വടക്കാഞ്ചേരി: വാഴാനി ഇറിഗേഷൻ പദ്ധതിയുടെ ഭാഗമായ ഇടതുകര കനാൽ ബണ്ട് മണലിത്തറ പടിഞ്ഞാറ്റുമുറിയിൽ ഇടിഞ്ഞുവീണു. കനത്ത മഴയ്ക്കിടെ കഴിഞ്ഞദിവസം രാവിലെയാണ് സംഭവം.
ബണ്ടിനോടുചേർന്ന് 2020ൽ തെക്കുംകര പഞ്ചായത്ത് നിർമിച്ച കനാൽ പാലവും ഭീഷണിയിലാണ്. പാലത്തിന്റെ അടിത്തറ തകർന്നുവീഴാനുള്ള സാധ്യതയേറെയാണ്. കണ്ടംകുളം ഭാഗത്ത് നിരവധിപേർ താമസിക്കുന്ന വഴിയിലാണ് കനാൽ പാലം. ബണ്ട് തകർന്നതോടെ നി രവധിപേരുടെ ഗതാഗതവും തടസപ്പെട്ടു. കഴിഞ്ഞമാസം വാഴാനി കുടിവെള്ളപദ്ധതിയുടെ പൈപ്പ് ലൈൻ സ്ഥാപിക്കാൻ മേഖലയിൽ മണ്ണുമാന്തിയന്ത്രമുപയോഗിച്ച് കുഴിയെടുത്തിരുന്നു.
ഇതിൽ വെള്ളമിറങ്ങിയാണ് ബണ്ട് തകർന്നതെന്ന സംശയവും നിലനിൽക്കുന്നു. എന്നാൽ സംഭവത്തിൽ ഭയപ്പെടേണ്ടതില്ലന്നും ഉടൻ വേണ്ട നടപടികൾ സ്വീകരിക്കുമെന്നും വാട്ടർ അഥോറിറ്റി അധികൃതർ അറിയിച്ചതായി വാഴാനി അസി. എജിനിയർ പി.എസ്. സാൽവിൻ അറിയിച്ചു.