പ്രതീകാത്മക ചിത്രം
തിരുവനന്തപുരം: സംസ്ഥാനത്തെ എയ്ഡഡ് സ്കൂളുകളിൽ ഭിന്നശേഷിക്കാർക്കുള്ള നിയമന സംവരണം നടപ്പാക്കുന്നതിന്റെ പേരിൽ എയ്ഡഡ് മേഖലയെ പൂർണമായും കൈപ്പിടിയിലൊതുക്കാനുള്ള നീക്കവുമായി സംസ്ഥാന സർക്കാർ.
ഭിന്നശേഷിക്കാരുടെ നിയമനം കൂടുതൽ കാര്യക്ഷമമാക്കുന്നതിന്റെ ഭാഗമെന്ന നിലയിൽ ജില്ലാതല ഡിജിറ്റൽ റോസ്റ്റർ അപ്പോയിന്റ്മെന്റ് മാനേജ്മെന്റ് എന്ന സംവിധാനം നടപ്പാക്കുന്നതിലൂടെയാണ് എയ്ഡഡ് മേഖലയിലെ മുഴുവൻ നിയമനങ്ങളിലും ഇടപെടാനുള്ള നീക്കം.
ഇതുമായി ബന്ധപ്പെട്ട് പൊതുവിദ്യാഭ്യാസ സെക്രട്ടറി തയാറാക്കിയ കത്തിലെ ഒൻപതാം ഇനമായി എയ്ഡഡ് മേഖലയിലെ എല്ലാ നിയമനങ്ങളും ഭാവിയിൽ ഏറ്റെടുക്കാനുള്ള നീക്കമെന്ന സൂചനയാണ് നൽകുന്നത്.
ജില്ലാതലത്തിൽ രൂപീകരിക്കുന്ന മാനേജ്മെന്റ് സിസ്റ്റത്തെ ഭിന്നശേഷീസംവരണം നടത്താനുള്ള ഒരു സിസ്റ്റം എന്നതിൽ ഉപരിയായി എയ്ഡഡ് സ്കൂളിലെ എല്ലാ നിയമനങ്ങളും നടത്താൻവേണ്ടിയുള്ള ഒരു സിസ്റ്റം ആയി ഇത് വിഭാവനം ചെയ്യേണ്ടതാണെന്നാണ് കുറിച്ചിരിക്കുന്നത്. സുപ്രീംകോടതിയിൽ സമർപ്പിക്കാനായി അഡ്വക്കറ്റ് ജനറലിനു പൊതുവിദ്യാഭ്യാസ സെക്രട്ടറി നൽകിയ കത്തിലാണ് പരാമർശം ഉൾപ്പെടുത്തിയിട്ടുള്ളത്.
ഇതിലൂടെ ലക്ഷ്യമിടുന്നത് ഭിന്നശേഷീ നിയമനം സംബന്ധിച്ചുള്ള കാര്യങ്ങളുടെ പേരിൽ ഭാവിയിൽ എയ്ഡഡ് മേഖലയിലെ മുഴുവൻ നിയമനങ്ങളിലും ഇടപെടലാണ്. സുപ്രീംകോടതിയിൽ സംസ്ഥാന സർക്കാർ നൽകുന്ന ഈ കത്തിലെ നിയമന പരാമർശങ്ങൾ എയ്ഡഡ് മാനേജ്മെന്റുകളുടെ നിയമനാധികാരത്തിൻമേലുള്ള കടന്നുകയറ്റമാണ്.
നിലവിൽ നിയമന നടപടികൾക്കായുള്ള റോസ്റ്റർ സംവിധാനം ഓരോ മാനേജ്മെന്റിനും ഓരോ റോസ്റ്ററായി, തസ്തികകളെ ഏഴു കാറ്റഗറികളായാണ് തിരിച്ചിട്ടുള്ളത്. പുതുതായി രൂപീകരിക്കുന്ന ജില്ലാതല റോസ്റ്റർ സ്കീമിൽ വ്യക്തിഗത, കോർപറേറ്റ് മാനേജ്മെന്റുകൾ എന്ന വ്യത്യാസമില്ലാതെ ഓരോ ജില്ലയിലെയും എല്ലാ സ്കൂളുകളെയും ചേർത്ത് ഏകീകൃത യൂണിറ്റായി പരിഗണിക്കും.
ജില്ലാ തലത്തിൽ ആകെ ഒഴിവു വരുന്നതിൽ ഏറ്റവും കൂടുതൽ ഒഴിവു റിപ്പോർട്ട് ചെയ്ത സ്കൂളിൽ നിന്നായിരിക്കും ഭിന്നശേഷിയിലെ ആദ്യ നിയമനം നടത്തുക. തുടർന്ന് ഇതിനു തൊട്ടു താഴെയുള്ള സ്കൂൾ എന്ന നിലയിലായിരിക്കുമെന്നും പൊതുവിദ്യാഭ്യാസ സെക്രട്ടറിയുടെ കത്തിൽ പറയുന്നു.
നിലവിലെ കെഇആറിലെ ചട്ടം ഭേദഗതി ചെയ്ത് എയ്ഡഡ് സ്കൂൾ അധ്യാപക നിയമനം സമന്വയയിൽ കൂടിയാക്കാനും നീക്കമുണ്ട്. ഇതിന്റെ ഭാഗമായി സമന്വയയിൽ ഒഴിവു ലഭ്യമാകുന്പോഴെല്ലാം ചട്ടങ്ങൾ/ഉത്തരവുകൾക്കനുസൃതമായി യോഗ്യതയുള്ള ജീവനക്കാരുടെ ലഭ്യത ഉറപ്പുവരുത്തുന്നതിനും ഒഴിവ് നികത്തുന്നതിനും കാലാകാലങ്ങളായി സർക്കാർ പുറപ്പെടുവിക്കുന്ന നിർദേശങ്ങൾ മാനേജർ പാലിക്കേണ്ടതാണെന്നതാണ് ഭേദഗതി.
സംസ്ഥാനത്തെ വിദ്യാഭ്യാസ മേഖലയിൽ എയ്ഡഡ് സ്കൂളുകൾ നൽകിയിട്ടുള്ള സംഭാവനകൾ വിസ്മരിച്ചുകൊണ്ടുള്ള അധികാരികളുടെ നീക്കത്തിനെതിരേ വ്യാപക പ്രതിഷേധമാണ് ഉയരുന്നത്. വിവിധ കാരണങ്ങളാലും സർക്കാരിന്റെ നിഷേധാത്മക നിലപാടിലും 20,000 ത്തോളം അധ്യാപകരാണ് വർഷങ്ങളായി നിയമനാംഗീകാരം കാത്ത് കഴിയുന്നത്.
Tags : Disabilities reservation Deepika DeepikaNewspaper BreakingNews NewsUpdate Headlines CurrentAffairs GlobalNews DailyNews InDepth NewsFlash Management System