കൊട്ടിയം: നെല്ല് കയറ്റി അയക്കുന്നത് ആഘോഷമാക്കി കർഷകർ. ജില്ലയിലെ പ്രധാന നെല്ലറകളിൽ ഒന്നായ ഉമയനല്ലൂർ ഏലായിൽ നിന്ന് കർഷകർ വിളയിച്ച നെല്ല് സപ്ലൈകോയ്ക്ക് കയറ്റി അയയ്ക്ക ുന്നത് പാടശേഖര സമിതിയുടെ നേതൃത്വത്തിൽ ആഘോഷമാക്കി.
പുലർച്ചെ മുതൽ കർഷകർ ചാക്കുകളിൽ നിറച്ച നെല്ലുമായി പടനിലം ക്ഷേത്ര മൈതാനത്ത് എത്തിയിരുന്നു. ആയിരകണക്കിന് ചാക്ക് നെല്ലാണ് ഇവിടെ നിന്ന് കയറ്റി വിട്ടത്. ഉമയനല്ലൂർ ഏലായിൽ കൃഷിയിറക്കിയ നൂറിലധികം കർഷകർക്ക് ഇക്കുറി നൂറുമേനി വിളവാണ് ലഭിച്ചത്. പാടശേഖര സമിതിയുടെ മേൽനോട്ടത്തിലായിരുന്നു കൃഷി നടത്തിയത്.
വെള്ളിയാഴ്ച പടനിലം ക്ഷേത്ര ഗ്രൗണ്ടിൽ നടന്ന നെല്ല് കയറ്റി അയയ്ക്കൽ മയ്യനാട് പഞ്ചായത്ത് പ്രസിഡന്റ് മുഹമ്മദ് റാഫി ഉദ്ഘാടനം ചെയ്തു. ഉമയനല്ലൂർ പാടശേഖര സമിതി പ്രസിഡന്റ് ആർ.എസ്. മനോജ് കുമാർ അധ്യക്ഷത വഹിച്ചു. പാടശേഖര സമിതി സെക്രട്ടറി രവീന്ദ്രൻ പിള്ള, എസ്. സജീവൻ, തുളസീധരൻ പിള്ള, രാജീവൻ, സപ്ലൈകോ ഉദ്യോഗസ്ഥർ എന്നിവർ പ്രസംഗിച്ചു.
Tags : nattu vishesham Farmers celebrate