Kerala
പാലക്കാട്: തീയേറ്ററിൽ കുടുംബത്തോടൊപ്പം സിനിമ കാണാനെത്തിയ 13 വയസുകാരിക്ക് നേരെ ലൈംഗികാതിക്രമം. വല്ലപ്പുഴ സ്വദേശി കെ.പി. ജാഫർ ആണ് പിടിയിലായത്.
ശനിയാഴ്ച വൈകുന്നേരത്തോടെ ഷൊർണൂർ നഗരത്തിലെ തീയേറ്ററിലായിരുന്നു സംഭവം. പെൺകുട്ടി തീയേറ്ററിലെത്തിയതുമുതൽ ഇയാൾ അപമര്യാദയായി പെരുമാറുകയും ശല്യപ്പെടുത്തുകയും ചെയ്തിരുന്നു. പെൺകുട്ടിയുടെ സ്വകാര്യഭാഗത്ത് സ്പർശിച്ചതായും പരാതിയിൽ പറയുന്നു.
പെൺകുട്ടിതന്നെ നൽകിയ പരാതിയിൽ ഷൊർണൂർ പൊലിസ് ജാഫറിനെ കസ്റ്റഡിയിലെടുക്കുകയായിരുന്നു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. പ്രതിക്കെതിരെ പോക്സോ ആക്ട് പ്രകാരമാണ് കേസെടുത്തിരിക്കുന്നത്.
District News
മൂവാറ്റുപുഴ: മുത്തശ്ശിക്കൊപ്പം നടന്നു പോകുകയായിരുന്ന ഒമ്പതു വയസുകാരി കാറിടിച്ച് മരിച്ചു.പട്ടിമറ്റം കണ്ണല പുത്തൻപുരയിൽ രാജേഷിന്റെയും രേഷ്മയുടെയും മകൾ റെയ ആണ് മരിച്ചത്. കാർ നിയന്ത്രണംവിട്ട് സ്കൂട്ടറുകളിലും കാൽനട യാത്രക്കാരുടെ ഇടയിലേക്കും ഇടിച്ചുകയറുകയായിരുന്നു.
അപകടത്തിൽ റെയയുടെ മുത്തശ്ശി പാറപ്പുറത്ത് ഓമനക്കുട്ടന്റെ ഭാര്യ രേഖ (55), സ്കൂട്ടർ യാത്രികനായ തൊടുപുഴ വെള്ളറയ്ക്കൽ ബിജോ (37) എന്നിവർക്ക് ഗുരുതര പരിക്കേറ്റു. ഇരുവരെയും മൂവാറ്റുപുഴ നിർമല മെഡിക്കൽ സെന്ററിൽ പ്രവേശിപ്പിച്ചു.
ഇന്നലെ രാവിലെ 11ഓടെ മൂവാറ്റുപുഴ - തൊടുപുഴ റോഡിൽ നിർമല കോളജിന് സമീപം ഹോസ്റ്റൽ ജംഗ്ഷലായിരുന്നു അപകടം.നൃത്തപഠനം കഴിഞ്ഞ് മുത്തശ്ശിക്കൊപ്പം തിരികെ വീട്ടിലേക്ക് പോകുന്നതിനായി റോഡ് മുറിച്ചുകടക്കവെ, പാഞ്ഞെത്തിയ കാർ എതിരെ വന്ന സ്കൂട്ടറിലും റോഡരികിൽ പാർക്ക് ചെയ്തിരുന്ന മറ്റൊരു സ്കൂട്ടറിലും ഇടിച്ച ശേഷം റെയയെയും മുത്തശ്ശിയെയും ഇടിക്കുകയായിരുന്നു. തൊടുപുഴ സ്വദേശിയുടേതാണ് അപകടമുണ്ടാക്കിയ കാർ.
പട്ടിമറ്റം സെന്റ് മേരീസ് സ്കൂളിലെ നാലാം ക്ലാസ് വിദ്യാർഥിനിയായിരുന്നു റെയ. പിതാവ് രാജേഷ് ദുബായിലാണ്. അമ്മ: രേഷ്മ അസ്കോ ലാബിലെ ഫാർമസിസ്റ്റാണ്.
Kerala
ആലുവ: എട്ട് വയസുകാരിയെ ലൈംഗികമായി ഉപദ്രവിച്ച കേസിൽ പ്രതിക്ക് അഞ്ച് വർഷം തടവും അമ്പതിനായിരം രൂപ പിഴയും ശിക്ഷ. എടത്തല പൂക്കാട്ടുമുഗൾ പരീക്കാട്ട് വീട്ടിൽ ജുനൈദി(26)നെയാണ് ആലുവ അതിവേഗ സ്പെഷ്യൽ കോടതി ശിക്ഷിച്ചത്.
എടത്തല പൊലിസ് സ്റ്റേഷനിൽ 2024 മേയ് മാസത്തിൽ രജിസ്റ്റർ ചെയ്ത പോക്സോ കേസിലാണ് വിധി. ഗ്രൗണ്ടിൽ കളിക്കാൻ പോയ പെൺകുട്ടിയെ ആൾതാമസമില്ലാത്ത വീട്ടിലേക്ക് കൂട്ടിക്കൊണ്ടുപോയി ഉപദ്രവിക്കുകയായിരുന്നു. പ്രോസിക്യൂഷനു വേണ്ടി സ്പെഷ്യൽ പബ്ലിക് പ്രോസിക്യൂട്ടർ അഡ്വ. പി.ജി.യമുന ഹാജരായി.
National
ലക്നോ: ഉത്തർപ്രദേശിലെ പ്രയാഗ്രാജിൽ സ്കൂൾ വാൻ കയറി എട്ടുവയസുകാരി മരിച്ചു. മൂന്നാം ക്ലാസ് വിദ്യാർഥി തസ്വനി ഉദയാൻഷി പഥക് ആണ് മരിച്ചത്. സംഭവത്തിൽ വാൻ ഡ്രൈവർ സത്യാപാലിനെ പൊലിസ് കസ്റ്റഡിയിലെടുത്തിട്ടുണ്ട്.
സ്കൂൾ വാനിൽ വീട്ടിലെത്തിയ തസ്വനി വാഹനത്തിൽ നിന്ന് പുറത്തിറങ്ങിയപ്പോൾ സ്കൂൾ ബാഗിന്റെ സ്ട്രാപ്പ് വാനിന്റെ കതക്കിൽ കുടുങ്ങുകയായിരുന്നു. കുട്ടി സുരക്ഷിതയായി മാറിയെന്ന് ഉറപ്പുവരുത്താതെ ഡ്രൈവർ വാൻ പിന്നോട്ടെടുത്തതിനെത്തുടർന്ന് തസ്വനി വാനിനും വീടിന്റെ മതിലിനും ഇടയിൽ കുടുങ്ങിപ്പോവുകയായിരുന്നു. വാനിലുണ്ടായിരുന്ന മറ്റ് കുട്ടികളുടെ നിലവിളി കേട്ട് ഓടിയെത്തിയ നാട്ടുകാരും അയൽക്കാരും ചേർന്ന് കുട്ടിയെ പുറത്തെടുത്ത് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
മിർസാപൂർ സ്വദേശികളായ കുടുംബം പ്രയാഗ്രാജിലെ നെയ്നിയിലാണ് താമസിച്ച് വരുന്നത്. മാതാപിതാക്കൾ ഡൽഹിയിലും ഗോരഖ്പൂരിലുമായി ജോലി ചെയ്യുന്നതിനാൽ തസ്വനി മുത്തശനും മുത്തശിക്കുമൊപ്പമാണ് താമസിച്ചിരുന്നത്.
സംഭവത്തെ തുടർന്ന് സ്ഥലത്ത് പ്രതിഷേധവുമായി തടിച്ചുകൂടിയ നാട്ടുകാർ വാൻ ഡ്രൈവറെ മർദിക്കുകയും പിന്നീട് പൊലിസിൽ ഏൽപ്പിക്കുകയും ചെയ്തു. തസ്വനിയുടെ മാതാപിതാക്കൾ എത്തിയ ശേഷം തുടർനടപടികളും പോസ്റ്റ്മോർട്ടവും നടക്കുമെന്ന് പൊലിസ് അറിയിച്ചു. അതേസമയം, കുട്ടികളെ കൊണ്ടുപോകുന്ന സ്കൂൾ വാനുകളിൽ നിർബന്ധമായും ഉണ്ടായിരിക്കേണ്ട സഹായിയുടെ സേവനം ഈ വാനിൽ ഉണ്ടായിരുന്നില്ലെന്ന് അധികൃതർ അറിയിച്ചു.
National
മുംബൈ: മുംബൈയിലെ ഗൊരേഗാവിൽ പത്തുവയസുള്ള പെൺകുട്ടി അതേഫ്ളാറ്റിൽ കഴിയുന്ന കുടുംബത്തിലെ ഒന്നരവയസുള്ള കുട്ടിയെ ആറാംനിലയിൽനിന്ന് എറിഞ്ഞുകൊന്നു.
ബുധനാഴ്ച രാത്രി ഒന്പതുമണിയോടെയുണ്ടായ സംഭവത്തിൽ പെൺകുട്ടിയെയും അമ്മയെയും പൊലിസ് കസ്റ്റഡിയിലെടുത്തു. കുഞ്ഞിനെആറാം നിലയിൽ നിന്ന് എറിഞ്ഞ ശേഷം പെൺകുട്ടി മറുഭാഗത്തേക്ക് ഓടുന്നതിന്റെ സിസിടിവി ദൃശ്യങ്ങൾ അന്വേഷണസംഘത്തിന് ലഭിച്ചിട്ടുണ്ട്.
പൂച്ചയുടെ ഉടമസ്ഥാവകാശം സംബന്ധിച്ച് ഇരുകുടുംബങ്ങളും തമ്മിൽ അടുത്തിടെ തർക്കമുണ്ടായതായി പറയപ്പെടുന്നു. അതേസമയം പത്തുവയസുകാരിക്കു മാനസിക ആരോഗ്യപ്രശ്നങ്ങൾ ഉള്ളതായും പറയപ്പെടുന്നു.
Kerala
കണ്ണൂർ: പാനുണ്ടയിൽ പൊതുശുചീകരണത്തിനിടെ ആറു വയസുകാരി മരിച്ചു. കുളത്തിന്റെ പടിക്കെട്ടിൽ വീണ് മരിക്കുകയായിരുന്നു. രണ്ടാം ക്ലാസ് വിദ്യാർഥിയായ മിർസയാണ് മരിച്ചത്.
ഇന്ന് രാവിലെ ഏഴോടെയാണ് അപകടമുണ്ടായത്. എല്ലാ ഞായറാഴ്ചയും നാട്ടുകാർ ശുചീകരണ പ്രവൃത്തികൾ നടത്താറുണ്ട്. ഇതിനിടെ കുട്ടി കുളത്തിന് സമീപത്ത് കൂടി പോയപ്പോൾ ഹെയർബാൻഡ് കുളത്തിന്റെ പടിക്കെട്ടിലേക്ക് വീണു. അത് എടുക്കാനായി ഇറങ്ങുന്നതിനിടെ വീണ് തലയിടിക്കുകയായിരുന്നു.
മറ്റൊരു കുട്ടിയാണ് മിർസ കുളത്തിന്റെ പടിക്കെട്ടിൽ വീണ് കിടക്കുന്നത് കണ്ടത്. ഉടൻ കൂത്തുപറമ്പിലെ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. മൃതദേഹം തലശേരി ജനറൽ ആശുപത്രിയിൽ.
Kerala
കോട്ടയം: ചന്തക്കവലയിൽ സ്വകാര്യ ബസ് ഫുട്പാത്തിലേക്ക് പാഞ്ഞുകയറിയുണ്ടായ അപകടത്തിൽ പരിക്കേറ്റ് ചികിത്സയിലായിരുന്ന പെൺകുട്ടി മരിച്ചു. നട്ടാശേരി ഗാന്ധിസ്മാരക കേന്ദ്രത്തിന് സമീപം ഇഞ്ചേരിക്കുന്ന് പാറയിൽ വീട്ടിൽ അഞ്ജലി അജയ് ( 19 ) ആണ് മരിച്ചത്.
കോട്ടയം മെഡിക്കൽ കോളജിൽ ചികിത്സയിലിരിക്കെയാണ് അഞ്ജലി മരിച്ചത്. മാതാവ് മരിച്ചതിന് ശേഷം വലിയമ്മയോടൊപ്പമായിരുന്നു താമസിച്ചിരുന്നത്. ചന്തക്കവലയ്ക്ക് സമീപമുള്ള സ്വകാര്യ സ്ഥാപനത്തിലെ ജീവനക്കാരിയായിരുന്നു.
വെള്ളിയാഴ്ച രാത്രി ഏഴിനായിരുന്നു അപകടം. നാഗമ്പടം സ്റ്റാൻഡിൽനിന്നു ചങ്ങനാശേരി ഭാഗത്തേക്കു പോകുകയായിരുന്ന തണ്ടപ്ര എന്ന സ്വകാര്യ ബസാണ് അപകടത്തിൽപെട്ടത്. ബസിനടിയിൽ കുടുങ്ങിയവരെ നാട്ടുകാരും അഗ്നിരക്ഷാസേനയും പൊലിസും ചേർന്നു പുറത്തെടുത്ത് ജനറൽ ആശുപത്രിയിലേക്കു മാറ്റിയിരുന്നു.
അമിതവേഗമാണ് അപകടകാരണമെന്നു ദൃക്സാക്ഷികൾ പറയുന്നു. ബസ് കാത്തുനിന്നവർക്കും വഴിയാത്രക്കാർക്കുമാണു പരിക്കേറ്റതെന്ന് പൊലിസ് അറിയിച്ചു. ചാറ്റൽമഴ ഉണ്ടായിരുന്നതു മൂലം ബസ് സ്റ്റോപ്പിനു സമീപത്തെ കടത്തിണ്ണയിലേക്കു ചിലർ കയറി നിന്നതിനാൽ വൻദുരന്തം ഒഴിവായി. ബസ് വരുന്നതു കണ്ട് ചിലർ ഓടിമാറി.
അപകടത്തെത്തുടർന്ന് അരമണിക്കൂറോളം നഗരത്തിൽ ഗതാഗതം തടസപ്പെട്ടു. ഡ്രൈവറും കണ്ടക്ടറും പൊലിസ് കസ്റ്റഡിയിലാണ്. പരിക്കേറ്റ ഇത്തിത്താനം സുഭാഷ്ഭവനിൽ ശ്രീകുമാരി (54) മെഡിക്കൽ കോളജ് ആശുപത്രിയിലും മറിയപ്പള്ളി മുട്ടം ഉള്ളാട്ട് ജയ (51) കാരിത്താസ് ആശുപത്രിയിലും കൊല്ലാട് കലേഷ്ഭവനിൽ അനുമോൾ സുരേഷ് (48), ചങ്ങനാശേരി മലകുന്നം ആനക്കുഴി എ.കെ. സുനി (46) എന്നിവർ ജനറൽ ആശുപത്രിയിലും ചികിത്സയിലാണ്.
Kerala
തിരുവനന്തപുരം: നെയ്യാറ്റിൻകരയിൽ ആറു വയസുകാരിക്ക് അമ്മയുടെ ക്രൂരമർദനം. ഉദിയൻകുളങ്ങര സ്വദേശി വിഷ്ണുവിന്റെ മകൾ വിഷ്ണു നന്ദയ്ക്കാണ് മർദനമേറ്റത്.
ഫോണിലെ വാട്സാപ്പ് ഡിലീറ്റ് ചെയ്തതിനാണ് ക്രൂരമായി പരിക്കേൽപ്പിച്ചത്. സംഭവവുമായി ബന്ധപ്പെട്ട് കുട്ടിയുടെ അമ്മ കസ്റ്റഡിയിലായി.
കട്ടിലിൽ നിന്ന് വീണ് മുഖത്ത് പരുക്കേറ്റ് എന്നു പറഞ്ഞായിരുന്നു കുട്ടിയെ ജനറൽ ആശുപത്രിയിൽ അമ്മയും അമ്മൂമ്മയും ചേർന്ന് എത്തിച്ചത്. മുഖത്തെയും കാലിലെയും പരിക്ക് ശ്രദ്ധയിൽപ്പെട്ട ആശുപത്രി അധികൃതർ പൊലീസിൽ വിവരം അറിയിക്കുകയായിരുന്നു.
തടികഷ്ണം കൊണ്ടാണ് മർദിച്ചത്. ഇന്ന് ഉച്ചയോട് കൂടിയായിരുന്നു സംഭവം. ഉദിയൻകുളങ്ങര സ്വദേശികളായ വിഷ്ണു-ശോഭ ദമ്പതികളുടെ ഇളയ മകൾ വിഷ്ണു നന്ദക്കാണ് മർദനമേറ്റത്.
Kerala
ആലപ്പുഴ: ഹൗസ്ബോട്ടിൽ നിന്ന് വീണ് രണ്ടര വയസുകാരി മരിച്ചു. ആലപ്പുഴ പുന്നമട സ്റ്റാർട്ടിങ് പോയിൻറിലാണ് അപകടം.
തമിഴ്നാട് തിരുനൽവേലിയിൽ നിന്നുള്ള സംഘത്തിലെ അംഗമായ സുഗൻ ആണ് മരിച്ചത്. റെഡ് കാസ്റ്റിൽ വാരാഹരി എന്ന ബോട്ടിലെ യാത്രക്കിടെയാണ് കുട്ടി വെള്ളത്തിൽ വീണത്.
National
മൈസൂരു: കർണാടകയിലെ മൈസൂരുവിൽ സ്കൂൾ ബസ് കയറി ഒന്നര വയസുകാരി മരിച്ചു. ഒരു വയസും ഏഴു മാസവും പ്രായമുള്ള ലതിക്ഷയാണ് മരിച്ചത്.
സഹോദരനെ സ്കൂളിൽ നിന്ന് കൂട്ടിക്കൊണ്ടുവരാൻ അമ്മയ്ക്കൊപ്പം എത്തിയതായിരുന്നു കുഞ്ഞ്. സ്കൂൾ ബസിൽ നിന്ന് നാലു വയസുള്ള മകനെ അമ്മ താഴെയിറക്കുന്നതിനിടെ ഡ്രൈവർ ബസ് മുന്നോട്ടെടുക്കുകയായിരുന്നു. ഈ സമയം ബസിന് അടുത്തായി നിന്നിരുന്ന ലതിക്ഷയെ വാഹനം ഇടിച്ചു വീഴ്ത്തുകയായിരുന്നു. തുടർന്ന് കുട്ടിയുടെ ശരീരത്തിലൂടെ ബസിന്റെ ടയർ കയറി ഇറങ്ങി.
സംഭവത്തിൽ സ്കൂൾ ബസ് ഡ്രൈവർ സിദ്ധരാജുവിനെതിരെ (42) കുടുംബം പൊലീസിൽ പരാതി നൽകി. ഡ്രൈവറുടെ അശ്രദ്ധയാണ് കുഞ്ഞിന്റെ ജീവനെടുത്തതെന്നും ഇയാൾക്കെതിരെ കർശന നിയമനടപടി സ്വീകരിക്കണമെന്നും കുടുംബം ആവശ്യപ്പെട്ടു.
International
ലൂർദ്: ലൂർദിന്റെ പുണ്യഭൂമിയിലെത്തിയ മാർപാപ്പയ്ക്കു മുന്നിൽ വിശുദ്ധ ബർണദീത്തയുടെ വേഷത്തിലെത്തി ഗാനം ആലാപിച്ച് 13കാരി ഏവ മൊളൻമേക്കർ ഏവരുടെയും മനം കവർന്നു.‘ബർണദീത്ത് ദെ ലൂർദ് ’ എന്ന സംഗീതനാടകത്തിലെ രണ്ടു പ്രധാന ഗാനങ്ങളാണ് ഏവ പാടിയത്.
1858ൽ മാസബിയേൽ ഗുഹയിൽ പരിശുദ്ധ കന്യക മറിയത്തിന്റെ ദർശനം ലഭിച്ച വിശുദ്ധ ബർണദീത്തയുടെ ജീവിതത്തെ ആസ്പദമാക്കിയുള്ളതാണ് ഈ നാടകം. ഫ്രാൻസിലെ എക്സ് ഓൺ പ്രവിശ്യയിലെ ഫുവോ സ്വദേശിനിയായ ഏവയാണ് നാടകാവിഷ്കാരത്തിൽ പ്രധാന കഥാപാത്രത്തെ അവതരിപ്പിക്കുന്നത്.
വാക്കുകൾക്കതീതമായ, വിശ്വസിക്കാനാകാത്ത നിമിഷമാണിതെന്നും മാർപാപ്പയ്ക്കു മുന്നിൽ പാടാൻ കഴിഞ്ഞത് ജീവിതത്തിലെ ഏറ്റവും വലിയ ഭാഗ്യമായി കരുതുന്നുവെന്നും ഏവ വികാരഭരിതയായി പ്രതികരിച്ചു.
നിർമലമായ ശബ്ദത്തിൽ ഉയർന്നുവന്ന ഗാനം മാർപാപ്പയെയും സദസിനെയും ഒരേപോലെ കോരിത്തരിപ്പിച്ചു. ഭക്തിസാന്ദ്രമായ ഈ അവിസ്മരണീയ നിമിഷത്തിന്റെ വീഡിയോ ദൃശ്യങ്ങൾ ഇപ്പോൾ സമൂഹമാധ്യമങ്ങളിൽ തരംഗമായിരിക്കുകയാണ്.
Kerala
കൊച്ചി: പറവൂരിൽ പ്രിയദർശനി ബസിൽ പെൺകുട്ടിയെ അപമാനിച്ചെന്ന പരാതിയിൽ കണ്ടക്ടർക്കെതിരെ പൊലിസ് കേസെടുത്തു. മോശമായി പെരുമാറിയതിനും അസഭ്യം പറഞ്ഞതിനുമാണ് കേസ്.
ഗുരുവായൂർ - എറണാകുളം റൂട്ടിൽ സർവീസ് നടത്തുന്ന എറണാകുളം ഡിപ്പോയിലെ ആർഎസ്എ 173 "പ്രിയദർശിനി' ബസിലാണ് കേസിനാസ്പദമായ സംഭവം നടന്നത്. ശനിയാഴ്ച യാത്രയ്ക്കിടെ വിദ്യാർഥി സീറോ ടിക്കറ്റ് ആവശ്യപ്പെട്ടപ്പോൾ നൽകാൻ കഴിയില്ലെന്ന് കണ്ടക്ടർ പറയുകയായിരുന്നു.
തുടർന്ന് "പെൺകുട്ടിയാണെന്ന് കണ്ടാൽ തോന്നില്ല" എന്ന് പറഞ്ഞ് അധിക്ഷേപിക്കുകയും സ്ത്രീത്വത്തെ അപമാനിക്കുന്ന രീതിയിൽ അപമര്യാദയായി സംസാരിക്കുകയും ചെയ്തെന്നാണ് പരാതി. യാത്രക്കാരിൽ ചിലരും മോശമായി പെരുമാറിയെന്ന് പരാതിയിൽ ആരോപിക്കുന്നുണ്ട്. സംഭവത്തിൽ പരാതിക്കാരിയെയും കണ്ടക്ടറെയും പറവൂർ പൊലിസ് സ്റ്റേഷനിലേക്ക് വിളിപ്പിച്ചിരുന്നു.
പറവൂർ പൊലിസിൽ ലഭിച്ച പരാതി ശ്രദ്ധയിൽപ്പെട്ടതിന് പിന്നാലെ കെഎസ്ആർടിസി അന്വേഷണം പ്രഖ്യാപിക്കുകയായിരുന്നു. കെഎസ്ആർടിസി വിജിലൻസ് വിഭാഗം നടത്തിയ പ്രാഥമിക അന്വേഷണത്തിൽ കണ്ടക്ടറുടെ ഭാഗത്ത് ഗുരുതര വീഴ്ചയുണ്ടായതായി കണ്ടെത്തുകയും തുടർന്ന് സിഎംഡിയുടെ നിർദ്ദേശപ്രകാരം സസ്പെൻഷൻ നടപടി സ്വീകരിക്കുകയും ചെയ്തു.
Kerala
കൊച്ചി: പ്രിയദർശിനി ബസിൽ വിദ്യാർഥിയെ കണ്ടക്ടർ അപമാനിച്ചെന്ന പരാതിയിൽ നടപടിയെടുക്കാൻ നിർദേശം നൽകി മുഖ്യമന്ത്രി വി.ഡി. സതീശൻ . പെൺകുട്ടിയുടെ മൊഴി രേഖപ്പെടുത്തിയതിന് ശേഷം ഇന്നുതന്നെ പൊലിസ് കേസെടുക്കും. കണ്ടക്ടർക്കെതിരെ വകുപ്പുതല നടപടി ഉണ്ടാകുമെന്നാണ് വിവരം.
പ്ലസ് ടു വിദ്യാർഥിനിയെയാണ് ഗുരുവായൂർ-എറണാകുളം റൂട്ടിൽ സർവീസ് നടത്തുന്ന ബസിലെ കണ്ടക്ടർ അപമാനിച്ചത്. പെൺകുട്ടിയാണെന്ന് കണ്ടാൽ തോന്നില്ലെന്നും. അസഭ്യം പറഞ്ഞെന്നും വിദ്യാർഥിനി ആരോപിച്ചു. കണ്ടക്ടറുടെ പെരുമാറ്റത്തെ തുടർന്ന് പുരുഷ യാത്രക്കാരിൽ ചിലർ മോശമായി പെരുമാറിയെന്നും പരാതിയുണ്ട്.
ചിലർ കായികമായി ഉപദ്രവിക്കാനും ശ്രമം നടത്തിയെന്നും പെൺകുട്ടി പറഞ്ഞു. മുഖ്യമന്ത്രിയുടെ മണ്ഡലമായ നോർത്ത് പറവൂരിലാണ് സംഭവം ഉണ്ടായത്. കണ്ടക്ടർക്കെതിരെ നടപടിയെടുക്കാൻ മുഖ്യമന്ത്രി നിർദേശം നൽകിയതായി നോർത്ത് പറവൂർ മുനിസിപ്പൽ ചെയർമാൻ രമേശ് ഡി. കുറുപ്പ് പറഞ്ഞു.
Kerala
തിരുവനന്തപുരം: മണ്ണന്തലയില് ഒമ്പതാം ക്ലാസുകാരിയെ പീഡിപ്പിച്ചെന്ന പരാതിയില് പ്രായപൂര്ത്തിയാകാത്ത മൂന്ന് വിദ്യാര്ഥികളെ പൊലിസ് കസ്റ്റഡിയിലെടുത്തു. 16, 17 വയസുള്ളവരാണ് പിടിയിലായത്.
പെണ്കുട്ടിയുമായി പരിചയമുണ്ടായിരുന്ന വിദ്യാര്ഥികള് സ്കൂളില് പോകാതെ പെണ്കുട്ടിയെയും കൂട്ടി പുറത്തുപോയെന്നും അവിടെ വച്ച് പീഡിപ്പിച്ചെന്നുമാണു പരാതി. പെണ്കുട്ടിയും വിദ്യാര്ഥികളും വ്യത്യസ്ത സ്കൂളുകളിലാണു പഠിക്കുന്നത്.
സ്കൂളില് നടന്ന കൗണ്സലിങ്ങിനിടെയാണു പെണ്കുട്ടി സംഭവം പുറത്തു പറഞ്ഞത്. തുടര്ന്നു സ്കൂള് അധികൃതര് വിവരം വീട്ടുകാരെയും പൊലിസിനെയും അറിയിച്ചു. ഇതിനു പിന്നാലെയാണ് കുട്ടികളെ പിടികൂടിയത്.
പിടിയിലായ മൂന്ന് പേരെയും ജുവനൈല് ജസ്റ്റിസ് ബോര്ഡിനു മുന്നില് ഹാജരാക്കുമെന്ന് മണ്ണന്തല പൊലിസ് അറിയിച്ചു.
National
ന്യൂഡൽഹി: ഡൽഹിയിലെ കൽക്കാജി മന്ദിറിന് സമീപമുള്ള പാർക്കിൽ വച്ച് പൊലിസുകാരെന്ന വ്യാജേന മൂന്നംഗ സംഘം പതിനേഴുകാരിയെ കൂട്ടബലാത്സംഗം ചെയ്തു. സംഭവത്തിൽ ആസിഫ് എന്ന പ്രതിയെ പൊലിസ് പിടികൂടി.
തിങ്കളാഴ്ച രാത്രി ഏഴിന് പെൺകുട്ടിയും ആൺസുഹൃത്തും കൽക്കാജി മന്ദിറിലെത്തിയത്. ക്ഷേത്രത്തിൽ പോയ ശേഷം ഏഴരയ്ക്ക് ഇരുവരും സമീപമുള്ള പാർക്കിലേക്ക് നടക്കാനായി പോയി.
ഇതിനിടെയാണ് 25നും 30നും ഇടയിൽ പ്രായമുള്ള മൂന്നംഗ സംഘം പൊലിസുകാരാണെന്ന വ്യാജേന ഇവർക്കടുത്തേക്ക് എത്തിയത്. തുടർന്ന് ഇരുവരേയും ഭീഷണിപ്പെടുത്തുകയും പ്രതികളിൽ ഒരാൾ തോക്കും കത്തിയുമെടുത്ത് പെൺകുട്ടിയുടെ സുഹൃത്തിനെ തടഞ്ഞുവച്ച ശേഷം പെൺകുട്ടിയെ പീഡിപ്പിക്കുകയുമായിരുന്നു. പിന്നീട് മറ്റ് രണ്ടുപേരും ചേർന്ന് പെൺകുട്ടിയെ മാറിമാറി പീഡനത്തിനിരയാക്കി. സംഭവത്തിന് ശേഷം ഇരുവരെയും ഭീഷണിപ്പെടുത്തി സംഘം സ്ഥലം വിട്ടു.
വിവരം അറിഞ്ഞ പൊലിസ് സ്ഥലത്തെത്തി രാത്രി 8:45ന് പെൺകുട്ടിയെ വൈദ്യപരിശോധനയ്ക്ക് വിധേയയാക്കി. പെൺകുട്ടിയുടെ മൊഴിയുടെ അടിസ്ഥാനത്തിൽ പോക്സോ നിയമത്തിലെ വിവിധ വകുപ്പുകൾ പ്രകാരം കേസെടുത്തിട്ടുണ്ട്.
സംഭവവുമായി ബന്ധപ്പെട്ട് പ്രതികളിലൊരാളെ പൊലിസ് ഏറ്റുമുട്ടലിനൊടുവിൽ പിടികൂടി. സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിനൊടുവിൽ പൊലിസ് സംഘവുമായുള്ള വെടിവയ്പ്പിൽ കാലിന് പരിക്കേറ്റതിനെ തുടർന്ന് ആസിഫിനെ കീഴ്പ്പെടുത്തുകയായിരുന്നു. ഒളിവിലുള്ള മറ്റ് രണ്ട് പ്രതികൾക്കായി പൊലിസ് അന്വേഷണം ആരംഭിച്ചിട്ടുണ്ട്. കഴിഞ്ഞ 10 ദിവസത്തിനിടയിൽ തലസ്ഥാനത്ത് പ്രായപൂർത്തിയാകാത്ത പെൺകുട്ടികൾ പീഡനത്തിനിരയാകുന്ന നാലാമത്തെ സംഭവമാണിത്.
Kerala
കൊച്ചി: സഹോദരനോടുള്ള വൈരാഗ്യം തീര്ക്കാന് 15കാരിയായ പെണ്കുട്ടിയെ വഴിയില് തടഞ്ഞുനിര്ത്തി ഭീഷണിപ്പെടുത്തിയതായി പരാതി. സിഗരറ്റ് വലിച്ചു പുക മുഖത്തേക്ക് ഊതി അലോസരപ്പെടുത്തിയതായും പരാതിയില് പറയുന്നുണ്ട്.
ഓച്ചന്തുരുത്ത് സ്വദേശിയായ പെണ്കുട്ടിക്കാണ് ദുരനുഭവം ഉണ്ടായത്. കഴിഞ്ഞ ദിവസം പുതുവൈപ്പ് സാന്താക്രോസ് സ്കൂളിന് സമീപം വച്ചായിരുന്നു സംഭവം. കണ്ടാല് അറിയാവുന്ന രണ്ടുപേരാണ് ഭീഷണിപ്പെടുത്തിയത്. ഞാറക്കല് പൊലിസില് നല്കിയ പരാതിയില് കേസ് എടുത്ത് അന്വേഷണം ആരംഭിച്ചു.
National
ഗാന്ധിനഗർ: ഗുജറാത്തിലെ അമ്രേലി ജില്ലയിൽ അഞ്ച് വയസുകാരിയെ കൊലപ്പെടുത്തി മൃതദേഹം ഫ്രിഡ്ജിൽ സൂക്ഷിച്ച ശേഷം പിതാവ് ജീവനൊടുക്കി. കിഷോർ ധനകാണ് (40) മകൾ ഹിമാൻഷിയെ കൊലപ്പെടുത്തിയത്.
മകളെ ശ്വാസം മുട്ടിച്ച് കൊലപ്പെടുത്തിയ ശേഷം പ്രതി മൃതദേഹം ഫ്രിഡ്ജിൽ ഒളിപ്പിക്കുകയും പിന്നീട് ജീവനൊടുക്കുകയുമായിരുന്നു. വീട്ടിൽ നിന്നു മൂന്ന് കുറിപ്പുകൾ പൊലിസ് കണ്ടെടുത്തു. ബിസിനസ് ആവശ്യങ്ങൾക്കായി കടം വാങ്ങിയ പണം തിരികെ ലഭിക്കാത്തതിനെത്തുടർന്നുള്ള സാമ്പത്തിക ബുദ്ധിമുട്ടുകളുണ്ടെന്ന് കുറിപ്പുകളിൽ വ്യക്തമാക്കുന്നു. മകൾ കഷ്ടപ്പെടരുതെന്ന് കരുതിയാണ് ഹിമാൻഷിയെ കൊലപ്പെടുത്തിയതെന്നും അദ്ദേഹം എഴുതിയിട്ടുണ്ട്.
പൂക്കളും ബലൂണുകളും മെഴുകുതിരികളും ഉപയോഗിച്ച് അലങ്കരിച്ച മുറിക്കുള്ളിലാണ് സംഭവം നടന്നത്. വെള്ള വസ്ത്രം ധരിപ്പിച്ച് ചോക്ലേറ്റുകളും വച്ച് മകളുടെ ജന്മദിനം പോലെ അവസാനമായി ആഘോഷിക്കാൻ ശ്രമിച്ചതിന്റെ ലക്ഷണങ്ങൾ മുറിയിൽ ഉണ്ടായിരുന്നുവെന്ന് പൊലിസ് പറയുന്നു. ഫ്രിഡ്ജിന് മുകളിൽ 'ഹാപ്പി ബർത്ഡേ ഹിമാൻഷി' എന്ന് എഴുതിയ പേപ്പറും കണ്ടെത്തിയിട്ടുണ്ട്.
സെപ്റ്റംബർ 14 മുതൽ സ്വന്തം വീട്ടിലായിരുന്ന ഭാര്യ മഞ്ജുബെൻ കിഷോറിനെ ഫോണിൽ കിട്ടാത്തതിനെ തുടർന്ന് സഹോദരനെ വീട്ടിലേക്ക് അയക്കുകയായിരുന്നു. തുടർന്ന് നടത്തിയ പരിശോധനയിലാണ് വിവരം പുറത്തറിയുന്നത്. സംഭവത്തിൽ പൊലിസ് കേസെടുത്ത് അന്വേഷണം നടത്തിവരികയാണ്.
National
ഛാത്ര: ജാർഖണ്ഡിലെ ഛാത്രയിൽ 17 വയസുള്ള പെൺകുട്ടിയെ തട്ടിക്കൊണ്ടുപോയി ബലാത്സംഗം ചെയ്തശേഷം ശ്വാസംമുട്ടിച്ചു കൊലപ്പെടുത്തി. കേസുമായി ബന്ധപ്പെട്ട് 19, 22 വയസുള്ള രണ്ടുപേരെ പോലീസ് അറസ്റ്റ് ചെയ്തു.
സെപ്റ്റംബർ 14ന് കുന്ദ ഗ്രാമത്തിൽ തേജ് മഹോത്സവത്തിന്റെ ഭാഗമായി ആളുകൾ കൂടിയതിനിടെയായിരുന്നു സംഭവം.
തട്ടിക്കൊണ്ടുപോകുന്നതിനിടെ, ഉച്ചഭാഷിണിയിൽനിന്നുള്ള ശബ്ദംമൂലം കുട്ടിയുടെ കരച്ചിൽ ആരും ശ്രദ്ധിച്ചില്ല. 15ന് രാവിലെ ഗ്രാമത്തിലെ ഒറ്റപ്പെട്ട സ്ഥലത്ത് മൃതദേഹം കണ്ടെത്തുകയായിരുന്നു.
National
ചണ്ഡിഗഡ്: ഹരിയാനയിലെ സോണിപറ്റിൽ വീട്ടിൽ ഉറങ്ങിക്കിടന്ന ആറ് വയസുകാരിയെ വാട്ടർ ടാങ്കിൽ മരിച്ച നിലയിൽ കണ്ടെത്തി. പൊൺകുട്ടിയുടെ മാതാപിതാക്കൾക്കൊപ്പം ജോലി ചെയ്തിരുന്ന സുമിത് എന്ന യുവാവിനെ പൊലിസ് കസ്റ്റഡിയിൽ എടുത്തു.
രാത്രി വീട്ടിൽ കിടന്നുറങ്ങുകയായിരുന്ന കുട്ടിയെ സുമിത് തട്ടിക്കൊണ്ടുപോയതാണെന്ന് കുടുംബം സംശയിക്കുന്നു. സംഭവസമയത്ത് ജനറേറ്റർ പ്രവർത്തിച്ചിരുന്നതിനാൽ മറ്റ് ശബ്ദങ്ങളൊന്നും കേൾക്കാൻ കഴിഞ്ഞിരുന്നില്ലെന്നും പെൺകുട്ടിയുടെ കുടുംബം പറയുന്നു.
കുട്ടിയെ വീടിനുള്ളിൽ കാണാത്തതിനെത്തുടർന്ന് നടത്തിയ തെരച്ചിലിനെ തുടർന്നാണ് വാട്ടർ ടാങ്കിനുള്ളിൽ മൃതദേഹം കണ്ടെത്തിയത്. കുട്ടിയുടെ കൈകാലുകൾ കെട്ടിയ നിലയിലായിരുന്നുവെന്നും വസ്ത്രങ്ങൾ ഉണ്ടായിരുന്നില്ലെന്നും കുടുംബം ആരോപിക്കുന്നു.
സുമിതിനെ കസ്റ്റഡിയിലെടുക്കുമ്പോൾ അയാൾ മദ്യ ലഹരിയിലായിരുന്നുവെന്ന് പൊലിസ് പറഞ്ഞു. പ്രതിയെ ചോദ്യം ചെയ്തുവരികയാണെന്നും പോസ്റ്റ്മോർട്ടം റിപ്പോർട്ട് വന്നതിനുശേഷമേ മരണകാരണം വ്യക്തമാകൂ എന്നും പൊലിസ് അറിയിച്ചു.
Kerala
ആലപ്പുഴ: കായംകുളത്ത് പിതാവിനൊപ്പം ബൈക്കിൽ യാത്ര ചെയ്യുകയായിരുന്ന പത്തു വയസുകാരി ബസിനടിയിൽപെട്ട് മരിച്ചു. ചെട്ടികുളങ്ങര കണ്ണംമംഗലം ശ്രീലകം വീട്ടിൽ ശ്രീകാന്തിന്റെയും വിദ്യയുടെയും മകൾ ശ്രീഭദ്രയാണ് മരിച്ചത്. ചെട്ടികുളങ്ങര ഈരേഴ വടക്ക് എൽപിഎസിലെ 4-ാം ക്ലാസ് വിദ്യാർഥിനിയാണ്.
കെപി റോഡിൽ കായംകുളം പൊലിസ് സ്റ്റേഷന് സമീപം കഴിഞ്ഞദിവസം വൈകുന്നേരം ആറേകാലിനാണ് അപകടം. പിതാവ് ശ്രീകാന്തിനൊപ്പം ബൈക്കിൽ വരികയായിരുന്നു ശ്രീഭദ്ര. മുന്നിൽ വരികയായിരുന്ന ബസ് ബൈക്കിൽ ഇടിക്കുകയായിരുന്നു. ഇതോടെ ബൈക്ക് മറിഞ്ഞ് ശ്രീഭദ്ര അതേ ബസിനടിയിലേക്ക് വീണു.
ഗുരുതരമായി പരിക്കേറ്റ ശ്രീഭദ്രയെ ആദ്യം താലൂക്ക് ആശുപത്രിയിൽ എത്തിച്ചു. തുടർന്ന് കരീലകുളങ്ങരയിലെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും രാത്രി എട്ടോടെ മരിച്ചു. സഹോദരൻ ശ്രീ ഗണേഷ്. അപകടത്തിൽ ശ്രീകാന്തിനും നിസാര പരിക്കേറ്റിട്ടുണ്ട്.
National
ന്യൂഡൽഹി: ഡല്ഹിയിലെ സ്വരൂപ് നഗറില് ഒമ്പത് വയസുകാരിയെ തട്ടിക്കൊണ്ടുപോയി പീഡിപ്പിച്ച ബന്ധു അറസ്റ്റില്. നാട്ടില് നിന്ന് ജോലി തേടി ഡല്ഹിയിലെത്തിയ പ്രതിയെ പെൺകുട്ടിയുടെ കുടുംബം സഹായിക്കുകയും വീടിനോട് ചേര്ന്നുള്ള മുറി വാടകയ്ക്ക് എടുത്ത് നല്കുകയും ചെയ്തിരുന്നു.
ഉറങ്ങിക്കിടക്കുകയായിരുന്ന പെൺകുട്ടിയെ പ്രതി രഹസ്യമായി അയാളുടെ മുറിയിലേക്ക് എടുത്തു കൊണ്ടുപോയി പീഡിപ്പിക്കുകയായിരുന്നു. പീഡനത്തിനിടെ കുട്ടിയുടെ ഇളയ സഹോദരി മുറിയില് പ്രവേശിക്കുകയും പിന്നീട് വിവരം അമ്മയെ അറിയിക്കുയും ചെയ്തു.
കുടുംബത്തിന്റെ പരാതിയെ തുടര്ന്ന് പൊലിസ് കേസെടുത്ത് അന്വേഷണം ആരംഭിച്ചു. വൈദ്യപരിശോധനയ്ക്കും കൗണ്സിലിംഗിനും വിധേയയാക്കിയ പെണ്കുട്ടിയുടെയും കുടുംബാംഗങ്ങളുടെയും മൊഴികള് പൊലിസ് രേഖപ്പെടുത്തിവരുന്നു.
Kerala
കൊച്ചി: രക്ഷിതാക്കൾ അറിയാതെ വീട്ടിൽനിന്ന് പുറത്തിറങ്ങി പാലത്തിലെത്തിയ ഭിന്നശേഷിക്കാരിയായ നാലുവയസുകാരിക്ക് രക്ഷകരായി കൊച്ചി സിറ്റി പൊലിസ്. ഇടപ്പള്ളി കുന്നുംപുറത്ത് താമസിക്കുന്ന ഇതരസംസ്ഥാനക്കാരായ ദമ്പതികളുടെ മകളെയാണ് പൊലിസിന്റെ സമയോചിത ഇടപെടലിലൂടെ സുരക്ഷിതമായി മാതാപിതാക്കൾക്ക് കൈമാറിയത്.
ഇന്നലെ ഉച്ചയ്ക്ക് 12 ഓടെയാണ് കുന്നുംപുറം പാലത്തിൽ നാലുവയസുകാരിയെ തനിച്ച് കണ്ടത്. കുഞ്ഞ് പാലത്തിലൂടെ തനിച്ച് നടന്നു വരുന്നതു കണ്ട സ്വകാര്യ ബസ് ജീവനക്കാർ പൊലിസ് കൺട്രോൾ റൂമിൽ വിവരം അറിയിച്ചു.കുട്ടിയുടെ മാതാപിതാക്കളെക്കുറിച്ചോ വീടിനെക്കുറിച്ചോ വ്യക്തമായ വിവരങ്ങൾ ലഭിക്കാതിരുന്നതിനാൽ പൊലിസ് ഉടൻ സ്ഥലത്തെത്തി തെരച്ചിൽ ആരംഭിച്ചു.
എറണാകുളം വനിതാ പൊലിസ് സ്റ്റേഷനിലെ എഎസ്ഐ ബേബി വർഗീസിന്റെ നേതൃത്വത്തിലുള്ള സംഘവും ചേരാനല്ലൂർ പൊലിസും സ്ഥലത്തെത്തി പരിശോധന ആരംഭിച്ചു. അര മണിക്കൂറിനു ശേഷം കുട്ടിയെ കാണാനില്ലെന്ന വിവരം മാതാപിതാക്കളും അറിഞ്ഞു. തുടർന്ന് കുഞ്ഞിനെ തേടി സമീപവാസികൾക്കൊപ്പം മാതാപിതാക്കളും സ്ഥലത്തെത്തി.
ഏകദേശം അരമണിക്കൂറോളം പൊലിസ് സംഘം പാലത്തിലും പരിസരത്തും തെരച്ചിൽ നടത്തി. ഇതിനിടെ പാലത്തിന് മുകളിൽ നിന്നാണ് എഎസ്ഐ ബേബി വർഗീസ് കുഞ്ഞിനെ കണ്ടെത്തിയത്. തുടർന്ന് കുഞ്ഞിനെ മാതാപിതാക്കൾക്ക് കൈമാറി.
Kerala
തിരുവനന്തപുരം: പ്രായപൂർത്തിയാകാത്ത പെൺകുട്ടിയെ ലൈംഗികമായി പീഡിപ്പിച്ച കേസിൽ 20കാരനായ പ്രതിക്ക് എട്ട് വർഷം കഠിന തടവും 40,000 രൂപ പിഴയും ശിക്ഷ. കാട്ടാക്കട അതിവേഗ പോക്സോ കോടതി ജഡ്ജി വി. വിനോദാണ് ശിക്ഷ വിധിച്ചത്. അടിമലതുറ കോട്ടുകാൽ സ്വദേശി അനുവിനെതിരെയാണ് കേസ്. പിഴത്തുക 15 വയസുകാരിയായ അതിജീവിതയ്ക്ക് നൽകണമെന്നും വിധിന്യായത്തിൽ കോടതി നിർദേശിച്ചു.
പിഴ അടച്ചില്ലെങ്കിൽ പ്രതി നാല് മാസം അധിക കഠിന തടവ് അനുഭവിക്കണമെന്നും കോടതി വ്യക്തമാക്കി. പത്താം ക്ലാസ് വിദ്യാർഥിനിയായ അതിജീവിത അമ്മയോടൊപ്പമായിരുന്നു താമസിച്ചിരുന്നത്. പ്രതി പലതവണ പെൺകുട്ടിയോട് ഇഷ്ടമാണെന്ന് പറഞ്ഞ് ശല്യപ്പെടുത്തിയിരുന്നതായി പ്രോസിക്യൂഷൻ കോടതിയിൽ വ്യക്തമാക്കി.
സംഭവദിവസം പെൺകുട്ടിയെ കാണണമെന്ന് വാശിപിടിച്ച് പ്രതി കുട്ടി പഠിക്കുന്ന സ്കൂളിലെത്തി. പരീക്ഷ കഴിഞ്ഞ് പുറത്തിറങ്ങിയ പെൺകുട്ടിയെ ബൈക്കിൽ കയറാൻ പ്രതി നിർബന്ധിച്ചു. ആദ്യം വിസമ്മതിച്ച കുട്ടിയെ നിർബന്ധിച്ച് ബൈക്കിൽ കയറ്റി വിവിധ സ്ഥലങ്ങളിൽ കൊണ്ടുപോയി. തുടർന്ന് ഉച്ചയോടെ കല്ലുമല ബൈപ്പാസിന് സമീപം എത്തിച്ച് കുട്ടിയെ ലൈംഗിക അതിക്രമത്തിന് ഇരയാക്കിയെന്നാണ് കേസ്.
കുട്ടിയെ കാണാതായതിനെ തുടർന്ന് അമ്മ പൊലീസിൽ പരാതി നൽകി. ഇക്കാര്യം അറിഞ്ഞ പ്രതി കുട്ടിയെ സ്വന്തം വീട്ടിലേക്ക് കൊണ്ടുപോയതായും പ്രോസിക്യൂഷൻ ആരോപിച്ചു. തുടർന്ന് രാത്രിയിൽ പൊലീസ് പ്രതിയുടെ വീട്ടിലെത്തി കുട്ടിയെ കണ്ടെത്തി കൂട്ടിക്കൊണ്ടുപോയി കേസ് രജിസ്റ്റർ ചെയ്യുകയായിരുന്നു.
Kerala
മലപ്പുറം: ദേശീയപാതയില് വെളിമുക്കില് കാര് ഡിവൈഡറിലിടിച്ച് മറിഞ്ഞുണ്ടായ അപകടത്തില് ഗുരുതരമായി പരിക്കേറ്റ് ചികിത്സയിലായിരുന്ന മൂന്ന് വയസുകാരി മരിച്ചു. കൊടിഞ്ഞി കാളംതിരുത്തി കൊല്ലംതൊടി സ്വദേശി തന്വീര് - സഫ്ന ഷെറിന് ദമ്പതികളുടെ ഏക മകള് സൂന നഹര് ആണ് മരിച്ചത്.
കഴിഞ്ഞ ദിവസം വൈകുന്നേരമാണ് വെളിമുക്കില് വച്ച് അപകടം നടന്നത്. കല്ല്യാണവീട്ടില് വച്ച് വലിയുമ്മയുടെ കൂടെ പോകാന് കുട്ടി നിര്ബന്ധം പിടിച്ചതിനെ തുടര്ന്ന് സഫ്നയുടെ മാതാപിതാക്കള്ക്കൊപ്പം പടിക്കലിലെ വീട്ടിലേക്ക് പോകുമ്പോഴായിരുന്നു അപകടം.
ഇവര് സഞ്ചരിച്ചിരുന്ന കാര് നിയന്ത്രണം വിട്ട് ദേശീയപാതയിലെ ഡിവൈഡറിലിടിച്ച് തലകീഴായി മറിയുകയായിരുന്നു. അപകടത്തില് തലയോട്ടിക്ക് ഗുരുതരമായി പരിക്കേറ്റ കുട്ടിയെ ഉടന് തന്നെ കോഴിക്കോട്ടെ സ്വകാര്യ ആശുപത്രിയില് പ്രവേശിപ്പിച്ചു. പിന്നീട് കൂടുതല് വിദഗ്ദ്ധ ചികിത്സയ്ക്കായി കോഴിക്കോട് മെഡിക്കല് കോളജ് ആശുപത്രിയിലേക്ക് മാറ്റിയെങ്കിലും ജീവന് രക്ഷിക്കാനായില്ല.
Kerala
ആലുവ: മൂന്നാം ക്ലാസിൽ പഠിക്കുന്ന പെൺകുട്ടിയെ തട്ടിക്കൊണ്ട് പോകാൻ ശ്രമിച്ച കേസിൽ ഒരാൾ അറസ്റ്റിൽ. തമിഴ്നാട് വേളാങ്കണ്ണി സ്വദേശി സെൽവകുമാർ (50) ആണ് അറസ്റ്റിലായത്.
ആലുവ പൊലിസാണ് ഇയാളെ അറസ്റ്റ് ചെയ്തത്. ആലുവയിൽ രണ്ട് വർഷത്തോളമായി താമസിച്ചിരുന്ന ഇയാൾ ദിവസ വേതന തൊഴിലാളിയായി ജോലി ചെയ്ത് വരികയായിരുന്നു.
വെള്ളിയാഴ്ച രാവിലെയാണ് സംഭവം. വീടിന് സമീപത്തുണ്ടായിരുന്ന പെൺകുട്ടിയെ സെൽവകുമാർ തന്റെ താമസ സ്ഥലത്തേക്ക് കൂട്ടിക്കൊണ്ട് പോകാൻ ശ്രമിക്കുകയും കുട്ടിയോട് അപമര്യാദയായി പെരുമാറുകയും ചെയ്തെന്നാണ് പരാതി.
സംഭവത്തിൽ സംശയം തോന്നിയ നാട്ടുകാർ ഇയാളെ തടഞ്ഞ് നിർത്തി പൊലിസിൽ ഏൽപ്പിക്കുകയായിരുന്നു. തുടർന്ന് ആലുവ പൊലിസ് ഇയാൾക്കെതിരെ പോക്സോ നിയമ പ്രകാരം കേസ് രജിസ്റ്റർ ചെയ്ത് അറസ്റ്റ് രേഖപ്പെടുത്തി.
National
ലക്നോ: ഉത്തർപ്രദേശിലെ ഗാസിയാബാദിൽ തെരുവ് നായ്ക്കളുടെ ആക്രമണത്തിൽ ആറ് വയസുകാരിക്ക് ഗുരുതര പരിക്ക്. രാജ് നഗർ എക്സ്ടെൻഷനിലെ സ്റ്റാർ രാമേശ്വരം സൊസൈറ്റിയിലാണ് സംഭവം നടന്നത്.
കുട്ടി റെസിഡൻഷ്യൽ കോംപ്ലക്സിലൂടെ നടന്നുപോകുമ്പോൾ തെരുവ് നായ കുട്ടിയുടെ നേരെ ഓടിയെത്തുകയായിരുന്നു. നായ കുട്ടിയുടെ വസ്ത്രത്തിൽ കടിച്ചുവലിച്ച് മറ്റ് മൂന്ന് നായ്ക്കളുടെ അടുത്തേക്ക് കൊണ്ടുപോയി. തുടർന്ന് നായ്ക്കൾ കുട്ടിയെ വളഞ്ഞുപിടിക്കുകയും ആക്രമിക്കുകയും ചെയ്തു. കുട്ടി രക്ഷപ്പെടാൻ ശ്രമിച്ചെങ്കിലും നായ്ക്കൾ ആക്രമണം തുടർന്നു.
ഈ സമയം അതുവഴിയെത്തിയ ഒരു സ്ത്രീ ഉടൻ തന്നെ ചെരുപ്പ് ഉപയോഗിച്ച് നായ്ക്കളെ തുരത്തിയോടിക്കുകയുമായിരുന്നു. പിന്നാലെ നാട്ടുകാർ ഓടിയെത്തി കുട്ടിയെ രക്ഷപ്പെടുത്തി. ആക്രമണത്തിൽ പരിക്കേറ്റ കുട്ടിക്ക് ആശുപത്രിയിൽ ചികിത്സ നൽകി.
സൊസൈറ്റിയിലെ തെരുവ് നായ ശല്യത്തെക്കുറിച്ച് നിരവധി തവണ പരാതിപ്പെട്ടിട്ടും അധികൃതരുടെ ഭാഗത്തുനിന്ന് യാതൊരുവിധ നടപടിയും ഉണ്ടായിട്ടില്ലെന്ന് പ്രദേശവാസികൾ ആരോപിച്ചു. ഇത്തരം അപകടങ്ങൾ ഒഴിവാക്കാൻ അധികൃതർ ഉടൻ തന്നെ നടപടിയെടുക്കണമെന്ന് നാട്ടുകാർ ആവശ്യപ്പെട്ടു.
Kerala
ഗാന്ധിനഗർ: കോട്ടയം മെഡിക്കൽ കോളജ് ആശുപത്രിയിൽ നവജാത ശിശുവിന്റെ ചികിത്സയിൽ ഗുരുതര ചികിത്സാ പിഴവ് ഉണ്ടായെന്ന പരാതിയുമായി ദമ്പതികൾ. എൻഐസിയുവിൽ ചികിത്സയിൽ കഴിയുന്നതിനിടെ ശരീരത്തിൽ തറച്ചുകയറിയ സൂചിയുടെ വേദന തിന്നാണ് കുട്ടി ഒരു വർഷം കഴിച്ചുകൂട്ടിയത്.
കോഴിക്കോട് സ്വദേശി വിനീഷ്, ഏറ്റുമാനൂർ കട്ടച്ചിറ സ്വദേശിനി അഞ്ജു ദമ്പതികളുടെ മകൾ ഒരു വയസും രണ്ടു മാസവും പ്രായമുള്ള അദ്വൈകയുടെ ശരീരത്തിൽ നിന്നാണ് സൂചി കണ്ടെത്തി പുറത്തെടുത്തത്.
കുട്ടി ജനിച്ചത് കഴിഞ്ഞവർഷം ജൂണിൽ കോട്ടയം മെഡിക്കൽ കോളജ് ആശുപത്രിയിലാണ്. ജനിച്ച് രണ്ടാം ദിവസം കുട്ടിയെ എൻഐസിയുവിൽ പ്രവേശിപ്പിച്ചിരുന്നു. എൻഐസിയുവിൽ കഴിയുന്നതിനിടെ കുട്ടിയുടെ വാരിയെല്ലിന്റെ ഭാഗത്ത് ചെറിയ തടിപ്പ് അനുഭവപ്പെട്ടതായി മാതാപിതാക്കൾ പറയുന്നു. ഇക്കാര്യം ഡോക്ടർമാരെ അറിയിക്കുകയും പരിശോധിക്കാൻ ആവശ്യപ്പെടുകയും ചെയ്തെങ്കിലും കൃത്യമായ പരിശോധന നടത്തിയില്ലെന്നാണ് പരാതി.
തുടർന്ന് ഒരു വർഷത്തിലേറെയായി കുട്ടി വേദന സഹിച്ച് കഴിയുകയായിരുന്നുവെന്ന് കുടുംബം പറയുന്നു. 2026 ജൂലൈയിൽ വയറിന്റെ ഭാഗത്ത് വേദന കൂടിയതിനെത്തുടർന്ന് കോഴിക്കോട് മെഡിക്കൽ കോളജിൽ പരിശോധന നടത്തിയപ്പോഴാണ് വിവരം പുറത്തറിഞ്ഞത്. പരിശോധനയിൽ കുട്ടിയുടെ ശരീരത്തിൽ സൂചി തറച്ചിരിക്കുന്നതായി കണ്ടെത്തി. തുടർന്ന് കോഴിക്കോട് മെഡിക്കൽ കോളേജിൽ രണ്ട് ശസ്ത്രക്രിയകൾ നടത്തി സൂചി പുറത്തെടുത്തു.
സംഭവത്തിൽ ഒരു മാസം മുന്പ് ഗാന്ധിനഗർ പൊലിസിലും ആരോഗ്യമന്ത്രിക്കും പരാതി നൽകിയിട്ടും ഇതുവരെ നടപടി ഉണ്ടായിട്ടില്ലെന്ന് കുടുംബം ആരോപിക്കുന്നു.
Kerala
കൊച്ചി: ആലുവയില് നിന്ന് പിതാവിന്റെ നാടായ പഞ്ചാബിലേക്ക് പുറപ്പെട്ട പതിനാറുകാരിയെ ഗുജറാത്ത് ശിശുക്ഷേമ സമിതി താത്കാലികമായി ഏറ്റെടുത്തു. ഇതോടെ കുട്ടിയെ അമ്മയുടെ അടുത്തേക്ക് തിരികെ കൊണ്ടുവരാന് ഗുജറാത്തില് എത്തിയ പൊലിസ് അന്വേഷണ സംഘം ആലുവയിലേക്ക് മടങ്ങി.
കഴിഞ്ഞ 27നാണ് ആലുവയിലെ വനിതാ ഹോസ്റ്റലില് മാതാവിനൊപ്പം കിടന്നുറങ്ങിയ 16കാരിയെ കാണാതായത്. തുടര്ന്ന് നടത്തിയ അന്വേഷണത്തിലാണ് കുട്ടി പിതാവിന്റെ നാടായ പഞ്ചാബിലേക്ക് യാത്ര ചെയ്യുന്നതായി തിരിച്ചറിഞ്ഞത്. ഗുജറാത്തിലെ സൂറത്തില് എത്തിയ കുട്ടിയെ ഗുജറാത്ത് പൊലിസ് കണ്ടെത്തുകയായിരുന്നു.
മജിസ്ട്രേറ്റിന് മുന്നില് ഹാജരാക്കിയപ്പോള് ആലുവയിലേക്ക് മടങ്ങി വരാന് താത്പര്യമില്ലെന്ന് പെണ്കുട്ടി സൂറത്ത് കോടതിയെ അറിയിച്ചു. കേരളത്തിലുള്ള മാതാവിന്റെയും പഞ്ചാബിലുള്ള പിതാവിന്റെയും അടുക്കലേക്ക് പോകുന്നില്ലെന്ന നിലപാട് വ്യക്തമാക്കിയതിനെ തുടര്ന്നാണ് കുട്ടിയുടെ താത്പര്യ പ്രകാരം സംരക്ഷണം ഗുജറാത്ത് ശിശുക്ഷേമ സമിതി ഏറ്റെടുത്തത്. നേരത്തെ പിതാവിനെതിരെ പരാതി നല്കിയിട്ടുള്ള കുട്ടി പഞ്ചാബ് സിഡബ്ല്യുസിയുടെ സംരക്ഷണത്തിലും കഴിഞ്ഞിട്ടുണ്ട്.
അമ്മ ആലപ്പുഴയിലെ മറ്റൊരു മതസ്ഥനെ രണ്ടാം വിവാഹം കഴിച്ചതാണ് കുട്ടിയെ നാടുവിടാന് പ്രേരിപ്പിച്ചത്. മാതാവിന്റെ ആദ്യ വിവാഹത്തിലുള്ള മകളാണ്. ഏറെ നാള് പെണ്കുട്ടി പിതാവിനൊപ്പം പഞ്ചാബിലെ മൊഹാലിയിലായിരുന്നു. കാണാതാവുന്നതിനും 17 ദിവസം മുമ്പാണ് മാതാവിനൊപ്പം ആലുവയില് ഹോസ്റ്റലില് താമസമാരംഭിച്ചത്.
ആലുവയില് നിന്ന് പുറപ്പെടുന്നതിന് മുമ്പ് അമ്മയുടെ ഫോണ് നമ്പറുകളില് നിന്ന് വിളിച്ച നമ്പറുകള് കേന്ദ്രീകരിച്ച് നടത്തിയ അന്വേഷണത്തിലാണ് ഗുജറാത്തിലൂടെ യാത്രയിലാണെന്ന് വ്യക്തമായത്.
പഞ്ചാബിലെ ഭജന സംഘടനകളുമായി പെണ്കുട്ടിക്ക് ബന്ധമുണ്ടായിരുന്നതായി കണ്ടെത്തിയിട്ടുണ്ട്. ഇവരുടെ സംഘത്തില്പ്പെട്ട ഒരാള് ആലുവയിലെത്തി കുട്ടിയെ ബസ് മാര്ഗം ബംഗളൂരുവിലും അവിടെ നിന്നും ട്രെയിനില് പഞ്ചാബിലേക്കും കൊണ്ടുപോകുകയായിരുന്നു. പിതാവ് പഞ്ചാബില് മൊഹാലിയിലാണ് ജോലി ചെയ്യുന്നത്.
National
ന്യൂഡല്ഹി: രാജ്യത്തെ ഞെട്ടിച്ച് തലസ്ഥാനനഗരിയിൽ വീണ്ടും നിർഭയ മോഡൽ പീഡനം. സഞ്ചരിച്ചുകൊണ്ടിരുന്ന സ്ലീപ്പര് ബസില് ഉത്തര്പ്രദേശില്നിന്നുള്ള പതിനാറുകാരിയായ വിദ്യാർഥിനിയാണു ക്രൂരമായ കൂട്ടബലാത്സംഗത്തിന് ഇരയായത്. കഴിഞ്ഞ നാലിനു നടന്ന സംഭവം ഇന്നലെയാണു ഡൽഹി പൊലിസ് പുറത്തുവിട്ടത്.
സംഭവദിവസം രാത്രി ഡല്ഹിയിലെ കാഷ്മീരി ഗേറ്റ് മേഖലയിലുള്ള ഒരു സ്ലീപ്പര് ബസിൽ സംഭവം നടന്നതായാണ് പൊലിസ് നൽകുന്ന വിവരം. സംഭവവുമായി ബന്ധപ്പെട്ട് ബസ് ഡ്രൈവര് കുല്ദീപ്, കണ്ടക്ടര് സന്ദീപ് എന്നിവരെ അറസ്റ്റ് ചെയ്തു.
ഗ്രേറ്റര് നോയിഡയിലെ പരി ചൗക്ക് മുതല് കാഷ്മീരി ഗേറ്റ് ടെര്മിനല് വരെയുള്ള 47 കിലോമീറ്റര് പെണ്കുട്ടിയുമായി ബസ് സഞ്ചരിക്കുകയും കൂട്ടബലാത്സംഗത്തിന് ഇരയാക്കുകയും ചെയ്യുകയായിരുന്നു. അർധരാത്രിയോടെ കാഷ്മീരി ഗേറ്റിനു സമീപമുള്ള റിംഗ് റോഡില് പെണ്കുട്ടിയെ ഉപേക്ഷിച്ച് പ്രതികള് സംഭവസ്ഥലത്തുനിന്ന് രക്ഷപ്പെട്ടു. ഭയന്നുപോയ വിദ്യാര്ഥിനി കാഷ്മീരി ഗേറ്റ് പൊലിസുമായി ബന്ധപ്പെട്ട് വിവരങ്ങള് അറിയിക്കുകയായിരുന്നു.
പൊലിസ് വൃത്തങ്ങള് പറയുന്നതനുസരിച്ച്, ഉത്തര്പ്രദേശിലെ മൈന്പുരി ജില്ലക്കാരിയായ പതിനൊന്നാം ക്ലാസ് വിദ്യാര്ഥിനി വീട്ടുകാരുമായുള്ള അഭിപ്രായവ്യത്യാസത്തെത്തുടര്ന്ന് വീട്ടില്നിന്നിറങ്ങി നോയിഡയിലുള്ള ബന്ധുവീട്ടിലേക്ക് പോകുകയായിരുന്നു. കനത്ത മഴയും ഇരുട്ടും കാരണം വഴിതെറ്റിയ പെണ്കുട്ടി പരി ചൗക്ക് എന്ന പ്രദേശത്ത് ഇറങ്ങി. തുടര്ന്ന് കനത്ത മഴയില് ഒറ്റപ്പെട്ടുപോയ പെണ്കുട്ടി സഹായത്തിനായി ഒരു സ്ലീപ്പര് ബസിന് കൈ കാണിക്കുകയും ബസ് നിര്ത്തുകയും ചെയ്തു.
നോയിഡ സെക്ടര് 63ലേക്കാണു പോകുന്നതെന്നു പറഞ്ഞാണ് ഡ്രൈവറും കണ്ടക്ടറും പെണ്കുട്ടിയെ ബസില് കയറ്റിയത്. ബസില് മറ്റു യാത്രകാരുണ്ടായിരുന്നില്ല. പെണ്കുട്ടിയുടെ മൊഴിപ്രകാരം ബസ് നീങ്ങിത്തുടങ്ങി അധികം വൈകാതെതന്നെ കണ്ടക്ടര് ലൈംഗികച്ചുവയോടെ മോശമായി പെരുമാറാനും ഡ്രൈവറുമായി ചേര്ന്ന് ബലാത്സംഗത്തിനു ശ്രമിക്കുകയും ചെയ്തു.
എതിര്ത്തപ്പോള് കൊല്ലുമെന്ന് ഭീഷണിപ്പെടുത്തി കൂട്ടബലാത്സംഗം ചെയ്തെന്നും കുട്ടി മൊഴി നൽകിയതായി പൊലിസ് പറഞ്ഞു.
National
ഗാസിയാബാദ്: നൂഡിൽസ് വാങ്ങാന് പോയ 13 വയസുകാരിയെ തട്ടിക്കൊണ്ടുപോയി പീഡിപ്പിച്ച കേസിൽ മൂന്ന് കൗമാരക്കാർ അറസ്റ്റിൽ. പ്രതികളിൽ രണ്ട് പേര് പ്രായപൂർത്തിയാകാത്തവരാണെന്ന് പോലീസ് അറിയിച്ചു.
വേവ് സിറ്റിയിലെ വീടിനു സമീപത്തുള്ള കടയിൽ നൂഡിൽസ് വാങ്ങാൻ പോയതാണ് ഏഴാം ക്ലാസുകാരി. ഈ സമയത്താണ് മൂന്ന് കൗമാരക്കാർ ചേർന്ന് കുട്ടിയെ തട്ടിക്കൊണ്ടുപോയത്. കുട്ടി പഠിക്കുന്ന അതേ സ്കൂളിൽ പത്താം ക്ലാസിൽ പഠിക്കുന്ന വിദ്യാർഥിയും മറ്റു രണ്ടു പേരും ചേർന്ന് പത്താം ക്ലാസുകാരന്റെ ബന്ധുവിന്റെ വീട്ടിലേക്കാണ് പെൺകുട്ടിയെ തട്ടിക്കൊണ്ടുപോയത്. ആളൊഴിഞ്ഞ ഈ വീട്ടിൽ വച്ചായിരുന്നു അതിക്രമം.
സംഭവത്തിനു പിന്നാലെ വീട്ടിലെത്തിയ കുട്ടിയോട് വൈകിയത് എന്താണെന്ന് ചോദിച്ചപ്പോഴാണ് പീഡനവിവരം പറയുന്നത്. പിന്നിലെ കുട്ടിയുടെ മാതാവ് പോലീസിൽ പരാതി നൽകുകയായിരുന്നു.
Kerala
കൊച്ചി: ആലുവയില് വനിത ഹോസ്റ്റലില് അമ്മയോടൊപ്പം ഉറങ്ങാന് കിടന്ന 16കാരിയെ കാണാനില്ലെന്ന് പരാതി. ഹോസ്റ്റലില് താമസിച്ചിരുന്ന രഞ്ജിതയുടെ മകള് ആരതി സുരേഷിനെയാണ് കാണാതായത്. രാവിലെ ഉണര്ന്നപ്പോഴാണ് മകളെ കാണാനില്ലെന്ന വിവരം അമ്മ അറിയുന്നത്.
അമ്മ നല്കിയ പരാതിയുടെ അടിസ്ഥാനത്തില് ആലുവ പോലീസ് കേസ് എടുത്ത് അന്വേഷണം ആരംഭിച്ചു. പെണ്കുട്ടിയുടെ അമ്മയുടെ ആദ്യ ഭര്ത്താവ് പഞ്ചാബ് സ്വദേശിയാണ്. അടുത്തിടെ ആലപ്പുഴ സ്വദേശിയെ രണ്ടാമത് വിവാഹം കഴിച്ചു. ഇതോടെ പിതാവിന്റെ സ്വദേശമായ പഞ്ചാബിലേക്ക് കുട്ടി കടന്നതായാണ് പോലീസ് സംശയിക്കുന്നത്.
കാണാതാകുന്നതിന് മുമ്പ് പെണ്കുട്ടി അമ്മയുടെ മൊബൈല് ഫോണില് നിന്നും പഞ്ചാബിലെ ചില നമ്പറുകളിലേക്ക് തുടര്ച്ചയായി വിളിച്ചതായി പ്രാഥമിക അന്വേഷണത്തില് കണ്ടെത്തി. പെണ്കുട്ടി ആലുവ റെയില്വേ സ്റ്റേഷനില് നിന്ന് പഞ്ചാബിലേക്ക് കടന്നിട്ടുണ്ടോ എന്ന സംശയത്തില് പഞ്ചാബ് പോലീസുമായി ആലുവ പോലീസ് ബന്ധപ്പെട്ടിട്ടുണ്ട്.
Kerala
കൊല്ലം: ഓട്ടിസം ബാധിച്ച പെൺകുട്ടിയെ പീഡിപ്പിച്ച സംഭവത്തിൽ യുവാവ് അറസ്റ്റിൽ. പൂതക്കുളം വലിയവിള പുത്തൻവീട്ടിൽ ടി.ശരത് (37) ആണ് പിടിയിലായത്. പരവൂർ കലക്കോട് സ്വദേശിയായ പെൺകുട്ടിയാണ് പീഡനത്തിന് ഇരയായത്.
പരവൂർ പോലീസിന്റെ പിടിയിലായ ശരത് റിമാൻഡിലാണ്. പോക്സോ ഉൾപ്പെടെയുള്ള വകുപ്പുകൾ ചുമത്തിയാണ് കേസ് എടുത്തിരിക്കുന്നത്. 2024 ൽ പിതാവ് ശശിയെ കൊലപ്പെടുത്തിയ കേസിൽ പ്രതിയായിരുന്നു ശരത്. ഈ കേസിൽ ശരത്തിനെ കോടതി വെറുതെ വിട്ടിരുന്നു.
Kerala
വടക്കാഞ്ചേരി: മൂന്നുവയസുകാരിയെ ലൈംഗികമായി പീഡിപ്പിച്ച കേസിൽ പ്രതിക്ക് 11 വർഷം കഠിനതടവും 60,000 രൂപ പിഴയും ശിക്ഷ. പന്നിത്തടം നീണ്ടൂർ സ്വദേശി ഇബ്രാഹിമി (63)നെയാണ് വടക്കാഞ്ചേരി ഫാസ്റ്റ് ട്രാക്ക് പോക്സോ സ്പെഷൽ കോടതി ജഡ്ജ് എസ്. സുധീഷ് കുമാർ ശിക്ഷിച്ചത്.
എരുമപ്പെട്ടി പോലീസ് എസ്ഐ കെ.എസ്. ഓമന രേഖപ്പെടുത്തിയ മൊഴിയുടെ അടിസ്ഥാനത്തിൽ എസ്ഐ ജോണിയാണ് കേസ് അന്വേഷിച്ച് കുറ്റപത്രം സമർപ്പിച്ചത്.
പ്രോസിക്യൂഷൻ 15 സാക്ഷികളെ വിസ്തരിച്ചു. 23 രേഖകൾ തെളിവായി ഹാജരാക്കി. പ്രോസിക്യൂഷനുവേണ്ടി സ്പെഷൽ പബ്ലിക് പ്രോസിക്യൂട്ടർ അഡ്വ. ഇ.എ. സീനത്ത് ഹാജരായി.
പിഴത്തുക അടയ്ക്കുന്നപക്ഷം അതിജീവിതയ്ക്കു നൽകാനും അല്ലാത്തപക്ഷം വിവിധ വകുപ്പുകളിലായി ഒരു വർഷം അധികതടവ് അനുഭവിക്കുന്നതിനും വിധിച്ചിട്ടുണ്ട്. അതിജീവിതയുടെ സഹോദരിക്കെതിരേ ലൈംഗികാതിക്രമം നടത്തിയ കേസിൽ കോടതി നേരത്തേ ഇയാളെ ശിക്ഷിച്ചിരുന്നു.
Kerala
കൊച്ചി: കമ്പ്യൂട്ടര് ക്ലാസില് പോയ 20 വയസുകാരിയെ കാണാനില്ലെന്ന് പരാതി. അമ്മ മുളവുകാട് പോലീസില് പരാതി നല്കി. വല്ലാര്പാടം സ്വദേശിനിയെയാണ് കാണാതായത്.
ചൊവ്വാഴ്ച രാവിലെ കലൂരിലുള്ള കമ്പ്യൂട്ടര് ക്ലാസിലേക്ക് പോയതാണ്. എന്നാല് വൈകുന്നേരമായിട്ടും തിരികെ വരാതിരുന്ന സാഹചര്യത്തിലാണ് അമ്മ പോലീസില് പരാതി നല്കിയത്.
പോലീസ് കേസ് എടുത്ത് അന്വേഷണം ആരംഭിച്ചിട്ടുണ്ട്.
National
മുംബൈ: മഹാരാഷ്ട്രയിൽ 19 വയസുകാരിയെ ആറംഗ സംഘം തട്ടിക്കൊണ്ടുപോയി പീഡിപ്പിച്ചതായി പരാതി. സുഹൃത്തിനൊപ്പം റോഡരികില് നില്ക്കുകയായിരുന്ന യുവതിയാണ് അതിക്രമത്തിന് ഇരയായതെന്ന് പോലീസ് അറിയിച്ചു.
തിങ്കളാഴ്ച മഹാരാഷ്ട്രയിലെ പാല്ഘര് ജില്ലയിലെ തലാസരി താലൂക്കിലാണ് സംഭവം. റോഡരികില് നില്ക്കുകയായിരുന്ന യുവതിയെ രണ്ട് ബൈക്കുകളിലെത്തിയ ആറുപേര് ചേര്ന്ന് വിജനമായ ഒരു ബംഗ്ലാവിലേക്ക് വലിച്ചിഴച്ചുകൊണ്ടുപോയി പീഡിപ്പിക്കുകയായിരുന്നുവെന്ന് പോലീസ് അറിയിച്ചു.
സംഭവത്തില് ആറ് പേർക്കെതിരെ തലാസരി പോലീസ് കേസ് രജിസ്റ്റര് ചെയ്തു. ഇവരില് ഒരാളെ അറസ്റ്റ് ചെയ്യുകയും മൂന്ന് പേരെ കസ്റ്റഡിയിലെടുക്കുകയും ചെയ്തു. ഒളിവില് കഴിയുന്ന മറ്റുള്ളവര്ക്കായുള്ള തെരച്ചിൽ ഊർജ്ജിതമായി നടക്കുകയാണെന്ന് പോലീസ് അറിയിച്ചു.
Kerala
പത്തനംതിട്ട: മലയാലപ്പുഴയിൽ പത്താം ക്ലാസ് വിദ്യാർത്ഥിനിയെ ലൈംഗികമായി പീഡിപ്പിച്ച കേസിൽ ഒരാളെക്കൂടി പോലീസ് അറസ്റ്റ് ചെയ്തു. പെരുനാട് സ്വദേശി അജികുമാർ (52) ആണ് പിടിയിലായത്.
കേസിൽ വ്യാഴാഴ്ച മൂന്ന് പേരെ പോലീസ് അറസ്റ്റ് ചെയ്തിരുന്നു. ഇതോടെ കേസിൽ അറസ്റ്റിലായവരുടെ ആകെ എണ്ണം നാലായി.
കുട്ടിയുടെ പിതാവും പെൺകുട്ടിയെ ലൈംഗികമായി പീഡിപ്പിച്ചിരുന്നു. ആകെ ഏഴ് പേരാണ് ഈ കേസിൽ പ്രതികളായിട്ടുള്ളത്. ഇതിൽ പ്രതികളായ അച്ഛനും മറ്റൊരാളും വിദേശത്താണ് ഉള്ളത്. ഇവരെ നാട്ടിലെത്തിക്കാനുള്ള ശ്രമങ്ങൾ പോലീസ് ഊർജ്ജിതമാക്കിയിട്ടുണ്ട്.
ഏഴാം ക്ലാസിലെ അവധിക്കാലത്താണ് പിതാവ് കുട്ടിയെ ആദ്യമായി പീഡിപ്പിച്ചത്. പിന്നീട് പലവട്ടം ഈ ക്രൂരത തുടർന്നു എന്നാണ് പെൺകുട്ടി പോലീസിന് നൽകിയിരിക്കുന്ന മൊഴി. സഹപാഠികളോടാണ് കുട്ടി തനിക്ക് നേരിടേണ്ടി വന്ന പീഡനവിവരങ്ങൾ ആദ്യം തുറന്നുപറഞ്ഞത്.
തുടർന്ന് ചൈൽഡ് ലൈൻ വഴി വിവരം പൊലീസിന് ലഭിക്കുകയായിരുന്നു. വ്യത്യസ്ത കാലയളവില് നടന്ന കേസുകളായതുകൊണ്ട് പോലീസ് വിവിധ എഫ്ഐആറുകൾ രജിസ്റ്റർ ചെയ്താണ് അന്വേഷണം മുന്നോട്ട് കൊണ്ടുപോകുന്നത്.
Kerala
കൊച്ചി: കരുമാല്ലൂരില് നിന്നും കാണാതായ 12കാരിയെ തട്ടിക്കൊണ്ടു പോയ അഭിജിത്ത് ലഹരിക്കേസിലെ പ്രതി. 2023ല് കൊല്ലം ഓച്ചിറ സ്റ്റേഷനില് രജിസ്റ്റര് ചെയ്ത കേസിലെ പ്രതിയാണ് അഭിജിത്ത്. പെണ്കുട്ടിയെയും കൊണ്ടു ഡല്ഹിയിലേക്ക് വരാന് പറഞ്ഞ സുഹൃത്തിനെയും പോലീസ് ചോദ്യം ചെയ്യും.
പൂനെയില് നിന്നും കണ്ടെത്തിയ പെണ്കുട്ടിയെയും പ്രതിയെയും പോലീസ് ആലുവ വെസ്റ്റ് പോലീസ് സ്റ്റേഷനില് എത്തിച്ചു. ആറു മാസമായി ചെറായില് ഐസ്ക്രീം വില്പ്പന നടത്തുകയായിരുന്നു പ്രതി. പെണ്കുട്ടിയുടെ വൈദ്യ പരിശോധന നടത്തി കോടതിയില് ഹാജരാക്കിയ ശേഷമാകും കുട്ടിയെ ബന്ധുകള്ക്ക് വിട്ടു നല്കുക.
മംഗലാപുരം, ഗോവ, ധാരാവി എന്നിവിടങ്ങളില് അടക്കം സഞ്ചരിച്ച ശേഷമാണ് പൂനെ വഴി നിസാമുദീന് എക്സ്പ്രസില് ഡല്ഹിയിലേക്ക് പോകാന് ശ്രമിച്ചത്. ഡല്ഹിയിലുള്ള സുഹൃത്താണ് പെണ്കുട്ടിയെ അങ്ങോട്ട് കൊണ്ടുവരാനായി പറഞ്ഞത്.
Kerala
കോഴിക്കോട്: നരിക്കുനി കാരുകുളങ്ങര പുതുശേരിപാലത്തിന് സമീപം തോട്ടിൽ വീണ് അഞ്ചു വയസ്സുകാരി മരിച്ചു. കാവുംപൊയിൽ വയപ്പുറം കൊട്ടയോട്ട് താഴം വേലാകണ്ടിയിൽ റഊഫ് - സബീന ദമ്പതികളുടെ മകൾ ഹന ഫാത്തിമ (അഞ്ച്) ആണ് മരിച്ചത്.
തോട്ടിൽ വീണ കുട്ടിയെ ഉടൻ തന്നെ എളേറ്റിൽ വട്ടോളിയിലെ സ്വകാര്യ ആശുപത്രിയിൽ എത്തിച്ചെങ്കിലും, വിദഗ്ധ ചികിത്സയ്ക്കായി കോഴിക്കോട് മെഡിക്കൽ കോളജ് ആശുപത്രിയിലേക്ക് മാറ്റുകയായിരുന്നു. എന്നാൽ ജീവൻ രക്ഷിക്കാനായില്ല.
മൂർഖൻകുണ്ട് നെടിയനാട് ജിഎംഎൽപി സ്കൂളിലെ എൽകെജി വിദ്യാർഥിയാണ് ഹന ഫാത്തിമ. മരണത്തെ തുടർന്ന് ആശുപത്രിയിൽ എത്തിച്ച കുട്ടിയുടെ മൃതദേഹം മെഡിക്കൽ കോളജ് ആശുപത്രി മോർച്ചറിയിലേക്ക് മാറ്റി.
Kerala
മാനന്തവാടി: രക്ഷിതാക്കളറിയാതെ അര്ധരാത്രി പതിനാറുകാരിയെ വീട്ടില്നിന്നു കൂട്ടിക്കൊണ്ടുപോയി മദ്യം നല്കുകയും സിഗരറ്റ് വലിപ്പിക്കുകയും ചെയ്ത കേസില് നാല് പേര് പിടിയില്.
തൃശിലേരി മുത്തുമാരി കണ്ണഞ്ചിറ റോബിന് കെ. ജോയ് (20), മാനന്തവാടി കല്ലിയോട്ടുകുന്ന് ലിജു നിവാസില് അമല് കൃഷ്ണ (20), കുറ്റിമൂല കള്ളമ്പറമ്പില് കെ.വി. ജിതിന് (22), എടവക, ചാമാടിപ്പൊയില് ചിറക്കല് സി. അജിത്കുമാര് (23)എന്നിവരാണ് അറസ്റ്റിലായത്. കോടതിയില് ഹാജരാക്കിയ ഇവരെ റിമാന്ഡ് ചെയ്തു.
കഴിഞ്ഞ 12നാണ് കേസിനാസ്പദമായ സംഭവം. യുവാക്കള് നല്കിയ മദ്യം കഴിക്കുകയും സിഗരറ്റ് വലിക്കുകയും ചെയ്ത പെണ്കുട്ടി പിന്നീട് അമല് കൃഷ്ണയ്ക്കൊപ്പം സഞ്ചരിച്ച ബൈക്ക് കണിയാരത്തിന് സമീപം അപകടത്തില്പ്പട്ടു. ഗുരുതരമായി പരിക്കേറ്റ പെണ്കുട്ടി കോഴിക്കോട് മെഡിക്കല് കോളജ് ആശുപത്രിയില് ചികിത്സയിലാണ്.
ഇന്സ്പെക്ടര് പി. റഫീഖ്, എസ്ഐമാരായ കെ.കെ. സോബിന്, മുഹമ്മദ് അലി, സുനില് കുമാര്, സിപിഒമാരായ നിസാര്, എം.ആര്. രമേഷ്, കെ.ആര്. അനീഷ്, ഷിന്റോ എന്നിവരടങ്ങുന്ന സംഘമാണ് പ്രതികളെ അറസ്റ്റുചെയ്തത്.
Kerala
കൊച്ചി: കരുമാല്ലൂരില് നിന്നും കാണാതായ 12കാരിയെയും തട്ടിക്കൊണ്ടുപോയ യുവാവിനെയും ഇന്ന് വൈകുന്നേരത്തോടെ ആലുവയിലെത്തിക്കും. ശനിയാഴ്ച കാണാതായ പെണ്കുട്ടിയെ ചൊവ്വാഴ്ച പൂന റെയില്വേ സ്റ്റേഷനില് നിസാമുദീന് എക്സ്പ്രസില് നിന്നാണ് പോലീസ് കണ്ടെത്തിയത്.
മുനമ്പം ഭാഗത്ത് ഐസ്ക്രീം വില്പ്പന നടത്തിയിരുന്ന കൊല്ലം ക്ലാപ്പന വരവിള ക്രിസ്ത്യന് തറ വീട്ടില് അഭിജിത്തിന് (25) ഒപ്പമാണ് പെണ്കുട്ടി പോയത്. ഇന്സ്റ്റഗ്രാം വഴിയാണു യുവാവും വിദ്യാര്ഥിനിയും പരിചയത്തിലാകുന്നത്. ഒരു വര്ഷത്തോളമായി ഇരുവരും സുഹൃത്തുക്കളായിട്ട്.
യുവാവ് മൊബൈല് ഫോണ് സ്വിച്ച് ഓഫ് ചെയ്തിരുന്നുവെങ്കിലും ഇടയ്ക്ക് ഓണ് ചെയ്തിരുന്നു. യുവാവിന്റെ സുഹൃത്തുക്കള് വഴി ഇന്സ്റ്റഗ്രാമിലൂടെ മെസേജ് അയച്ചാണ് ലൊക്കേഷന് കണ്ടെത്തിയത്. ആലുവയില് എത്തിക്കുന്ന പെണ്കുട്ടിയെ വൈദ്യപരിശോധനയ്ക്ക് വിധേയമാക്കും.
ശനിയാഴ്ച കൂട്ടുകാരിയുടെ വീട്ടില് പുസ്തകം വാങ്ങാനെന്നു പറഞ്ഞു പോയ വിദ്യാര്ഥിനി ഏറെ വൈകിയും വീട്ടില് തിരികെയെത്താത്തതിനെ തുടര്ന്നു ബന്ധുക്കള് പോലീസില് പരാതി നല്കുകയായിരുന്നു.
Kerala
അമരാവതി: ആന്ധ്രാപ്രദേശ് മുഖ്യമന്ത്രി എൻ. ചന്ദ്രബാബു നായിഡു പങ്കെടുത്ത പൊതുപരിപാടിയിൽ അവതാരകയായി ശ്രദ്ധനേടിയ പത്താം ക്ലാസ് വിദ്യാർഥിനിയെ മരിച്ച നിലയിൽ കണ്ടെത്തി. പോളവാരം ജില്ലയിലെ രാമ്പചോഡവരം സ്വദേശിനി മുർറം ശിവാനി (15) ആണ് മരിച്ചത്.
മൂന്ന് ദിവസങ്ങൾക്ക് മുമ്പാണ് മുഖ്യമന്ത്രിയുടെ സാന്നിധ്യത്തിൽ നടന്ന ചടങ്ങിൽ പെൺകുട്ടി സജീവമായി പങ്കെടുകയും അദ്ദേഹത്തോടൊപ്പം സെൽഫിയെടുക്കുകയും ചെയ്തത്. ഇർലപ്പള്ളിയിലെ മുത്തശിയുടെ വീട്ടിലാണ് ശിവാനിയെ ജീവനൊടുക്കിയ നിലയിൽ കണ്ടെത്തിയത്.
സംഭവസ്ഥലത്തുനിന്ന് പോലീസ് ആത്മഹത്യാക്കുറിപ്പ് വീണ്ടെടുത്തിട്ടുണ്ട്. സ്വപ്നങ്ങൾ സാക്ഷാത്കരിക്കാൻ ആഗ്രഹിച്ചിരുന്നെങ്കിലും ജീവിതം കഠിനമായി തോന്നുന്നുവെന്നും മാതാപിതാക്കൾ ക്ഷമിക്കണമെന്നുമാണ് കത്തിൽ കുറിച്ചിരിക്കുന്നത്.
ഈ മാസം 24-നായിരുന്നു രാമ്പചോഡവരത്തെ സർക്കാർ സ്കൂളിൽ മുഖ്യമന്ത്രി ചന്ദ്രബാബു നായിഡു പങ്കെടുത്ത പരിപാടി നടന്നത്. ചടങ്ങിന്റെ അവതാരകയായി മികവ് പുലർത്തിയ ശിവാനി പ്രദേശവാസികളുടെയും അധികൃതരുടെയും പ്രശംസ പിടിച്ചുപറ്റിയിരുന്നു. വിദ്യാർഥിനിയുടെ അപ്രതീക്ഷിത വേർപാടിൽ മുഖ്യമന്ത്രി ചന്ദ്രബാബു നായിഡു ദുഃഖവും അനുശോചനവും രേഖപ്പെടുത്തി. സംഭവത്തെക്കുറിച്ച് സമഗ്രമായ അന്വേഷണം നടത്താൻ അദ്ദേഹം ഉദ്യോഗസ്ഥർക്ക് നിർദേശം നൽകിയിട്ടുണ്ട്.
ശ്രദ്ധിക്കുക: ആത്മഹത്യ ഒന്നിനും പരിഹാരമല്ല. അതിജീവിക്കാൻ ശ്രമിക്കുക. മാനസികാരോഗ്യ വിദഗ്ധരുടെ സഹായം തേടുക. അത്തരം ചിന്തകളുള്ളപ്പോൾ 'ദിശ' ഹെൽപ് ലൈനിൽ വിളിക്കുക. ടോൾ ഫ്രീ നമ്പർ: 1056, 0471- 2552056
Kerala
കൊച്ചി: ആലുവ കരുമാല്ലൂരില് നിന്നും കാണാതായ 12കാരിയെ നാലു ദിവസമായിട്ടും കണ്ടെത്താനാകാതെ പോലീസ്. കഴിഞ്ഞ ശനിയാഴ്ച മുതലാണ് പെണ്കുട്ടിയെ കാണാതായത്. കൂട്ടുകാരിയില് നിന്നും പുസ്തകം വാങ്ങാനുണ്ടെന്ന് പറഞ്ഞ് വീട്ടില് നിന്നുമിറങ്ങിയ കുട്ടി തിരിച്ചെത്തിയില്ല.
വൈകിട്ട് നടത്തിയ തെരച്ചിലില് കുട്ടിയെ കണ്ടെത്താനാകാത്തതിനെ തുടര്ന്നാണ് ആലുവ വെസ്റ്റ് പോലീസ് സ്റ്റേഷനില് പരാതി നല്കിയത്. കുട്ടിയുടെ കൈയില് അമ്മയുടെ മൊബൈല് ഫോണ് ഉണ്ടായിരുന്നുവെങ്കിലും അത് സ്വിച്ച് ഓഫ് ആണ്.
ഫോണ് ഇടയ്ക്ക് കാസര്ഗോഡ് വച്ച് ഓണ് ആയിരുന്നു. പിന്നീട് മംഗലാപുരത്തും മുംബൈയിലുമാണ് ലൊക്കേഷന് കാണിച്ചത്. അതിനാല് കേരളത്തിന് പുറത്തേക്കും പോലീസ് അന്വേഷണം വ്യാപിപ്പിച്ചിട്ടുണ്ട്.
National
ചിദംബരം(തമിഴ്നാട്): തുടർച്ചയായുള്ള വിവാഹാഭ്യർഥന നിരസിച്ചതിൽ പെൺകുട്ടിയുടെ കഴുത്തിൽ കുത്തി. അക്രമിയെ പിന്നീട് ജീവനൊടുക്കിയ നിലയിൽ കണ്ടെത്തി.
കൂടല്ലൂരിലെ കീഴമൂങ്കിലാടി ഗ്രാമത്തിലെ പെൺകുട്ടിയുടെ വീട്ടിൽ ഞായറാഴ്ചയായിരുന്നു സംഭവം. പെൺകുട്ടിയുടെ വീട്ടിൽ വയറിംഗ് ജോലികൾക്കായി എത്തിയ അയ്യപ്പൻ(27) പെൺകുട്ടിയുമായി അടുപ്പത്തിലാകുകയും വിവാഹാഭ്യർഥന നടത്തുകയുമായിരുന്നു.
ഇതു നിഷേധിച്ചതോടെ അമ്മയില്ലാത്ത സമയത്ത് വീട്ടിൽ അതിക്രമിച്ചുകയറി ഇയാൾ പെൺകുട്ടിയുടെ കഴുത്തിൽ കത്തിയശേഷം ഓടിരക്ഷപ്പെടുകയായിരുന്നു.
ചിദംബരം സർക്കാർ ആശുപത്രിയിൽ ചികിത്സയിലുള്ള പെൺകുട്ടിയുടെ ആരോഗ്യനില മോശമാണെന്ന് ഡോക്ടർമാർ അറിയിച്ചു.
പോലീസ് തെരച്ചിൽ നടത്തുന്നതറിഞ്ഞ ഇയാളെ പിന്നീട് ജീവനൊടുക്കിയ നിലയിൽ കണ്ടെത്തുകയായിരുന്നു.
Kerala
പത്തനംതിട്ട: അടൂർ ജനറൽ ആശുപത്രിക്ക് മുൻവശം പട്ടാപ്പകൽ നടുറോഡിൽ വച്ച് പെൺകുട്ടിയെ പീഡിപ്പിക്കാൻ ശ്രമിച്ച കേസിൽ പ്രതി അറസ്റ്റിൽ. അടൂർ ഏറത്ത് വയല സ്വദേശി ഗോപി (57) എന്നയാളാണ് അറസ്റ്റിലായത്.
അടൂർ പോലീസാണ് ഇയാളെ അറസ്റ്റ് ചെയ്തത്. തിങ്കളാഴ്ച ഉച്ചകഴിഞ്ഞാണ് സംഭവം. അടൂർ ജനറൽ ആശുപത്രിക്ക് സമീപം റോഡിലൂടെ നടന്നുവരികയായിരുന്ന പെൺകുട്ടിയെ പ്രതി കടന്നു പിടിക്കുകയും ഉപദ്രവിക്കാൻ ശ്രമിക്കുകയും ആയിരുന്നു. എതിർത്ത പെൺകുട്ടിയെ ഇയാൾ അടിക്കുകയും ചെയ്തു.
പെൺകുട്ടിയുടെ മൊഴി രേഖപ്പെടുത്തി കേസ് രജിസ്റ്റർ ചെയ്ത അടൂർ പോലീസ് വളരെ വേഗം പ്രതിയെ അന്വേഷിച്ച് കണ്ടെത്തി അറസ്റ്റ് ചെയ്യുകയായിരുന്നു. അടൂർ പോലീസ് സ്റ്റേഷൻ സബ് ഇൻസ്പെക്ടർ ദീപു, പോലീസ് ഉദ്യോഗസ്ഥരായ അനീഷ്, നിധിൻ, അജിൻ എന്നിവർ അടങ്ങിയ സംഘമാണ് പ്രതിയെ അറസ്റ്റ് ചെയ്തത്. കോടതിയിൽ ഹാജരാക്കിയ ഇയാളെ റിമാൻഡ് ചെയ്തു.