വെള്ളരിക്കുണ്ട്: തലശേരി അതിരൂപതാതലത്തിൽ നടക്കുന്ന അഭിഷേകാഗ്നി ബൈബിൾ കൺവൻഷനിൽ പങ്കെടുക്കാൻ വെള്ളരിക്കുണ്ട് ലിറ്റിൽ ഫ്ലവർ ഫൊറോന പള്ളി അങ്കണത്തിലെ ബഥേൽ നഗറിലേക്ക് വിശ്വാസികളുടെ പ്രവാഹം.
ഫെബ്രുവരി മൂന്നു വരെ എല്ലാ ദിവസവും വൈകുന്നേരം 4.30 ന് ആരംഭിച്ച് രാത്രി 9.15 ന് അവസാനിക്കുന്ന വിധത്തിലാണ് കൺവൻഷൻ ക്രമീകരിച്ചിരിക്കുന്നത്. അട്ടപ്പാടി സെഹിയോൻ ധ്യാനകേന്ദ്രം ഡയറക്ടർ ഫാ. സേവ്യർ ഖാൻ വട്ടായിലും 40 അംഗ ടീമുമാണ് കൺവൻഷൻ നയിക്കുന്നത്.
ആദ്യദിനങ്ങളിൽ തന്നെ കാസർഗോഡ്, കണ്ണൂർ ജില്ലകളുടെ വിവിധ ഭാഗങ്ങളിൽ നിന്നായി ആയിരക്കണക്കിന് വിശ്വാസികളാണ് കൺവൻഷനിൽ പങ്കെടുക്കുന്നതിനായി വെള്ളരിക്കുണ്ടിലെത്തിയത്. കൺവൻഷൻ കഴിഞ്ഞ് രാത്രി തിരിച്ചുപോകുന്നവർക്കായി വിവിധ സ്ഥലങ്ങളിലേക്ക് പ്രത്യേക ബസ് സർവീസുകൾ ഏർപ്പെടുത്തിയിട്ടുണ്ട്. അവിസ്മരണീയമായ ഈ ദൈവാനുഭവത്തിൽ പരമാവധി ആളുകൾക്ക് പങ്കുചേരുന്നതിനുള്ള വിപുലമായ സൗകര്യങ്ങൾ ഒരുക്കിയിട്ടുണ്ടെന്ന് ഫൊറോന വികാരി റവ.ഡോ. ജോൺസൺ അന്ത്യാംകുളം പറഞ്ഞു.
Tags : nattu vishesham Bible Convention