30

തിരുവനന്തപുരം: കോണ്‍ഗ്രസിന്‍റെ പാര്‍ട്ടി ഓഫീസുകള്‍ക്ക് നേരെയുള്ള ആക്രമണം അനുവദിക്കില്ലെന്ന് ആഭ്യന്തരമന്ത്രി രമേശ് ചെന്നിത്തല. കുറ്റക്കാര്‍ക്കെതിരെ ശക്തമായ നടപടി സ്വീകരിക്കുമെന്നും അദ്ദേഹം പറഞ്ഞു.

പ്രതികളെ പൊലിസ് അന്വേഷിച്ച് കണ്ടുപിടിക്കും. ഡിസിസി ഓഫീസിന് നേരെ ഉണ്ടായ ആക്രമണത്തെ അപലപിക്കുന്നുവെന്നും അദ്ദേഹം വ്യക്തമാക്കി. ഡിസിസി ഓഫീസ് സന്ദര്‍ശിച്ച ശേഷം മാധ്യമപ്രവര്‍ത്തകരുടെ ചോദ്യങ്ങള്‍ക്ക് മറുപടിയായാണ് അദ്ദേഹം ഇക്കാര്യങ്ങള്‍ വ്യക്തമാക്കിയത്.

തിരുവനന്തപുരം ഡിസിസി ഓഫീസിന് നേരെയും നെയ്യാറ്റിന്‍കരയിലെ ആനാവൂര്‍ മണ്ഡലം കോണ്‍ഗ്രസ് കമ്മിറ്റി ഓഫീസിന് നേരെയുമാണ് ചൊവ്വാഴ്ച രാത്രിയില്‍ ആക്രമണം നടന്നത്. ആക്രമണത്തിന് പിന്നില്‍ ബിജെപിയാണെന്ന് കോണ്‍ഗ്രസ് ആരോപിച്ചു.

ബേക്കറി ജംഗ്ഷന് സമീപത്തെ ഡിസിസി ഓഫീസിന്‍റെ മുന്‍വശത്തെ ജനല്‍ഗ്ലാസാണ് കല്ലേറില്‍ തകര്‍ന്നത്. ആനാവൂരിലെ മണ്ഡലം കമ്മിറ്റി ഓഫീസിന് നേരെ തീവയ്പ്പ് ശ്രമം നടന്നു. ഓഫീസിന് മുന്നില്‍ സ്ഥാപിച്ചിരുന്ന ഫ്‌ളെക്‌സ് ബോര്‍ഡുകള്‍ കത്തി നശിച്ചു.

കേന്ദ്രമന്ത്രി അമിത് ഷാക്കെതിരെ യൂത്ത് കോണ്‍ഗ്രസ് പ്രവര്‍ത്തകര്‍ കരിങ്കൊടി പ്രതിഷേധം നടത്തിയതിനെ തുടര്‍ന്ന് പല സ്ഥലങ്ങളിലും കോണ്‍ഗ്രസ്- ബിജെപി പ്രവര്‍ത്തകര്‍ തമ്മില്‍ വാക്കേറ്റം തുടരുന്ന സാഹചര്യത്തിലാണ് കോണ്‍ഗ്രസ് ഓഫീസുകള്‍ക്ക് നേരെയുള്ള ആക്രമണം. പോലീസില്‍ പരാതി നല്‍കിയതിനെ തുടര്‍ന്ന് പോലീസ് സ്ഥലത്തെത്തി അന്വേഷണം ആരംഭിച്ചു. പ്രദേശത്തെ സിസിടിവി കാമറ ദൃശ്യങ്ങള്‍ പോലീസ് പരിശോധിച്ചു തുടങ്ങി.

Tags : Congress Attack DCC PartyOffice RameshChennithala