി
കൊച്ചി: കോതമംഗലം താലൂക്ക് ആശുപത്രിയിൽ പത്ത് രൂപ നോട്ടായി നൽകാനില്ലെന്ന കാരണത്താൽ ഹൃദ്രോഗിക്ക് ചികിത്സ നിഷേധിച്ച സംഭവത്തിൽ ജീവനക്കാരിയെ സസ്പെൻഡ് ചെയ്തു. 45 മിനിറ്റോളം രോഗിക്ക് ചികിത്സ വൈകിപ്പിച്ചെന്നായിരുന്നു ആരോപണം.
പെരുമ്പാവൂർ സ്വദേശി എ.കെ. കരീം എന്നയാൾക്കാണ് ഈ ദുരനുഭവം ഉണ്ടായത്. പുലർച്ചെ ഒരു മണിയോടെയാണ് അത്യാഹിത വിഭാഗത്തിൽ കരീമിനെ എത്തിച്ചത്. എന്നാൽ, ഒപി ടിക്കറ്റിനായുള്ള പത്ത് രൂപ പണമായി നൽകണമെന്നും ഓൺലൈൻ പേയ്മെന്റ് സ്വീകരിക്കില്ലെന്നും ആശുപത്രി ജീവനക്കാരി വാശിപിടിക്കുകയായിരുന്നു.
അത്യാവശ്യമാണെങ്കിൽ സ്വകാര്യ ആശുപത്രിയിൽ പോകണമെന്നും ജീവനക്കാരി ആക്രോശിച്ചു. യാത്രാമധ്യേ ദേഹാസ്വാദ്യം അനുഭവപ്പെട്ട കരീം കോതമംഗലം താലൂക്ക് ആശുപത്രിയിലേക്ക് പുലർച്ചെ ഒന്നേകാലിനാണ് എത്തുന്നത്. ഹൃദയത്തിന്റെ വാൽവ് മാറ്റിവെച്ച കരീം അടിയന്തര ചികിത്സ പ്രതീക്ഷിച്ചാണ് ആശുപത്രിയിലേക്ക് കയറിയത്.
എന്നാൽ 10 രൂപ പണമായി ഇല്ലാത്തതിനാൽ ചീട്ട് നൽകില്ലെന്ന് ആശുപത്രി ജീവനക്കാരി. ഓൺലൈൻ പെയ്മെന്റ് സ്വീകരിക്കില്ലെന്നും പണമായി നൽകണമെന്നും നിർബന്ധം. കൂടെയുള്ളയാൾ പുറത്തുപോയി പണം ആക്കുന്ന സമയം കൊണ്ട് ചീട്ട് നൽകുമെന്ന് അഭ്യർത്ഥിച്ചെങ്കിലും വഴങ്ങിയില്ല.
ആശുപത്രി ജീവനക്കാരി പോലീസിനെ വിളിച്ചെങ്കിലും ഉദ്യോഗസ്ഥർക്ക് കാര്യങ്ങൾ ബോധ്യപ്പെട്ടു. 45 മിനിറ്റിനുശേഷം വിഷയം അറിഞ്ഞെത്തിയ ഡോക്ടർ ചികിത്സ ലഭ്യമാക്കുകയും, രോഗിയുടെ ബിപി 280 നു മുകളിലേക്ക് ഉയർന്നതോടെ കളമശേരി മെഡിക്കൽ കോളജിലേക്ക് റഫർ ചെയ്യുകയായിരുന്നു.
Tags : Kothamangalam NewsUpdate Headlines Deepika DeepikaNewspaper