കാസര്ഗോഡ്: പോലീസ് സ്റ്റേഷനുകളുടെ ഭരണം എസ്ഐമാര്ക്ക് തിരികെ നല്കണമെന്ന സംസ്ഥാന പോലീസ് മേധാവിയുടെ ശിപാര്ശ സര്ക്കാര് അംഗീകരിച്ചാല് ജില്ലയിലെ 18 സ്റ്റേഷനുകളില് മൂന്നിടത്ത് ഒഴികെ സ്റ്റേഷന് ഹൗസ് ഓഫീസര്മാരായി എസ്ഐമാര് എത്തും. ഇതോടെ സ്റ്റേഷനുകളില് നിലവിലുള്ള സ്റ്റേഷന് ഓഫീസര്മാരായ ഇന്സ്പെക്ടര്മാരെ മറ്റിടങ്ങളിലേക്ക് മാറ്റും. എന്നാല്, സിഐ ഓഫീസുകളില് തന്നെ നിയമനം ഉറപ്പിക്കാന് ഇന്സ്പെക്ടര്മാരില് ഒരു വിഭാഗം ശ്രമം തുടങ്ങിയിട്ടുണ്ട്.
ജില്ലയില് ഏറ്റവുമധികം കേസുകള് രജിസ്റ്റര് ചെയ്യുന്ന മഞ്ചേശ്വരം, കാസര്ഗോഡ്, ഹൊസ്ദുര്ഗ് പോലീസ് സ്റ്റേഷനുകളുടെ ചുമതലകള് നിലവിലുള്ളതുപോലെ സ്റ്റേഷന് ഹൗസ് ഓഫീസര്മാരായ ഇന്സ്പെക്ടര്മാര്ക്ക് തന്നെയാകും. ബാക്കി സ്റ്റേഷനുകളിലാണ് എസ്ഐമാര്ക്ക് ചുമതല നല്കുന്നത്. കുമ്പള, വിദ്യാനഗര്, ആദൂര്, ബേക്കല്, രാജപുരം, നീലേശ്വരം, വെള്ളരിക്കുണ്ട് എന്നിവിടങ്ങളില് പുതുതായി സര്ക്കിള് ഓഫീസ് ഉണ്ടാകും. ഇതിനു പുറമേ ജില്ലാ പോലീസ് ആസ്ഥാനത്തെ കണ്ട്രോള് റൂമിന്റെ ചുമതല കൂടി ഇനിമുതല് ഇന്സ്പെക്ടര്ക്ക് ആയിരിക്കും. നിലവില് എസ്ഐക്ക് ആയിരുന്നു ചുമതല.
കാസര്ഗോഡ് സബ്ഡിവിഷനില് മഞ്ചേശ്വരം, കുമ്പള, ബദിയഡുക്ക, വനിത സ്റ്റേഷന്, കാസര്ഗോഡ് ട്രാഫിക് എന്ഫോഴ്സ്മെന്റ് യൂണിറ്റ് എന്നിവയാണുള്ളത്. ഇതില് കുമ്പള, ബദിയഡുക്ക സ്റ്റേഷനുകള് ചേര്ന്ന് കുമ്പളയിലും വിദ്യാനഗര് സ്റ്റേഷന്, വനിത സ്റ്റേഷന് എന്നിവ ചേര്ന്നു വിദ്യാനഗറിലും സര്ക്കിള് ഓഫീസുകള് വരും. കാസര്ഗോട്ടെ ട്രാഫിക് എന്ഫോഴ്സ്മെന്റ് യൂണിറ്റ് കാസര്ഗോഡ് സ്റ്റേഷനിലെ ഇന്സ്പെക്ടര്മാരുടെ കീഴിലാകും. ബേക്കല് സബ് ഡിവിഷനില് ആദൂര്, ബേഡകം, മേല്പറമ്പ്, ബേക്കല്, രാജപുരം, അമ്പലത്തറ സ്റ്റേഷനുകളാണുള്ളത്. ആദൂര് ര്ക്കിളില് ബേഡകവും ആദൂര് സ്റ്റേഷനുകളും ബേക്കല് സര്ക്കിളില് മേല്പറമ്പും ബേക്കലും രാജപുരം സര്ക്കിളില് അമ്പലത്തറയും രാജപുരം സ്റ്റേഷനുകളും ഉള്പ്പെടും.
കാഞ്ഞങ്ങാട് സബ്ഡിവിഷനില് ഹൊസ്ദുര്ഗ്, നീലേശ്വരം, ചന്തേര, ചീമേനി, ചിറ്റാരിക്കാല്, വെള്ളരിക്കുണ്ട്, ഹൊസ്ദുര്ഗ് കണ്ട്രോള് യൂണിറ്റ് എന്നിവ ഉള്പ്പെടും. ഇതില് നീലേശ്വരം സര്ക്കിളിന്റെ കീഴില് ചന്തേരയും നീലേശ്വരവും വെള്ളരിക്കുണ്ട് സര്ക്കിളില് ചീമേനിയും ചിറ്റാരിക്കാലും വെള്ളരിക്കുണ്ടും ഉള്പ്പെടും.
Tags : Nattuvishesham District news