സ്വര്ണാഭരണം പോലീസ് സാന്നിധ്യത്തില് ഉടമയായ ഗ്രീഷ്മയ്ക്ക് അതുല്യ കൈമാറുന്നു.
വൈപ്പിന്: ഏഴു വയസുകാരിക്ക് വഴിയില്നിന്ന് കളഞ്ഞുകിട്ടിയ നാലു പവന്റെ സ്വര്ണാഭരണം പിതാവും കുട്ടിയും പോലീസ് മുഖേന ഉടമയ്ക്ക് കൈമാറി. കുഴുപ്പിള്ളി സെന്റ് ഗ്രിഗോറിയസ് യുപി സ്കൂളിലെ രണ്ടാം ക്ലാസ് വിദ്യാര്ഥിനിയായ അയ്യമ്പിള്ളി കാട്ടൂക്കാരന് അതുല്യയും പിതാവ് ലിജുവുമാണ് അതുല്യമായ സത്യസന്ധത കൊണ്ട് നാട്ടുകാര്ക്കിടയില് ശ്രദ്ധേയരായത്.
ബുധനാഴ്ചയാണ് കുട്ടിക്ക് മാല കളഞ്ഞുകിട്ടിയത്. വീട്ടിലെത്തി അതുല്യ മാല പിതാവിനെ ഏല്പ്പിച്ചു. പിതാവ് ഉടനെ തന്നെ മകളെയും കൂട്ടി മുനമ്പം സ്റ്റേഷനില് എത്തി മാല പോലീസിനെ ഏല്പിച്ചു.
പോലീസ് മാലയുടെ ഉടമയായ കുഴുപ്പിള്ളി തുണ്ടിപ്പുറം കാട്ടുക്കാരന് വീട്ടില് അഞ്ജിത്തിന്റെ ഭാര്യ ഗ്രീഷ്മയെ കണ്ടെത്തുകയും ഇന്നലെ സ്റ്റേഷനില് വച്ചു പോലീസിന്റെ സാന്നിധ്യത്തില് ആഭരണം ഗ്രീഷ്മയ്ക്ക് കൈമാറുകയുമായിരുന്നു.
Tags : Local News Nattuvishesham Ernakulam