ഗാന്ധിനഗർ: മെഡിക്കൽ കോളജിൽ അത്യാധുനിക സജ്ജീ കരണങ്ങളോടുകൂടിയ മൾട്ടി മോഡൽ റെറ്റിനൽ ഇമേജിംഗ് സിസ്റ്റം സ്ഥാപിക്കും. ജോൺ ബ്രിട്ടാസ് എംപിയുടെ ആസ്തി വികസന ഫണ്ടിൽ നിന്നാണ് തുക അനുവദിച്ചത്. മുൻ മന്ത്രി വി.എൻ. വാസവന്റെ ഇടപെടലിനെ തുടർന്നാണ് ഫണ്ട് അനുവദിച്ചത്.
റെറ്റിനയെ ബാധിക്കുന്ന രോഗങ്ങളുടെയും ഗ്ലോക്കോമയുടെയും രോഗനിർണയത്തിനും കൂടുതൽ കൃത്യതയോടെയുള്ള ചികിത്സാ പുരോഗതിക്കും ഈ മെഷീൻ ഏറെ സഹായകരമാണ്.
ഒരു കോടി രൂപയാണ് പദ്ധതിക്കായി അനുവദിച്ചത്. മെഡിക്കൽ കോളജ് മുൻ സൂപ്രണ്ട് ഡോ. ടി.കെ. ജയകുമാർ, ഒഫ്താൽമോളജി വകുപ്പ് മേധാവി ഡോ. എൻ. വിജയമ്മ, ഒഫ്താൽമോളജി വിഭാഗം ഡോ. മഞ്ജിത്ത് തുടങ്ങിയവരുടെ വിദഗ്ധാഭിപ്രായങ്ങളും നിർദേശങ്ങളും ത്വരിതഗതിയിലുള്ള ഇടപെടലിന് സഹായിച്ചിട്ടുണ്ട്. 1.2 കോടി രൂപ വിലമതിക്കുന്ന ഉപകരണം വാങ്ങുന്നതിനായി ബാക്കി 20 ലക്ഷം രൂപ ഹോസ്പിറ്റൽ ഡെവലപ്മെന്റ് സൊസൈറ്റിയുടെ ഫണ്ടിൽനിന്നാണ് കണ്ടെത്തിയിരിക്കുന്നത്. മെഷീന്റെ ഡെമോയ്ക്ക് ശേഷം ഉടൻ പ്രവർത്തനമാരംഭിക്കും.