കഴക്കൂട്ടം: പോത്തൻകോട് 20ഗ്രാം എംഡിഎംഎയുമായി രണ്ടുപേരെ പോലീസ് ഡാൻസാഫ് സംഘം പിടികൂടി. നാലാഞ്ചിറ കെജെകെ ആശുപത്രി റോഡിൽ താമസിക്കുന്ന എറണാകുളം കുമ്പളങ്ങി ചിറയിൽ ഹൗസിൽ അനന്തകൃഷ്ണൻ (20), ചെമ്പഴന്തി അണിയൂർ ഉദയശ്രീയിൽ അജീഷ് (19) എന്നിവരെ യാണ് അറസ്റ്റു ചെയ്തത്.
ഡാൻസാഫ് സംഘത്തിനു ലഭിച്ച രഹസ്യ വിവരത്തെ തുടർന്നു കൊയ്ത്തൂർക്കോണത്തു നടത്തിയ പരിശോധനയിലാണ് പ്രതികൾ പിടിയിലായത്. സംഘത്തിലെ പ്രധാനി പോലീസിനെ വെട്ടിച്ച് ഓടി രക്ഷപ്പെട്ടു. ഡാൻസാഫ് എസ്.ഐ. ഫയാസിന്റെ നേതൃത്വത്തിൽ പിടികൂടിയ പ്രതികളെ പോത്തൻകോട് പോലീസിനു കൈമാറി. പ്രതികളുടെ അറസ്റ്റ് രേഖപ്പെടുത്തി ഇന്നു കോടതിയിൽ ഹാജരാക്കും.