19

സോഷ്യൽ മീഡിയയിലെ പുതിയ വരുമാനമാർഗമായ സബ്സ്ക്രിപ്ഷൻ മോഡലിലേക്ക് ചുവടുവെച്ച് നടി അന്ന രാജനും. സിനിമ-സോഷ്യൽ മീഡിയ രംഗത്തെ പ്രമുഖർ തങ്ങളുടെ പ്രത്യേക ഉള്ളടക്കങ്ങൾ ആരാധകരിലേക്ക് എത്തിക്കാൻ ഈ സംവിധാനം ഉപയോഗിക്കുന്നതിനിടയിലാണ് അന്നയുടെയും കടന്നുവരവ്.

മറ്റ് പ്ലാറ്റ്‌ഫോമുകളിൽ ലഭ്യമാകാത്ത ഫോട്ടോകളും വീഡിയോകളും വിശേഷങ്ങളുമാണ് സബ്സ്ക്രിപ്ഷൻ എടുക്കുന്നവർക്കായി താരം പങ്കുവെക്കുന്നത്. 'എന്‍റെ ലോകത്തേക്ക് കൂടുതൽ അടുക്കാം' എന്ന ക്ഷണത്തോടെയാണ് അന്ന രാജൻ ഇൻസ്റ്റാഗ്രാമിലൂടെ സബ്സ്ക്രിപ്ഷൻ വിവരങ്ങൾ പങ്കുവെച്ചത്.

നിലവിൽ പ്രതിമാസം 390 രൂപയാണ് ഇതിനായി നിശ്ചയിച്ചിരിക്കുന്നത്. ഇതിനോടകം തന്നെ നൂറോളം സ്റ്റോറികളും നിരവധി വീഡിയോകളും ഈ എക്സ്ക്ലൂസീവ് വിഭാഗത്തിൽ താരം പോസ്റ്റ് ചെയ്തിട്ടുണ്ട്. ഏകദേശം 600 -ലധികം ആരാധകർ നിലവിൽ ഈ പ്ലാൻ സ്വീകരിച്ചിട്ടുണ്ട്.

ലിജോ ജോസ് പെല്ലിശ്ശേരി സംവിധാനം ചെയ്ത 'അങ്കമാലി ഡയറീസ്' എന്ന ചിത്രത്തിലെ ലിച്ചി എന്ന കഥാപാത്രത്തിലൂടെയാണ് അന്ന രാജൻ പ്രേക്ഷകരുടെ പ്രിയങ്കരിയായത്. തുടർന്ന് മോഹൻലാലിനൊപ്പം 'വെളിപ്പാടിന്‍റെ പുസ്തകം', 'അയ്യപ്പനും കോശിയും', 'മധുരരാജ' തുടങ്ങി ശ്രദ്ധേയമായ നിരവധി സിനിമകളിൽ വേഷമിട്ടു.

സിനിമകൾക്ക് പുറമെ പൊതുവേദികളിലും ഉദ്ഘാടന ചടങ്ങുകളിലും സജീവമായ താരം പലപ്പോഴും സൈബർ ആക്രമണങ്ങൾക്കും ബോഡി ഷെയ്മിങ്ങിനും ഇരയായിട്ടുണ്ട്. അടുത്തിടെ ആറ്റുകാൽ പൊങ്കാലയുമായി ബന്ധപ്പെട്ട് തന്നെ മോശമായി ചിത്രീകരിച്ച ചില ഓൺലൈൻ മാധ്യമങ്ങൾക്കെതിരെ താരം ശക്തമായി പ്രതികരിച്ചത് വാർത്തയായിരുന്നു.

സ്വന്തം വ്യക്തിജീവിതവും വിശേഷങ്ങളും കൃത്യമായി ആരാധകരിലേക്ക് നേരിട്ടെത്തിക്കുക എന്ന ലക്ഷ്യത്തോടെയാണ് പുതിയ ചുവടുവെപ്പിലൂടെ നടി ലക്ഷ്യമിടുന്നത്.

Tags : AnnaRajan Lichy AngamalyDiaries InstagramSubscription MalayalamCinema