ജില്ലാ കോൺഗ്രസ് കമ്മിറ്റി സംഘടിപ്പിച്ച നേതൃക്യാമ്പ് ‘ജനായത്തം 2025’ പ്രതിപക്ഷ നേതാവ് വി.ഡി. സതീശൻ ഉദ്ഘാടനം ചെയ്യുന്നു.
ആലുവ: ജില്ലയിൽ മഹാഭൂരിപക്ഷത്തോടെ യുഡിഎഫ് തിരിച്ചുവരുമെന്നും മുഴുവൻ തദ്ദേശസ്വയംഭരണ സ്ഥാപനങ്ങളും വലിയ ഭൂരിപക്ഷത്തോടെ യുഡിഎഫ് തിരിച്ചുപിടിക്കുമെന്നും പ്രതിപക്ഷ നേതാവ് വി.ഡി. സതീശൻ പറഞ്ഞു. ജില്ലാ കോൺഗ്രസ് കമ്മിറ്റി എടത്തല ശാന്തിഗിരി ആശ്രമത്തിൽ സംഘടിപ്പിച്ച നേതൃക്യാമ്പ് ‘ജനായത്തം 2025’ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
സംസ്ഥാനത്തിന്റെ റവന്യൂ വരുമാനത്തിലേക്ക് ഏറ്റവും കൂടുതൽ സംഭാവന ചെയ്യുന്ന ജില്ലയോട് സംസ്ഥാന സർക്കാർ കടുത്ത അനീതിയാണ് കാണിച്ചത്. ഒരു പുതിയ പദ്ധതി പോലും ജില്ലയിൽ നടപ്പാക്കിയിട്ടില്ലെന്ന് പ്രതിപക്ഷ നേതാവ് ആരോപിച്ചു. ജില്ലയിലെ തദ്ദേശ സ്വയംഭരണ സ്ഥാപനങ്ങളെ സാമ്പത്തികമായി ദുർബലമാക്കി.
തീരമേഖലയിലും മലയോര മേഖലയിലുമുള്ള മനുഷ്യർ കടുത്ത അവഗണനയിലാണ്. വന്യജീവികൾ മലയോര കർഷകരെ വേട്ടയാടി കൊല്ലുമ്പോൾ സംസ്ഥാന സർക്കാർ നിസംഗത പുലർത്തുന്നു. വറുതിയിലായ തീരപ്രദേശത്തെ മനുഷ്യരെ സർക്കാർ കണ്ടില്ലെന്ന് നടിക്കുകയാണ്. സാധാരണക്കാരുടെ പ്രശ്നങ്ങളെ മനസിലാക്കാത്ത പിണറായി സർക്കാരിനെതിരായി അതിശക്തമായ ജനവികാരമുണ്ട്. തദ്ദേശസ്വയംഭരണ തെരഞ്ഞെടുപ്പിൽ ഈ ജനവികാരം കൃത്യമായി പ്രതിഫലിക്കുമെന്നും അദ്ദേഹം പറഞ്ഞു.
ഡിസിസി പ്രസിഡന്റ് മുഹമ്മദ് ഷിയാസ് അധ്യക്ഷനായിരുന്നു. കെപിസിസി വൈസ് പ്രസിഡന്റുമാരായ മാത്യു കുഴൽനാടൻ , വി.പി. സജീന്ദ്രൻ, ജയ്സൺ ജോസഫ് എന്നിവരും പ്രസംഗിച്ചു.
Tags : V. D. Satheesan Local News Nattuvishesham Pathanamthitta