ദി ഗ്രാന്ഡ് താജ് ഫെസ്റ്റ് പത്തനംതിട്ടയിലെ ശബരിമല ഇടത്താവളത്തില് നഗരസഭാ ചെയര്പേഴ്സണ് സിന്ധു അനില് ഉദ്ഘാടനം ചെയ്യുന്നു.
പത്തനംതിട്ട: ഭക്ഷണ പ്രേമികള്ക്കും കുടുംബങ്ങള്ക്കും വിനോദാസ്വാദകര്ക്കുമായി ആഘോഷ വേദിയൊരുക്കി ദി ഗ്രാന്ഡ് താജ് ഫെസ്റ്റിന് ശബരിമല ഇടത്താവളത്തില് തുടക്കമായി. നഗരസഭാ ചെയര്പേഴ്സണ് സിന്ധു അനില് ഉദ്ഘാടനം ചെയ്തു. ക്ഷേമകാര്യ സ്റ്റാന്ഡിംഗ് കമ്മിറ്റി ചെയര്മാന് അന്സാര് മുഹമ്മദ്, നഗരസഭാ പ്രതിപക്ഷനേതാവ് പി.കെ. അനീഷ്, വിദ്യാഭ്യാസ സ്റ്റാന്ഡിംഗ് കമ്മിറ്റി ചെയര്പേഴ്സണ് ശോഭാ കെ. മാത്യു, ആരോഗ്യ സ്റ്റാന്ഡിംഗ് കമ്മിറ്റി ചെയര്പേഴ്സണ് സജിനി മോഹൻ, കൗണ്സിലര് ജോയമ്മ സൈമണ് എന്നിവര് പങ്കെടുത്തു.
ഭക്ഷണം, വിനോദം, വ്യാപാരം, സാംസ്കാരിക പരിപാടികൾ, മാങ്കോ- ചക്ക ഫെസ്റ്റ് എന്നിവയെ ഒരുമിപ്പിക്കുന്ന ഈ മേള ജില്ലയിലെ ഏറ്റവും ശ്രദ്ധേയമായ ആഘോഷ പരിപാടികളിലൊന്നായിരിക്കുമെന്ന് വിയോണ് ഗ്ലോബല് പ്രൈവറ്റ് ലിമിറ്റഡ് എംഡി നിമില് പത്രസമ്മേളനത്തില് അറിയിച്ചു.
മേളയുടെ ഏറ്റവും വലിയ പ്രത്യേകതകളിലൊന്നായി താജ്മഹലിന്റെ അതിമനോഹരമായ ആര്ട്ടിഫിഷല് മോഡല് ഒരുക്കിയിട്ടുണ്ട്. ലോകപ്രശസ്ത സ്മാരകമായ താജ്മഹലിന്റെ ഭംഗിയും ശില്പവൈഭവവും പകര്ത്തുന്ന ഈ പ്രത്യേക സജ്ജീകരണം സന്ദര്ശകര്ക്ക് അപൂര്വ ദൃശ്യാനുഭവം സമ്മാനിക്കും. യഥാര്ഥ താജ്മഹലിന്റെ സൗന്ദര്യവും പ്രൗഢിയും അടുത്തറിയാനും അതിനൊപ്പം ചിത്രങ്ങള് പകര്ത്താനുമുള്ള അവസരവും സന്ദര്ശകര്ക്ക് ലഭിക്കും. വൈകുന്നേരങ്ങളില് പ്രത്യേക ലൈറ്റിംഗ് സംവിധാനങ്ങളോടെ താജ്മഹല് മോഡല് കൂടുതല് ആകര്ഷകമാകുമെന്ന് സംഘാടകര് അറിയിച്ചു.
കേരളത്തിന്റെ തനത് രുചികളും ഇന്ത്യയുടെ വിവിധ സംസ്ഥാനങ്ങളിലേയും അന്തര്ദേശീയ വിഭവങ്ങളിലേയും വൈവിധ്യമാര്ന്ന ഭക്ഷണങ്ങളും ഫുഡ്ഫെസ്റ്റ് വേദിയില് ആസ്വദിക്കാനാകും. പ്രമുഖ ഭക്ഷ്യ ബ്രാന്ഡുകളും റെസ്റ്റോറന്റുകളും അവരുടെ പ്രത്യേക വിഭവങ്ങളുമായി മേളയില് പങ്കെടുക്കും.
വളര്ത്തുമൃഗ പ്രേമികള്ക്കായി ഒരുക്കുന്ന പെറ്റ്സ് ഷോ മറ്റൊരു പ്രധാന ആകര്ഷണമാണ്. വിവിധ ഇനം നായ്ക്കൾ, പൂച്ചകൾ, പക്ഷികള് തുടങ്ങിയ വളര്ത്തുമൃഗങ്ങളുടെ പ്രദര്ശനം, ബോധവത്കരണ പരിപാടികൾ, വിദഗ്ധരുടെ നിര്ദേശങ്ങള് എന്നിവ ഇതിന്റെ ഭാഗമായി നടക്കും.
കുടുംബസമേതം ആസ്വദിക്കാവുന്ന വിനോദ പരിപാടികൾ, കുട്ടികള്ക്കായുള്ള പ്രത്യേക ആകര്ഷണങ്ങൾ, ഷോപ്പിംഗ് സ്റ്റാളുകൾ, കലാ-സാംസ്കാരിക പരിപാടികൾ, മത്സരങ്ങള് എന്നിവയും മേളയുടെ ഭാഗമായി ഒരുക്കിയിട്ടുണ്ടെന്ന് സംഘാടകര് പറഞ്ഞു.