കൊച്ചി: നെടുമ്പാശേരി വാഹനാപകടത്തില്‍ പ്രതി സുഹൈല്‍ സജീവിനെതിരെ കുറ്റകരമായ നരഹത്യ ചുമത്തി. ബിഎന്‍എസ് 281, 105, 49 എന്ന വകുപ്പുകള്‍ പ്രതിക്കെതിരെ ചുമത്തി. ഞായറാഴ്ച പുലര്‍ച്ചെ രണ്ടോടെയായിരുന്നു അപകടം. കര്‍ണാടക സ്വദേശി ഇയ്യാസ് (21), പാലക്കാട് സ്വദേശി ഗോപിക (21), വയനാട് സ്വദേശി ദേവിക (21) എന്നിവരാണ് മരിച്ചത്.

സംഭവത്തില്‍ സുഹൈലിന്റെ മൂന്ന് സുഹൃത്തുക്കളെയും പ്രേരണ കുറ്റം ചുമത്തി അറസ്റ്റ് ചെയ്തിരുന്നു. പ്രതിയെ നിയമപ്രകാരം കോടതിയാണ് ബോസ്റ്റല്‍ സ്‌കൂളിലേക്ക് റിമാന്‍ഡ് ചെയ്തതെന്നും പൊലിസ് വ്യക്തമാക്കി. സംഭവത്തില്‍ ശക്തമായ നിയമനടപടി എടുക്കുമെന്നും ആഭ്യന്തര മന്ത്രി രമേശ് ചെന്നിത്തല പറഞ്ഞു. പ്രതിക്ക് ഏറ്റവും വലിയ ശിക്ഷ തന്നെ വാങ്ങി കൊടുക്കാനാണ് ശ്രമിക്കുന്നതെന്നും മന്ത്രി പറഞ്ഞു.

സുഹൈല്‍ സജീവിനെതിരെ എക്സൈസും കേസ് എടുത്തിട്ടുണ്ട്. പ്രായപൂര്‍ത്തിയാകാതെ മദ്യം വാങ്ങി ഉപയോഗിച്ചുവെന്ന കുറ്റത്തിനാണ് എക്‌സൈസ് കേസ് എടുത്തത്. രണ്ടു വര്‍ഷം തടവും 5,000 രൂപ പിഴയും ശിക്ഷ ലഭിക്കാവുന്ന കുറ്റമാണ് ചുമത്തിയിരിക്കുന്നത്. പ്രതിയെ വിശദമായി ചോദ്യം ചെയ്യാനാണ് എക്‌സൈസിന്റെയും പൊലിസിന്റെയും തീരുമാനം.

19 വയസുകാരനായ സുഹൈലിന് മദ്യം നല്‍കിയ എറണാകുളത്തെ മൂന്ന് ബാറുകള്‍ക്കെതിരെ ഇന്നലെ എക്സൈസ് കേസ് എടുത്തിരുന്നു. കേരള അബ്കാരി നിയമപ്രകാരം 23 വയസാണ് മദ്യം വാങ്ങുന്നതിനുള്ള പ്രായപരിധി. 23 വയസിന് താഴെയുള്ളവര്‍ക്ക് മദ്യം നല്‍കാന്‍ പാടില്ലെന്ന കേരള അബ്കാരി ആക്ട് പ്രകാരമാണ് ബാറുകള്‍ക്കെതിരെ കേസ് എടുത്തത്.

Tags : Homicide Charge SuhailSajeev Nedumbassery Accident