ഷൊർണൂർ: മഴ പെയ്തു തുടങ്ങിയതോടെ ഷൊർണൂർ ആശീർവാദ് സിനിമ തീയറ്ററിനു പുറകിൽ രൂപപ്പെട്ട വെള്ളക്കെട്ട് പ്രദേശവാസികളുടെ ഉറക്കം കെടുത്തുന്നു. പ്രദേശത്തെ വീടുകളിൽ വെള്ളം കയറാനുള്ള സാധ്യതയാണ് ചൂണ്ടിക്കാണിക്കപ്പെടുന്നത്.
മാമ്പള്ളിപാടം പ്രദേശത്ത് നിന്നും വെള്ളം പിഡബ്ല്യുഡി റോഡിനടിയിലൂടെ ഒഴുകിയെത്തി റെയിൽവേയുടെ അഴുക്കുചാൽ വഴിയാണ് ഒഴുകിപ്പോകേണ്ടത്. ഈ പ്രദേശത്ത് ഇരുപതോളം വീടുകളുണ്ട്. ഈ വീട്ടുകാരെല്ലാം കനത്ത ആശങ്കയിലാണ്. മാമ്പള്ളിപാടത്ത് നിന്നും ഒഴുകി വരുന്ന വെള്ളം പിഡബ്ല്യൂഡി റോഡിനടിയിലൂടെയുള്ള ചാൽ അടഞ്ഞതിനാൽ തടസപ്പെട്ടു കിടക്കുകയാണ്.
മഴക്കാലപൂർവ ശുചീകരണം എന്ന പേരിൽ ലക്ഷക്കണക്കിനു രൂപയാണ് ഷൊർണൂർ നഗരസഭ ചെലവഴിക്കുന്നത്.എന്നാൽ ഇതുകൊണ്ട് പ്രയോജനമില്ലാത്ത സ്ഥിതിയാണ്. പ്രവൃത്തികൾ കാര്യക്ഷമമല്ലാത്തതാണ് കാരണം.
മഴക്കാല ശുചീകരണം നടത്തേണ്ടത് നഗരസഭയുടെ ഉത്തരവാദിത്തമാണ്. പിഡബ്ല്യുഡി ചാലിലേക്ക് വരുന്ന വെള്ളം നഗരസഭയിൽ നികുതി അടക്കുന്ന പ്രദേശത്തു നിന്നാണ്.