ഗ്രാമവണ്ടിയുടെ പുനഃക്രമീകരിച്ച റൂട്ടിലെ സർവീസ് കടുത്തുരുത്തി ബ്ലോക്ക് പഞ്ചായത്ത് പ്രസിഡന്റ് തങ്കമ്മ വർഗീസ് ഉദ്ഘാടനം ചെയ്യുന്നു.
തലയോലപ്പറമ്പ്: കടുത്തുരുത്തി ബ്ലോക്ക് പഞ്ചായത്ത്, കോട്ടയം ജില്ലാ പഞ്ചായത്ത്, തലയോലപ്പറമ്പ് പഞ്ചായത്ത് എന്നിവയുടെ സംയുക്ത സംരംഭമായ ഗ്രാമവണ്ടി പുനഃക്രമീകരിച്ച റൂട്ടിൽ സർവീസ് ആരംഭിച്ചു. പ്രതിവർഷം സർവീസ് നടത്തിപ്പിനായി 12ലക്ഷം രൂപയാണ് കെഎസ് ആർടിസി ക്ക് നൽകുന്നത്.
കടുത്തുരുത്തി ബ്ലോക്ക് പഞ്ചായത്ത് ആറ് ലക്ഷം, ജില്ലാ പഞ്ചായത്ത് രണ്ട് ലക്ഷം, തലയോലപ്പറമ്പ്, കടുത്തുരുത്തി, ഞീഴൂർ, മുളക്കുളം പഞ്ചായത്തുകൾ ഓരോ ലക്ഷം രൂപ എന്നിങ്ങനെ സമാഹരിച്ചാണ് സർവീസ് നടത്തുന്നത്.
രാവിലെ 6.40നു വൈക്കത്ത് നിന്നും പുറപ്പെടുന്ന ഗ്രാമവണ്ടി വാഴമന, മുട്ടുങ്കൽ, കള്ളാട്ടിപ്പുറം, പഴംപെട്ടി, കോരിക്കൽ, തലയോലപ്പറമ്പ്, മേഴ്സി,കീഴൂർ, പുളിഞ്ചുവട്, ആപ്പാഞ്ചിറ, കുറവിലങ്ങാട് റൂട്ടിൽ രണ്ട് സർവീസും തലയോലപ്പറമ്പ് കീഴുർ, പ്ലാംചുവട്, ഞാറുകുന്ന് പള്ളി, കടുത്തുരുത്തി മാർക്കറ്റുവഴി കുറവിലങ്ങാടിലെത്തുന്ന രീതിയിൽ രണ്ടു സർവീസായും കൂടുതൽയാത്രക്കാർക്ക് പ്രയോജനപ്പെടുന്ന വിധത്തിലാണ് പുനഃക്രമീകരിച്ചത്.
റൂട്ട് പുനഃക്രമീകരണത്തിന്റെ ഉദ്ഘാടനം കടുത്തുരുത്തി ബ്ലോക്ക് പഞ്ചായത്ത് പ്രസിഡന്റ് തങ്കമ്മ വർഗീസ് നിർവഹിച്ചു. തലയോലപ്പറമ്പ് പഞ്ചായത്ത് പ്രസിഡന്റ് ജോസ് വേലിക്കകം അധ്യക്ഷത വഹിച്ചു. ജില്ലാ പഞ്ചായത്ത് അംഗം വിജയമ്മ ബാബു, കെ.പി. ഷാനോ, ബ്ലോക്ക് മെംബർ സീതു ശശിധരൻ,
പഞ്ചായത്ത് അംഗങ്ങളായ അനിതാ സുബാഷ്, അമ്പിളി മായാത്മജൻ, നിഷാ വി. നായർ, എം. അനിൽകുമാർ, വിനോദ് തേവലക്കാട്, നിഖിൽ പൊന്നപ്പൻ തുടങ്ങിയവർ സംബന്ധിച്ചു.
Tags : Local News Nattuvishesham Kottayam