തൊടുപുഴ: ജില്ലയുടെ വിവിധ ഭാഗങ്ങളില് അപകടക്കെണിയായി ഓടകള്. സ്ലാബില്ലാത്ത ഓടകളിലും ഗര്ത്തങ്ങളിലും പതിച്ച് നിരവധി ജീവനുകള് പൊലിയുമ്പോഴും അധികൃതര് ഇതൊന്നും കണ്ടില്ലെന്ന മട്ടാണ്. ഏറ്റവും ഒടുവില് തൊടുപുഴ മുതലക്കോടം മാവിന്ചുവടിനു സമീപം റോഡരികിലെ കുഴിയില് വീണാണ് ബൈക്ക് യാത്രികന്റെ ജീവന് നഷ്ടമായത്.
വകുപ്പുകള് തമ്മിലുള്ള ശീതസമരവും യഥാസമയം അറ്റകുറ്റപ്പണി നടത്തി അപകടം ഒഴിവാക്കാന് നടപടി സ്വീകരിക്കാത്തതുമാണ് ദുരന്തങ്ങള്ക്ക് കാരണമാകുന്നത്. ദുരന്തങ്ങള് ഉണ്ടാകുമ്പോള് അധികൃതര് ഉണരും. ഏതാനും നാള് കഴിയുമ്പോള് വീണ്ടും പഴയപടിയാകും. പിന്നീട് എല്ലാം ചട്ടപ്പടി. ഈ അഴകൊഴമ്പന് സമീപനത്തിന് മാറ്റം വന്നേ മതിയാകൂ. ഓരോ മനുഷ്യജീവനും വിലപ്പെട്ടതാണ്. അധികൃതരുടെ അനാസ്ഥമൂലം ഇനിയൊരു ജീവനും പൊലിയാന് ഇടവരരുത്. ദുരന്തം സംഭവിച്ച ശേഷം മുതലക്കണ്ണീര് പൊഴിച്ചിട്ട് എന്തുകാര്യം?