ചങ്ങനാശേരി ബൈപാസില് ളായിക്കാട്ട് കക്കൂസ് മാലിന്യം തള്ളുന്ന ദൃശ്യം സിസി ടിവി കാമറയില് പതിഞ്ഞപ്പോള്.
ചങ്ങനാശേരി: ബൈപാസില് ളായിക്കാട്ട് വാഹനത്തിലെത്തിച്ചു കക്കൂസ് മാലിന്യം തള്ളുന്ന ദൃശ്യം സിസി ടിവി കാമറയില് കണ്ടെത്തി. സിസിടിവി ദൃശ്യങ്ങളും ഇതുസംബന്ധിച്ച പരാതിയും പോലീസിനു കൈമാറിയതായി മുനിസിപ്പല് ചെയര്മാന് ജോമി ജോസഫ് പറഞ്ഞു. ദൃശ്യം പരിശോധിച്ച് പ്രതികളെ പിടികൂടി കര്ശന നടപടി സ്വീകരിക്കുമെന്ന് ഡിവൈഎസ്പി എസ്. അഷാദ് ദീപികയോടു പറഞ്ഞു.
നഗരസഭയുടെ 19-ാംവാര്ഡില് ബൈപാസ് റോഡില് ളായിക്കാടിനു സമീപം 24ന് രാത്രി 11.33നും 32-ാംവാര്ഡില് പറാല് റോഡിനു സമീപം കഴിഞ്ഞ ഏഴിന് പുലര്ച്ചെ 12.15നും കെഎല്-10 എഎഫ്-3829 എന്ന രജിസ്റ്റര് നമ്പര് പതിപ്പിച്ച വാഹനത്തില് എത്തിച്ച് സെപ്റ്റിക് ടാങ്ക് മാലിന്യം നിക്ഷേപിച്ചതായി സിസി ടിവി കാമറയില് പതിഞ്ഞതായി ചൂണ്ടിക്കാട്ടി നഗരസഭ ക്ലീന്സിറ്റി മാനേജരാണ് പോലീസില് പരാതി സമര്പ്പിച്ചിരിക്കുന്നത്. പരിസര വാസികള്ക്കും യാത്രക്കാര്ക്കും ദുര്ഗന്ധവും ആരോഗ്യ പ്രശ്നങ്ങളും സൃഷ്ടിക്കുന്നതിനാല് ഇത്തരം ക്രിമിനല് സംഘങ്ങള്ക്കെതിരേ കര്ശന നടപടി സ്വീകരിക്കണമെന്നും പരാതിയില് ചൂണ്ടിക്കാട്ടിയിട്ടുണ്ട്.
മാലിന്യം തള്ളുന്നവരെയും ക്രിമിനല് സംഘങ്ങളെയും കണ്ടെത്താന് നഗരസഭ ബൈപാസ് റോഡില് ഒരു ലക്ഷത്തോളം രൂപ മുടക്കി വൈദ്യുതി പോസ്റ്റില് സ്ഥാപിച്ചിരിക്കുന്ന പോര്ട്ടബിള് സിസിടിവി കാമറയ്ക്ക് ചുവട്ടിലാണ് മാലിന്യം തള്ളല് തുടരുന്നതെന്ന് ഇന്നലെ ദീപിക റിപ്പോര്ട്ട് ചെയ്തിരുന്നു. ബൈപാസ് റോഡിന്റെ ഒന്നര കിലോമീറ്റര് ദൂരത്താണ് ഇരുവശങ്ങളിലും കക്കൂസ് മാലിന്യം വ്യാപകമായി ഒഴുക്കുന്നത്. ആലപ്പുഴ, ചേര്ത്തല, കായംകുളം, മാന്നാര് ഭാഗങ്ങളില് നിന്നുമുള്ള സംഘങ്ങളാണ് കക്കൂസ് മാലിന്യം ശേഖരിച്ച് ചങ്ങനാശേരി നഗരപരിധിയില് എത്തിച്ച് തള്ളുന്നത്.
Tags : Local News Nattuvishesham Kottayam