ചങ്ങനാശേരി: സീറോമലബാര് സഭ പ്രഖ്യാപിച്ചിരിക്കുന്ന സമുദായ ശക്തീകരണവര്ഷം - 2026 ന്റെ ചങ്ങനാശേരി അതിരൂപതാതല ഉദ്ഘാടനം നാളെ ഉച്ചകഴിഞ്ഞ് രണ്ടിന് കുറുമ്പനാടം സെന്റ് ആന്റണീസ് ഫൊറോനാപള്ളിയിലെ ആര്ച്ച്ബിഷപ് മാര് ജോസഫ് പവ്വത്തില് നഗറില് നടക്കും. ആര്ച്ച്ബിഷപ് മാര് തോമസ് തറയില് ഉദ്ഘാടനം നിര്വഹിക്കും. ആര്ച്ച്ബിഷപ് എമിരിറ്റസ് മാര് ജോസഫ് പെരുന്തോട്ടം അനുഗ്രഹപ്രഭാഷണം നടത്തും.
ക്രിസ്ത്യന് ന്യൂനപക്ഷങ്ങള്ക്കായുള്ള പഠന കമ്മീഷന് ചെയര്മാനായിരുന്ന റിട്ട. ജസ്റ്റീസ് ജെ.ബി. കോശി മുഖ്യാതിഥിയായിരിക്കും. കത്തോലിക്കാ കോണ്ഗ്രസ് ഗ്ലോബല് പ്രസിഡന്റ് രാജീവ് കൊച്ചുപറമ്പില് മാര്ഗനിര്ദേശ പ്രഭാഷണവും അതിരൂപത വികാരി ജനറാള് മോണ്. ആന്റണി എത്തയ്ക്കാട്ട് ആമുഖ പ്രഭാഷണവും നടത്തും.
കുറുമ്പനാടം ഫൊറോനാപള്ളി വികാരി റവ. ഡോ. ചെറിയാന് കറുകപ്പറമ്പില് സമ്മേളനനഗരിയെ പരിചയപ്പെടുത്തും. അതിരൂപത കത്തോലിക്കാ കോണ്ഗ്രസ്, യുവദീപ്തി എസ്എംവൈഎം ഡയറക്ടര് റവ. ഡോ. സാവിയോ മാനാട്ട് പതാകയുയര്ത്തും. അതിരൂപത പിആര്ഒ അഡ്വ. ജോജി ചിറയില് പ്രമേയാവതരണം നടത്തും. അതിരൂപതാ പാസ്റ്ററല് കൗണ്സില് സെക്രട്ടറി ഡോ. രേഖാ മാത്യൂസ്, അതിരൂപത കത്തോലിക്കാ കോണ്ഗ്രസ് പ്രസിഡന്റ് ബിജു സെബാസ്റ്റ്യന്, ഫാ. ജേക്കബ് കാട്ടടി, ഫാ. ജയിംസ് കൊക്കാവയലില്, ബിനു ഡൊമനിക് തുടങ്ങിയവര് പ്രസംഗിക്കും.
തദ്ദേശ സ്വയംഭരണ തെരഞ്ഞെടുപ്പില് അധ്യക്ഷന്മാരായി സ്ഥാനമേറ്റ അതിരൂപതാംഗങ്ങള്, വ്യാപാരി വ്യവസായികളുടെ പ്രതിനിധി ടോം ജോസഫ് കളരിപ്പറമ്പില്, യുവകര്ഷകരുടെ പ്രതിനിധി ജോളി ജോസഫ് മഠത്തിപ്പറമ്പില് എന്നിവരെ ആദരിക്കും.
വിവിധ നസ്രാണി കലാരൂപങ്ങളുടെ അവതരണവും യുവജനങ്ങള് നേതൃത്വം നല്കുന്ന റൂഹ ബാന്റിന്റെ സംഗീതവിരുന്നും നസ്രാണി ഭക്ഷ്യവിഭവങ്ങള്ക്കൊണ്ടൊരുക്കിയ സ്നേഹവിരുന്നുമുണ്ടായിരിക്കും. വൈദികരും സന്യസ്തരും എല്ലാ ഇടവകകളിലും നിന്നുള്ള അല്മായ പ്രതിനിധികളും സംബന്ധിക്കും. അതിരൂപതാതല സമുദായ ശക്തീകരണ കമ്മിറ്റിയും കുറുമ്പനാടം ഫൊറോനാ പള്ളിയിലെ കൈക്കാരന്മാരും വിവിധ ഭാരവാഹികളും പരിപാടികള്ക്ക് നേതൃത്വം നല്കും.
Tags : Community Empowerment nattuvishesham local news