വൈപ്പിൻ: ഓൺലൈൻ തട്ടിപ്പിനെതിരെ സംസ്ഥാന വ്യാപകമായി നടന്ന ഓപ്പറേഷൻ സൈ-ഹണ്ടിൻ്റെ ഭാഗമായി ഞാറക്കൽ പോലീസ് നടത്തിയ റെയ്ഡിൽ യുവാവ് അറസ്റ്റിൽ. നായരമ്പലം നെടുങ്ങാട് തണ്ടിയിൽ രോഹിത് ദാസ്(26) ആണ് അറസ്റ്റിൽ ആയത്.
നാഷണൽ സൈബർ ക്രൈം റിപ്പോർട്ടിംഗ് പോർട്ടലിൽ രജിസ്റ്റർ ചെയ്ത കേസുമായി ബന്ധപ്പെട്ട് ലഭിച്ച വിവരങ്ങളുടെ അടിസ്ഥാനത്തിൽ ഞാറക്കൽ എസ്ഐ നെൽസന്റെ നേതൃത്വത്തിൽ നടത്തിയ റെയ്ഡിലാണ് പ്രതിയെ അറസ്റ്റ് ചെയ്തത്.
ഓൺലൈൻ തട്ടിപ്പ് സംഘത്തിൻ്റെ കണ്ണിയാണ് ഇയാളെന്ന് പോലീസ് സംശയിക്കുന്നു. തട്ടിപ്പുകൾ നടത്തിയ വകയിൽ വിഹിതമായി വിവിധ അക്കൗണ്ടുകളിൽ നിന്നും ഇയാളുടെ നായരമ്പലം ബാങ്ക് ഓഫ് ഇന്ത്യയിലുള്ള അക്കൗണ്ടിലേക്ക് അഞ്ച് ലക്ഷം രൂപ എത്തുകയും ഇത് ഇയാൾ ചെക്ക് ഉപയോഗിച്ച് പിൻവലിക്കുകയും ചെയ്തിട്ടുണ്ട്.
വീട് റെയ്ഡ് ചെയ്ത പോലീസ് തെളിവിലേക്കായി ഇയാളുടെ മൊബൈൽ ഫോണും ബാങ്ക് രേഖകളും കസ്റ്റഡിയിൽ എടുത്തിട്ടുണ്ട്. ഞാറക്കൽ മജിസ്ട്രേറ്റ് കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
Tags : Operation CY Hunt Local News Ernakulam Nattuvishesham