ന്യൂഡൽഹി: എൻഡിഎ അധികാരത്തിൽ എത്തിയ ശേഷം നേരിടുന്ന ഏറ്റവും വലിയ അഗ്നിപരീക്ഷയ്ക്കു മുന്നിലാണ് ഇപ്പോൾ ബിജെപി നേതൃത്വം. ചോദ്യപേപ്പർ ചോർച്ച, വോട്ടുചോരി തുടങ്ങിയ വിഷയങ്ങൾ ഉന്നയിച്ച് പ്രതിപക്ഷവും സിജെപി പോലുള്ള കൂട്ടായ്മകളും തുടങ്ങിയ പ്രതിഷേധങ്ങൾ വലിയ ജനകീയ പ്രക്ഷോഭങ്ങളായി വളർന്നതാണ് ബിജെപി നേതൃത്വത്തെ അസ്വസ്ഥതപ്പെടുത്തുന്നത്. മാത്രമല്ല, മുൻ കാലത്തെങ്ങും ദൃശ്യമല്ലാത്ത രീതിയിൽ പ്രതിപക്ഷ നിരയിൽ ഐക്യം രൂപപ്പെട്ടിരിക്കുന്നുവെന്നതും സർക്കാരിനു തലവേദനയാണ്.

കുന്തമുന വിദ്യാർഥികൾ

സമരത്തിന്‍റെ കുന്തമുന വിദ്യാർഥികളും ചെറുപ്പക്കാരുമാണെന്നതാണ് ബിജെപിയെ കുഴക്കുന്ന മറ്റൊരു കാര്യം. വിദ്യാർഥിസമരത്തെ ഒരു പരിധിയിൽ കൂടുതൽ എതിർക്കുന്നതും ബലപ്രയോഗം നടത്തുന്നതും രാജ്യത്തെ യുവജനങ്ങളെ തങ്ങൾക്ക് എതിരാക്കുമെന്ന പേടിയും ബിജെപി നേതൃത്വത്തിനുണ്ട്. വിദ്യാഭ്യാസമന്ത്രി ധർമേന്ദ്ര പ്രധാനെതിരേ നടന്ന സിജെപി സമരത്തിൽ കീഴടങ്ങേണ്ടി വന്നതിന്‍റെ ക്ഷീണം മാറും മുന്പേയാണ് പുതിയ പ്രക്ഷോഭത്തെ കൈകാര്യംചെയ്യേണ്ടി വന്നിരിക്കുന്നത്. സമരത്തെ ബലപ്രയോഗംകൊണ്ട് അടിച്ചമർത്തുന്നത് ഒരു പരിധി കഴിഞ്ഞാൽ പ്രയോജനം ചെയ്യില്ലെന്നു സിജെപി സമരത്തിലൂടെ വ്യക്തമായത്. അതുപോലെ കൈപൊള്ളിക്കാൻ ബിജെപി നേതൃത്വം ഇനി തയാറാകുമോയെന്ന് കണ്ടറിയണം.

ഇപ്പോൾ എരിഞ്ഞ് എരിഞ്ഞ് നിൽക്കുന്ന ജനകീയ പ്രതിഷേധം ഏതെങ്കിലുമൊരു ഘട്ടത്തിൽ വീണ്ടും അതിശക്തമായി വളരാനുള്ള എല്ലാ സാധ്യതകളും ബിജെപി മുന്നിൽ കാണുന്നുണ്ട്. വിളിച്ചാൽ വിളിപ്പുറത്ത് ആളെ എത്തിക്കാൻ മാത്രം രാഹുൽ ഗാന്ധിയും പ്രതിപക്ഷവും ശക്തിപ്പെട്ടിരിക്കുന്നു എന്നതാണ് ബിജെപിയെ അലോസരപ്പെടുത്തുന്ന മറ്റൊരു ഘടകം. ഒറ്റ ദിവസത്തെ ആഹ്വാനത്തിലൂടെയാണ് സുപ്രീം കോടതി മാർച്ചിന് അത്രയും ജനങ്ങൾ ഡൽഹിയിലെത്തിക്കാൻ പ്രതിപക്ഷത്തിനു കഴിഞ്ഞത്.

മിന്നൽ സമരങ്ങൾ

ജന്തർ മന്തറിനെ സമരവേദി അല്ലാതാക്കി മാറ്റിയതും പുതിയ സമരവിഷയമായി പ്രതിപക്ഷം ഏറ്റെടുത്തത് സർക്കാരിനു തിരിച്ചടിയായിട്ടുണ്ട്. ജന്തർ മന്തർ ലക്ഷ്യമാക്കി കൂടുതൽ സമരങ്ങൾക്ക് ഇതു വഴിതെളിക്കാനാണ് സാധ്യത. എത്രനാൾ നഗരത്തെ ഇങ്ങനെ ബാരിക്കേഡുകളാൽ പൊതിഞ്ഞുകെട്ടി സൂക്ഷിക്കാനാകുമെന്നതാണ് സർക്കാരിനു മുന്നിലെ ഒരു പ്രധാന തലവേദന. എല്ലാ ദിവസവുംതന്നെ തലസ്ഥാനത്തെ തെരുവുകളിൽ സമരം നടക്കുകയാണ്.
ഇതോടെ പോലീസ് സേനയും സമ്മർദത്തിലായിരിക്കുന്നു. മുൻകൂട്ടി അറിയിച്ചുള്ള സമരരീതികൾ പാടെ ഉപേക്ഷിച്ച് മിന്നൽ സമരങ്ങളാണ് പലപ്പോഴും ഇപ്പോൾ ആയുധം. രാഹുൽ ഗാന്ധിപോലും ഇത്തരം സമരരീതികളാണ് ഇപ്പോൾ പ്രയോഗിക്കുന്നത്. ഇതു പോലീസിനെ കൂടുതൽ വലയ്ക്കുകയാണ്. പലപ്പോഴും സമരം തുടങ്ങിക്കഴിയുമ്പോഴാണ് പോലീസ് പോലും അത് അറിയുന്നത്.

സഖ്യകക്ഷികൾക്കും മൗനം

രണ്ടു നേതാക്കളെ ജയിലിൽ അടച്ചതോടെ സിജെപി വർധിത വീര്യത്തോടെ സമരം ചെയ്യുമെന്നു ഇതിനകം സിജെപി പ്രഖ്യാപിച്ചതും അന്തരീക്ഷത്തെ കൂടുതൽ ചൂടുപിടിപ്പിച്ചിട്ടുണ്ട്.
ഗ്യാനേഷ്കുമാറിനെ പരമാവധി സംരക്ഷിക്കാനുള്ള ശ്രമമാണ് ബിജെപി നടത്തുന്നതെങ്കിലും എൻഡിഎയിലെ സഖ്യകക്ഷികളൊന്നും ഗ്യാനേഷിനു കവചമൊരുക്കാൻ കാര്യമായി രംഗത്തില്ല എന്നതാണ് ബിജെപിയെ ഈ വിഷയത്തിൽ ഒറ്റപ്പെടുത്തുന്ന മറ്റൊരു ഘടകം. സർക്കാരിനെ വലിയ പ്രതിസന്ധിയുടെ മുന്നിലെത്തിച്ചിരിക്കുന്ന വിഷയത്തിൽ ഇനി എങ്ങനെ നീങ്ങണമെന്നതിൽ തിരക്കിട്ട ആലോചനയാണ് ബിജെപിയിൽ നടക്കുന്നത്. പ്രതിപക്ഷത്തെ ഏതെങ്കിലും രീതിയിൽ ഭിന്നിപ്പിക്കുക എന്നതായിരുന്നു ബിജെപിയുടെ പ്രാഥമിക തന്ത്രം.

എന്നാൽ, മാറിയ അന്തരീക്ഷത്തിൽ അത് എത്ര മാത്രം ഫലവത്താകുമെന്ന ആശങ്ക പലർക്കുമുണ്ട്. രണ്ടു ധ്രുവങ്ങളിൽനിന്നു സമരം ചെയ്തിരുന്ന കോൺഗ്രസും സിജെപിയും തമ്മിൽ ഗ്യാനേഷ്കുമാറിനെ എതിർക്കുന്ന കാര്യത്തിൽ തങ്ങൾ ഒറ്റക്കെട്ടാണ് കഴിഞ്ഞ ദിവസം പ്രഖ്യാപിച്ചതും ഈ നീക്കത്തെ ദുർബലപ്പെടുത്തുന്നതാണ്. എതിർപക്ഷത്ത് ആകെ വേറിട്ടുനിൽക്കുന്നത് ഡിഎംകെയും എഎപിയുമാണ്. എന്നാൽ, അവർ പോലും ഗ്യാനേഷ്കുമാർ രാജിവയ്ക്കണം എന്ന നിലപാടാണ് സ്വീകരിച്ചിരിക്കുന്നത്. അതുകൊണ്ടുതന്നെ പ്രതിപക്ഷത്തെ ഒറ്റയ്ക്കു നിന്നു പ്രതിരോധിക്കേണ്ട വലിയ കടമ്പയാണ് ബിജെപിക്കും കേന്ദ്രസർക്കാരിനും മുന്നിൽ രൂപപ്പെട്ടിരിക്കുന്നത്. കേസ് സുപ്രീം കോടതിക്കു മുന്നിലെത്തിയിരിക്കുന്ന സാഹചര്യത്തിൽ ഗ്യാനേഷ് കുമാറിനെതിരേ ഏതെങ്കിലും തരത്തിൽ കോടതിയിൽനിന്നു പരാമർശമുണ്ടാൽ സമരം കത്തിപ്പിടിക്കുമെന്ന ആശങ്കയും ബിജെപി നേതൃത്വത്തിനുണ്ട്.

Tags : BJP ElectionCommission Protest RahulGandhi Congress Students Deepika DeepikaNewspaper BreakingNews NewsUpdate Headlines CurrentAffairs