19

വിപിൻ ദാസിന്‍റെ രചനയിൽ പുറത്തിറങ്ങിയ 'വാഴ' എന്ന ചലച്ചിത്ര പരമ്പരയിലെ മൂന്നാം ഭാഗം ഔദ്യോഗികമായി പ്രഖ്യാപിച്ചു. ആദ്യ രണ്ട് ഭാഗങ്ങളും ആൺകുട്ടികളുടെ സൗഹൃദത്തിനും ജീവിതത്തിനും പ്രാധാന്യം നൽകിയപ്പോൾ, മൂന്നാം ഭാഗം പെൺകുട്ടികളുടെ കഥയാണ് പ്രമേയമാക്കുന്നത്.

'ബയോപിക് ഓഫ് എ ബില്യൺ ഗേൾസ്' എന്ന ടാഗ്‌ലൈനോടെ എത്തുന്ന ഈ ചിത്രം വിശ്വൻ ശ്രീജിത്താണ് സംവിധാനം ചെയ്യുന്നത്. മുൻ ഭാഗങ്ങൾ ഓരോന്നും വ്യത്യസ്ത സംവിധായകരാണ് കൈകാര്യം ചെയ്തതെന്ന പ്രത്യേകത ഈ ചിത്രത്തിലും തുടരുന്നു.

വിപിൻ ദാസിന്‍റെ സംവിധാന സഹായിയായിരുന്ന വിശ്വൻ ശ്രീജിത്ത് ഈ ചിത്രത്തിലൂടെ സ്വതന്ത്ര സംവിധായകനാകുന്നു. വിപിൻ ദാസ്, ഹാരിസ് ദേശം, പി.ബി. അനീഷ്, സാഹു ഗരപതി, ആദർശ് നാരായൺ എന്നിവരും ഐക്കൺ സ്റ്റുഡിയോസും ചേർന്നാണ് ചിത്രം നിർമ്മിക്കുന്നത്.

അങ്കിത് മേനോൻ സംഗീതവും 'സർക്കാസനം' പോസ്റ്റർ ഡിസൈനും നിർവ്വഹിക്കുന്നു. ഇമാജിൻ സിനിമാസ്, ഷൈൻ സ്ക്രീൻസ്, ഡബ്ല്യു.ബി.ടി.എസ് പ്രൊഡക്ഷൻസ്, സിഗ്നേച്ചർ സ്റ്റുഡിയോസ് എന്നീ ബാനറുകളിലാണ് ചിത്രം ഒരുങ്ങുന്നത്.

പുതിയ പ്രതിഭകളെ സിനിമാ ലോകത്തേക്ക് കൊണ്ടുവരിക എന്ന ലക്ഷ്യത്തോടെയാണ് ഈ ഫ്രാഞ്ചൈസിക്ക് തുടക്കം കുറിച്ചതെന്നും വരും ഭാഗങ്ങളിലും ഈ രീതി തുടരുമെന്നും വിപിൻ ദാസ് ഇൻസ്റ്റാഗ്രാമിലൂടെ വ്യക്തമാക്കി.

അഭിനയം, സംവിധാനം, സംഗീതം തുടങ്ങി സിനിമയുടെ വിവിധ മേഖലകളിലേക്ക് കടന്നുവരാൻ ആഗ്രഹിക്കുന്ന പുതുമുഖങ്ങൾക്കായി ഈ പ്രോജക്റ്റ് എന്നും വാതിൽ തുറന്നിട്ടിരിക്കുമെന്നും അദ്ദേഹം കൂട്ടിച്ചേർത്തു.

ചിത്രത്തിന്‍റെ തിരക്കഥ പൂർത്തിയായ ശേഷം മാത്രമേ അഭിനേതാക്കൾക്കായുള്ള ഓഡിഷൻ നടക്കുകയുള്ളൂ. അതിനാൽ ഇപ്പോൾ താല്പര്യമുള്ളവർ പോർട്ട്ഫോളിയോകൾ അയക്കേണ്ടതില്ലെന്നും അടുത്ത വർഷത്തോടെ സിനിമയുടെ ചിത്രീകരണം ആരംഭിക്കുമെന്നും അണിയറപ്രവർത്തകർ അറിയിച്ചു.

Tags : Vazha3 VazhaMovie VipinDas BiopicOfABillionGirls MalayalamCinema