കായംകുളം: പട്ടാപ്പകൽ വീടിന്റെ അടുക്കളവാതിൽ കുത്തിത്തുറന്ന് കവർച്ച. ആറ് പവനോളം സ്വർണാഭരണങ്ങളും പണവും അപഹരിച്ചു.
കായംകുളം എംഎസ്എം കോളജിന് സമീപം എസ്.കെ. മൻസിൽ സക്കറിയയുടെ വീട്ടിലാണ് കഴിഞ്ഞ ദിവസം കവർച്ച നടന്നത്. വീട്ടുകാർ പുറത്തുപോയ സമയത്തായിരുന്നു മോഷണം. സക്കറിയയും ഭാര്യയും ബന്ധുവീട്ടിലേക്കും മാവേലിക്കരയിൽ ജ്വല്ലറി നടത്തുന്ന മകൻ ഷെബിൻ കടയിലേക്കും പോയ സമയത്തായിരുന്നു മോഷണം നടന്നത്. വൈകുന്നേരത്തോടെ സക്കറിയ തിരിച്ചെത്തിയപ്പോഴാണ് മോഷണവിവരമറിയുന്നത്. അടുക്കളവാതിൽ കുത്തിത്തുറന്നാണ് മോഷ്ടാവ് അകത്തുകയറിയത്.
വീടിന്റെ മുകളിലത്തെ നിലയിലെ കിടപ്പുമുറിയിൽ സൂക്ഷിച്ചിരുന്ന ആഭരണങ്ങളാണ് നഷ്ടപ്പെട്ടത്. സംഭവസ്ഥലത്തെത്തിയ പോലീസ് സംഘം പരിശോധനകൾ നടത്തി.
Tags : House broken Nattuvishesham District news