എടക്കര: വഴിക്കടവ് ആനമറിയിൽ കാട്ടാനയുടെ ആക്രമണത്തിൽ വീടിന്റെ അടുക്കള തകർന്നവർക്ക് വനംവകുപ്പ് നഷ്ടപരിഹാരം ഉടൻ നൽകുമെന്ന് ആര്യാടൻ ഷൗക്കത്ത് എംഎൽഎ. കഴിഞ്ഞ ദിവസം കാട്ടാന ആക്രമണത്തിൽ പുഞ്ചക്കൊല്ലി കുമാരദാസൻ, മൊളയപറന്പിൽ സൈനബ എന്നിവരുടെ വീടുകളുടെ അടുക്കള ഷെഡുകൾ തകർന്നിരുന്നു. ഭക്ഷ്യവസ്തുക്കളടക്കം കാട്ടാന നശിപ്പിക്കുകയും ചെയ്തു. എംഎൽഎ സ്ഥലം സന്ദർശിച്ച ശേഷമാണ് ഇക്കാര്യം അറിയിച്ചത്.
നിലന്പൂർ നോർത്ത് ഡിഎഫ്ഒ ധനേഷ്കുമാറുമായി എംഎൽഎ ചർച്ച നടത്തുകയും ചെയ്തു. കാട്ടാന ശല്യം തടയാൻ വനം ദ്രുത കർമസേനയുടെ രാത്രികാല പട്രോളിംഗ് ഊർജിതമാക്കാനും നിർദേശം നൽകി. സോളാർ തൂക്കുവേലി നിർമാണത്തിന് കരാർ ഏറ്റെടുത്ത ഏജൻസിയുമായി ബന്ധപ്പെട്ട് നിർമാണം അടിയന്തരമായി ആരംഭിക്കാൻ ആര്യാടൻ ഷൗക്കത്ത് എംഎൽഎ നിർദേശം നൽകി.
നിലന്പൂർ ബ്ലോക്ക് പഞ്ചായത്ത് പ്രസിഡന്റ് ബോബി സി. മാന്പ്ര, വഴിക്കടവ് പഞ്ചായത്ത് പ്രസിഡന്റ് റംലത്ത് നെയ്തക്കോടൻ, പഞ്ചായത്തംഗം ഗോപിനാഥൻ, സി.യു. ഏലിയാസ്, സുനീർ മണൽപ്പാടം, പി.വി. മാത്യു, റെജി കണ്ടത്തിൽ, മുജീബ് എരഞ്ഞിയിൽ, മാനു കോന്നാടൻ, ഗോപി ആനമറി, പി.കെ. റജീബ് എന്നിവർ സംബന്ധിച്ചു.