പ്രതീകാത്മക ചിത്രം
തേഞ്ഞിപ്പലം: കാലിക്കട്ട് സര്വകലാശാലയില് ഒക്ടോബര് ആറിന് നടക്കുന്ന ഡി ലിറ്റ് ബിരുദദാന ചടങ്ങില് വന്ദേമാതരം ആലപിക്കുന്നതിനെച്ചൊല്ലി വിവാദം. പൂര്ണഗാനം ആലപിക്കുന്നതിനു പകരം ഔദ്യോഗിക നടപടിക്രമപ്രകാരമുള്ള നിര്ദിഷ്ട രണ്ടു ചരണങ്ങള് മാത്രം ആലപിക്കുന്നുവെന്ന് അധികൃതര് ഉറപ്പുവരുത്തണമെന്ന് ആവശ്യപ്പെട്ട് സിപിഎം സിന്ഡിക്കേറ്റംഗങ്ങള് സര്വകാശാല രജിസ്ട്രാര്ക്ക് കത്ത് നല്കിയിരുന്നു.
ഇതിനു പിന്നാലെ ദേശീയഗീതം പൂര്ണമായും ആലപിക്കുന്നുണ്ടെന്ന് ഉറപ്പാക്കണമെന്ന് ആവശ്യപ്പെട്ട് ബിജെപി പ്രതിനിധിയായ സിന്ഡിക്കേറ്റംഗം എ.കെ. അനുരാജ് രംഗത്തുവന്നു. വൈസ് ചാന്സലര് ഇക്കാര്യം ഉറപ്പുവരുത്തണമെന്ന് ഇദ്ദേഹം ആവശ്യപ്പെട്ടു. പ്രിവന്ഷന് ഓഫ് ഇന്സള്ട്ട്സ് ടു നാഷണല് ഓണര് (അമൻഡ്മെന്റ്) ആക്റ്റ്, 2026 പ്രകാരം ദേശീയഗീതമായ വന്ദേമാതരത്തിന്റെ ആലാപനം തടയുന്നതു ശിക്ഷാര്ഹമാണെന്നാണു ബിജെപി സിന്ഡിക്കേറ്റംഗത്തിന്റെ വാദം.
ചടങ്ങിലെ മുഖ്യാതിഥി സര്വകലാശാലാ ചാന്സലറായ സംസ്ഥാന ഗവര്ണറാണെന്നതിനാല് കേന്ദ്ര ആഭ്യന്തര മന്ത്രാലയം നിര്ദേശിച്ചിട്ടുള്ള ഔദ്യോഗിക പ്രോട്ടോക്കോള് പാലിക്കണമെന്നും ദേശീയഗീതത്തിന്റെ എല്ലാ വരികളും ആലപിക്കണമെന്നുമാണ് ആവശ്യം. എന്നാല്, സര്വകലാശാലയുടെയും മലബാറിന്റെയും മഹത്തായ മതേതര പാരമ്പര്യം ഉയര്ത്തിപ്പിടിക്കുന്ന രീതിയില് ഡി ലിറ്റ് ബിരുദദാനച്ചടങ്ങ് നടത്തണമെന്നാണ് ഇടത് സിന്ഡിക്കറ്റംഗങ്ങളുടെ നിലപാട്.
Tags : D. Lit Convocation Controversy Vande Mataram Calicut University Deepika DeepikaNewspaper BreakingNews NewsUpdate Headlines CurrentAffairs DailyNews InDepth NewsFlash