നടി അന്സിബ
കൊച്ചി: തന്റെ പരാതിയില് നടി ലക്ഷ്മിപ്രിയയ്ക്കും യുട്യൂബ് ചാനലിനുമെതിരെ കേസെടുക്കാനുള്ള കോടതി ഉത്തരവ് പൊലിസ് അട്ടിമറിച്ചെന്നാരോപിച്ച് നടി അന്സിബ ഹസന് വീണ്ടും കോടതിയില്. എല്ലാ പ്രതികളെയും ഉള്പ്പെടുത്തി കേസ് രജിസ്റ്റര് ചെയ്യാന് മജിസ്ട്രേറ്റ് കോടതി ഉത്തരവുണ്ടായിരിക്കെ മാനനഷ്ടത്തിന് ലക്ഷ്മിപ്രിയക്കെതിരെ മാത്രമാണ് പാലാരിവട്ടം പൊലിസ് കേസെടുത്തിരിക്കുന്നതെന്ന് ചൂണ്ടിക്കാട്ടിയാണ് ഹര്ജി.
പാലാരിവട്ടം എസ്എച്ച്ഒ പി.എസ്. മഞ്ജിത്ലാല് കോടതി ഉത്തരവ് പൂര്ണമായി പാലിച്ചില്ലെന്നും അദ്ദേഹത്തിനെതിരേ നിയമനടപടിയെടുക്കണമെന്നും അന്വേഷണ ഉദ്യോഗസ്ഥനെ മാറ്റണമെന്നും എറണാകുളം ജുഡീഷ്യല് ഫസ്റ്റ് ക്ലാസ് മജിസ്ട്രേട്ട് കോടതിയില് അന്സിബ നല്കിയ ഹര്ജിയില് ആവശ്യപ്പെടുന്നു.
യുട്യൂബ് ചാനലിലൂടെ ലക്ഷ്മിപ്രിയ സ്ത്രീത്വത്തെ അപമാനിച്ചെന്ന അന്സിബയുടെ പരാതിയില് കഴമ്പില്ലെന്നും മാനനഷ്ട കേസിനപ്പുറം സാധ്യമല്ലെന്നുമുള്ള പൊലിസിന്റെ നിലപാട് ശരിവച്ചായിരുന്നു നേരെത്ത മജിസ്ട്രേറ്റ് കോടതി ഉത്തരവുണ്ടായത്. ഇതിനെതിരെ അന്സിബ ഹൈക്കോടതിയെ സമീപിച്ചതിനെ തുടര്ന്ന് വിഷയം പുനപരിശോധിക്കാന് നിര്ദേശമുണ്ടായി. തുടര്ന്നാണ് കേസെടുക്കാനുള്ള ഉത്തരവ് സെപ്റ്റംബര് 25ന് മജിസ്ട്രേറ്റ് കോടതി പുറപ്പെടുവിച്ചത്.
ഈ ഉത്തരവ് ലംഘിച്ച കാര്യം പരിശോധിക്കണമെന്നും എസ്എച്ച്ഒയില് നിന്ന് വിശദീകരണം തേടണമെന്നും കോടതി നിര്ദേശിച്ച പ്രകാരം എല്ലാ പ്രതികളെയും ഉള്പ്പെടുത്തി കൃത്യമായ വകുപ്പുകള് ചുമത്തി അന്വേഷണം നടത്താന് ഉത്തരവിടണമെന്നും ഹര്ജിയില് ആവശ്യപ്പെടുന്നു.
Tags : Ansiba court Deepika DeepikaNewspaper BreakingNews NewsUpdate Headlines CurrentAffairs DailyNews InDepth NewsFlash