4

കൊച്ചി: യുഡിഎഫ് അധികാരത്തില്‍ വരുമ്പോള്‍ പൂച്ച പെറ്റു കിടക്കുന്ന ഖജനാവ് ആയിരിക്കില്ലെന്ന് പ്രതിപക്ഷ നേതാവ് വി.ഡി. സതീശന്‍. സമ്പത്ത് വ്യവസ്ഥയെ ഉത്തേജിപ്പിക്കുന്ന നിരവധി പദ്ധതികളുണ്ട്. ഖജനാവില്‍ നിന്നും കോടി കണക്കിന് രൂപയുടെ ലീക്കേജ് ഉണ്ട്. അതെല്ലാം അടയ്ക്കും എന്നാണ് പ്രകടനപത്രിക പുറത്തിറക്കിയ ശേഷം സതീശന്‍ മാധ്യമങ്ങളോട് പറഞ്ഞത്.

എവിടെയെല്ലാം ഈ സര്‍ക്കാര്‍ പരാജയപ്പെട്ടോ അവിടെയെല്ലാം കേരളത്തെ കൈപിടിച്ചുയര്‍ത്തുന്ന പദ്ധതികളാണ് ചെയ്യുന്നത്. ഇതെല്ലാം നടപ്പാക്കാന്‍ പറ്റുമെന്ന പൂര്‍ണമായ വിശ്വാസം ഞങ്ങള്‍ക്കുണ്ട്.

പിന്നെ ടാക്‌സ് കിട്ടുന്നില്ലല്ലോ. ഒരു പവന്‍ സ്വര്‍ണത്തിന് 4000 രൂപ വില ഉണ്ടായിരുന്നപ്പോള്‍ കിട്ടിയത് 500 കോടി രൂപയാണ് ടാക്‌സ് ആയി കിട്ടിയിരുന്നത്. ഇപ്പോള്‍ പവന് ഒരു ലക്ഷം രൂപയ്ക്ക് മേലെ ആയപ്പോള്‍ 500 കോടിയുടെ 25 ഇരട്ടി കിട്ടേണ്ടതാണ്. പക്ഷെ ഇപ്പോഴും 500 കോടിയാണ് കിട്ടുന്നത്. എവിടെ പോകുന്നു? ഞങ്ങള്‍ നിയമസഭയില്‍ ചോദിച്ചപ്പോള്‍ ഇവര്‍ക്ക് മറുപടി ഉണ്ടായിരുന്നില്ലല്ലോ എന്ന് വിഡി. സതീശന്‍ പറഞ്ഞു.

അതേസമയം, ഇന്ദിര ഗ്യാരന്‍റി എന്ന പേരില്‍ ആറ് പ്രധാന ഉറപ്പുകളുമായാണ് യുഡിഎഫിന്‍റെ പ്രകടനപത്രിക. തെലുങ്കാന മുഖ്യമന്ത്രി രേവന്ത് റെഡിയാണ് കൊച്ചിയില്‍ പത്രിക പുറത്തിറക്കിയത്.

സ്ത്രീകള്‍ക്ക് കെഎസ്ആര്‍ടിസി ബസില്‍ സൗജന്യ യാത്ര, കോളജ് വിദ്യാര്‍ഥിനികള്‍ക്ക് 1000 രൂപ പ്രതിമാസ ധനസഹായം, 3000 രൂപ ക്ഷേമപെന്‍ഷന്‍, റബറിന് 300 രൂപ താങ്ങുവില, എല്ലാ കുടുംബങ്ങള്‍ക്കും 25 ലക്ഷം രൂപ വരെ പരിരക്ഷ ഉറപ്പാക്കുന്ന ഉമ്മന്‍ ചാണ്ടി ആരോഗ്യ ഇന്‍ഷുറന്‍സ്, യുവജനങ്ങള്‍ക്ക് ബിസിനസ് ആരംഭിക്കുന്നതിന് അഞ്ച് ലക്ഷം രൂപാവരെ പലിശരഹിത വായ്പ, മുതിര്‍ന്ന പൗരന്മാരുടെ ക്ഷേമത്തിനായി പ്രത്യേക വകുപ്പ് തുടങ്ങി വമ്പന്‍ പ്രഖ്യാപനങ്ങളടങ്ങുന്നതാണ് പ്രകടന പത്രിക.

Tags : UDF V.D. Satheesan crore