19

ഇന്ത്യൻ ശാസ്ത്രീയ സംഗീതത്തിന്‍റെ ഈണത്തിൽ യുഎഇയുടെ ദേശീയഗാനം അലയടിച്ചപ്പോൾ അത് കേവലം ഒരു സംഗീത പ്രകടനത്തിനപ്പുറം രണ്ട് സംസ്കാരങ്ങളുടെ മനോഹരമായ സംഗമമായി മാറി.

യുഎഇയിൽ താമസിക്കുന്ന 13 ഇന്ത്യൻ വിദ്യാർഥികൾ മൽഹാർ എന്ന സാംസ്കാരിക കൂട്ടായ്മയുടെ നേതൃത്വത്തിൽ ഒരുക്കിയ ഈ വിരുന്ന് ഇപ്പോൾ സോഷ്യൽ മീഡിയയിൽ വലിയ ചർച്ചയായിരിക്കുകയാണ്.

പരമ്പരാഗത ഇന്ത്യൻ വേഷത്തിൽ, യുഎഇ പതാകയുടെ വർണങ്ങളിലുള്ള സ്കാർഫ് അണിഞ്ഞ് വിദ്യാർഥികൾ നടത്തിയ ഈ പ്രകടനം കാണുന്നവരുടെ മനം കവരുന്നതായിരുന്നു.

ഈ കൊച്ചു കലാകാരന്മാരുടെ അർപ്പണബോധവും കലയോടുള്ള പ്രതിബദ്ധതയും നേരിട്ട് തിരിച്ചറിഞ്ഞത് മറ്റാരുമല്ല, ദുബായ് കിരീടാവകാശിയും യുഎഇ ഉപപ്രധാനമന്ത്രിയുമായ ശൈഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂമാണ്.

തന്‍റെ ഇൻസ്റ്റാഗ്രാം സ്റ്റോറിയിലൂടെ അദ്ദേഹം കുട്ടികൾക്ക് ഹൃദയം നിറഞ്ഞ നന്ദി അറിയിച്ചു. സാംസ്കാരിക വൈവിധ്യങ്ങൾ ഒന്നിക്കുമ്പോൾ അസാധാരണമായ എന്തെങ്കിലും സംഭവിക്കുമെന്ന തിരിച്ചറിവ് കൂടിയായി ഈ പ്രകടനം.

റീമ മഹാജൻ എന്ന ഇൻസ്റ്റാഗ്രാം ഉപയോക്താവ് പങ്കുവെച്ച ഈ വീഡിയോ ഇതിനോടകം തന്നെ വലിയൊരു ജനക്കൂട്ടത്തെയാണ് ആകർഷിച്ചത്. തങ്ങളുടെ മക്കൾ ഇത്രയും മനോഹരമായി ഈ സംരംഭത്തിൽ പങ്കുചേർന്നതിന്‍റെ അഭിമാനത്തിലാണ് രക്ഷിതാക്കളും.

ഇന്ത്യൻ ശാസ്ത്രീയ സംഗീതത്തിന്‍റെ തനിമയും യുഎഇ ദേശീയഗാനത്തിന്‍റെ ഗാംഭീര്യവും ഒത്തുചേർന്നപ്പോൾ അതൊരു അപൂർവ്വ അനുഭവമായി മാറിയെന്ന് സംഗീത പ്രേമികൾ ഒരേ സ്വരത്തിൽ പറയുന്നു.

കലയിലൂടെ മനുഷ്യരെയും സംസ്കാരങ്ങളെയും ഇത്രയേറെ അടുപ്പിക്കാൻ കഴിയുമെന്നതിന്‍റെ ഏറ്റവും പുതിയ ഉദാഹരണമായി ഈ കുട്ടികളുടെ സംഗീത പ്രകടനം മാറിയിരിക്കുകയാണ്.

Tags : UAE Dubai India Unity Inspiration