സീനിയർ സിറ്റിസൺ ഫോറം വെള്ളരിക്കുണ്ട് യൂണിറ്റിന്റെ ആഭിമുഖ്യത്തിൽ ഡോ. പി.വി. നളിനിയെ ആദരിക്കുന്നു.
വെള്ളരിക്കുണ്ട്: 44 വർഷമായി വെള്ളരിക്കുണ്ടിന്റെ ഹൃദയസ്പന്ദനങ്ങൾ സ്റ്റെതസ്കോപ്പിലൂടെ തൊട്ടറിയുന്ന ഡോ. പി.വി. നളിനിക്ക് ഡോക്ടേഴ്സ് ദിനത്തിൽ നാടിന്റെ ആദരം. സീനിയർ സിറ്റിസൺ ഫോറം വെള്ളരിക്കുണ്ട് യൂണിറ്റിന്റെ ആഭിമുഖ്യത്തിലാണ് വെള്ളരിക്കുണ്ട് ടൗണിലെ ക്ലിനിക്കിലെത്തി ഡോക്ടറെ ആദരിച്ചത്.
കൊന്നക്കാട് സ്വദേശിനിയായ ഡോ. നളിനി 1980 ലാണ് കോഴിക്കോട് മെഡിക്കൽ കോളജിൽ നിന്ന് എംബിബിഎസ് പൂർത്തിയാക്കിയത്. തുടർന്ന് ആറുമാസം വീതം ശ്രീകണ്ഠപുരത്തും പരപ്പയിലും സേവനമനുഷ്ഠിച്ചിരുന്നു. അതുകഴിഞ്ഞ് ഈ കാലമത്രയും വെള്ളരിക്കുണ്ടിലായിരുന്നു സേവനം. മലയോരത്ത് ആവശ്യത്തിനു ഡോക്ടർമാരോ ചികിത്സാ സൗകര്യങ്ങളോ ഇല്ലാതിരുന്ന കാലത്ത് നളിനി ഡോക്ടറുടെ സേവനം ഏറെ വിലമതിക്കപ്പെട്ടിരുന്നു. മകൻ ഡോ. അനന്തുവും ഇപ്പോൾ ആതുരശുശ്രൂഷ രംഗത്തുണ്ട്.
സീനിയർ സിറ്റിസൺ ഫോറം ബളാൽ പഞ്ചായത്ത് കമ്മിറ്റി പ്രസിഡന്റ് പുഴക്കര കുഞ്ഞിക്കണ്ണൻ നായരുടെ നേതൃത്വത്തിൽ ഡോ. നളിനിയെ പൊന്നാടയണിയിച്ചു. വെള്ളരിക്കുണ്ട് യൂണിറ്റ് പ്രസിഡന്റ് ബേബി കുഞ്ചിറക്കാട്, കെ.സി. ആന്റണി, കെ.വി. ജോർജ്, അറക്കപറമ്പിൽ അപ്പച്ചൻ, കെ.പി. ചന്ദ്രൻ, ആന്റണി അത്താഴപാടം, രമണി, സുലോചന ചന്ദ്രൻ, തമ്പായി എന്നിവർ പ്രസംഗിച്ചു.
Tags : Nattuvishesham District news