നെടുമ്പാശേരി: ചെങ്ങമനാട് റോഡിൽ സ്കൂട്ടറുകൾ കൂട്ടിയിടിച്ച് ചുമട്ടുതൊഴിലാളി മരിച്ചു. തെക്കെ അടുവാശേരി മടത്തിപ്പറമ്പിൽ പരേതനായ കുട്ടപ്പന്റെ മകൻ എം.കെ. സുരേഷാണ് (58) മരിച്ചത്. സ്കൂട്ടർ യാത്രികരായ യുവാക്കൾക്ക് നിസാര പരിക്കേറ്റു. ചെങ്ങമനാട് സ്വദേശികളായ ശ്രീകുമാർ, അഭിനവ് എന്നിവർക്കാണ് പരിക്കേറ്റത്. സെന്റ് ആന്റണീസ് പള്ളിക്ക് സമീപം ശനിയാഴ്ച രാത്രി 7.40ഓടെയായിരുന്നു അപകടം.
അത്താണി ഭാഗത്ത് നിന്ന് വരുകയായിരുന്ന സുരേഷിന്റെ സ്കൂട്ടറും ചെങ്ങമനാട് നിന്ന് വരുകയായിരുന്ന യുവാക്കളുടെ സ്കൂട്ടറും തമ്മിലാണ് കൂട്ടിയിടിച്ചത്. സുരേഷിനെ ഉടൻ അങ്കമാലിയിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
സംസ്കാരം ഇന്ന് വീട്ടുവളപ്പിൽ. ഭാര്യ: ഷൈലജ. മക്കൾ: നിതീഷ്, നീതു. മരുമക്കൾ: അശ്വതി, ശ്രീജിത്ത്. ചെങ്ങമനാട് പോലീസ് സ്ഥലത്തെത്തി മേൽനടപടികൾ സ്വീകരിച്ചു. തെക്കെ അടുവാശേരിയിലെ സിഐടിയു ചുമട്ടുതൊഴിലാളിയായിരുന്നു സുരേഷ്.
Tags : Worker dies