പാലക്കാട്: സമുദായ ശക്തീകരണം കാലത്തിന്റെ അനിവാര്യതയാണെന്ന് ബിഷപ് മാർ പീറ്റർ കൊച്ചുപുരയ്ക്കൽ പറഞ്ഞു. രൂപത പാസ്റ്ററൽ കൗണ്സിലിന്റെ എണ്പതാം സമ്മേളനം പാസ്റ്ററൽ സെന്ററിൽ ഉദ്ഘാടനം ചെയ്ത് പ്രസംഗിക്കുകയായിരുന്നു ബിഷപ്. രൂപതയിലെ പതിനൊന്ന് ഫൊറോനകളിൽ നടന്ന സമ്മേളനങ്ങളിൽ ചർച്ച ചെയ്ത് അവതരിപ്പിച്ച പതിനൊന്ന് റിപ്പോർട്ടുകളുടെ ക്രോഡീകരിച്ച റിപ്പോർട്ട് പാസ്റ്ററൽ കൗണ്സിൽ സെക്രട്ടറി എബിൻ കണിവയലിൽ അവതരിപ്പിച്ചു.
സമുദായ ശക്തീകരണത്തിന് കുറുക്കുവഴി ഇല്ലെന്നും സമുദായത്തിന് ബോധവത്കരണവും സമുദായത്തിൽ നിന്നുള്ള സപ്പോർട്ടും ലഭിച്ചാൽ മാത്രമാണ് സമുദായ ശക്തീകരണം സാധ്യമാകൂ എന്ന് വിഷയാവതരണം നടത്തിയ അഡ്വ. ജസ്റ്റിൻ പള്ളിവാതുക്കൽ കൗണ്സിൽ അംഗങ്ങളെ ബോധ്യപ്പെടുത്തി. സാന്പത്തികവളർച്ചയല്ല സമുദായവളർച്ചയുടെ തുടക്കമെന്നും കൂട്ടായ്മയുടെ ഉൗർജമാണ് ശക്തീകരണത്തിന്റെ ആദ്യ അടയാളമെന്നും അഡ്വ. ജസ്റ്റിൻ ഓർമപ്പെടുത്തി. നിലവിൽ ലഭ്യമായ സാധ്യതകളും ആനുകൂല്യങ്ങളും അർഹതപ്പെട്ടവർക്ക് ലഭ്യമാകുന്നു എന്നത് ഉറപ്പുവരുത്താൻ സമുദായത്തിന് നേതൃത്വം നല്കുന്നവർ തയ്യാറാകണം എന്ന് പാസ്റ്ററൽ കൗണ്സിൽ യോഗം വിലയിരുത്തി.
രൂപത പാസ്റ്ററൽ കൗണ്സിൽ ജനറൽ സെക്രട്ടറി ഫാ.ഡോ. മാത്യു വാഴയിൽ സ്വാഗതം പറഞ്ഞ യോഗത്തിൽ വികാരി ജനറാൾ മോണ്. ജീജോ ചാലയ്ക്കൽ ചർച്ചകൾക്ക് നേതൃത്വം നല്കി. കെസിവൈഎം സ്കോളർഷിപ്പ് സെൽ സമ്മേളനത്തോടനുബന്ധിച്ച് ഉദ്ഘാടനം ചെയ്തു. പാസ്റ്ററൽ കൗണ്സിൽ ജോയിന്റ് സെക്രട്ടറി സ്വപ്ന ജെയിംസ് നന്ദി പറഞ്ഞു.
Tags : Community empowerment Nattuvishesham District News