തലയോലപ്പറമ്പ്: പ്രദേശവാസികളുടെ പ്രതിഷേധം കണക്കിലെടുക്കാതെ വെള്ളൂർ കെആർഎല്ലിലേക്ക് പ്രധാന കുടിവെള്ള പൈപ്പിൽനിന്നു ലൈൻ വലിച്ചതിൽ സിപിഎം വെള്ളൂർ ലോക്കൽ കമ്മിറ്റി പ്രതിഷേധവുമായി രംഗത്ത്. വെള്ളൂർ പഞ്ചായത്തിലെ പത്താം വാർഡിലെയും അഞ്ചാം വാർഡിലെയും വീടുകളിൽ കുടിവെള്ള ക്ഷാമം രൂക്ഷമായിരിക്കെയാണ് വാട്ടർ അഥോറിറ്റി ഉദ്യോഗസ്ഥർ പൈപ്പ് ലൈൻ വലിച്ചതെന്ന് സിപിഎം ആരോപിച്ചു.
കുടിവെള്ള ക്ഷാമം രൂക്ഷമാകുന്നത് കണക്കിലെടുത്ത് പ്രധാന കുടിവെള്ള പൈപ്പ് ലൈനിൽനിന്ന് വ്യാവസായികാവശ്യത്തിന് കണക്ഷൻ നൽകരുതെന്ന് ആവശ്യപ്പെട്ട് പഞ്ചായത്തും പ്രദേശവാസികളും പരാതിയും പ്രതിഷേധവും അറിയിച്ചിട്ടും രാത്രിയുടെ മറവിൽ കെആർഎല്ലിലേക്ക് സർവീസ് ലൈനിൽനിന്ന് വലിയ വ്യാസമുള്ള പൈപ്പുപയോഗിച്ച് കണക്ഷൻ നൽകിയിരിക്കുകയാണ്.
കെ ആർ എല്ലിൽ വ്യവസായ പദ്ധതികൾ കൂടുതൽ ആരംഭിക്കുമ്പോൾ കേരള റബർ ലിമിറ്റഡിന് ലക്ഷകണക്കിന് ലിറ്റർ വെള്ളം ആവശ്യമായി വരും. ഇത് പമ്പിംഗ് ലൈനിൽ നിന്ന് നേരിട്ട് നൽകിയാൽ പ്രദേശവാസികളെ ദോഷകരമായി ബാധിക്കില്ലെന്ന് സിപിഎം നേതൃത്വം പറയുന്നു.
ഗാർഹിക ഉപഭോക്താക്കളെ ബുദ്ധിമുട്ടിക്കുന്ന ഈ തീരുമാനം പിൻവലിക്കണമെന്ന് സിപിഐ എം വെള്ളൂർ ലോക്കൽ കമ്മിറ്റി ആവശ്യപ്പെട്ടു.
Tags : Local News Nattuvishesham Kottayam