തൃക്കലങ്ങോട് പഞ്ചായത്തില് കുടുംബശ്രീ സംഘടിപ്പിച്ച ചക്ക ഫെസ്റ്റ്.
മഞ്ചേരി: ചക്കയില്നിന്നുള്ള മൂല്യവര്ധിത ഉത്പന്നനിര്മാണ സാധ്യതകള് അയല്ക്കൂട്ടങ്ങളെ പരിചയപ്പെടുത്തുന്നതിനും പുതിയ സംരംഭങ്ങള് ആരംഭിക്കുന്നതിന് പ്രോത്സാഹനം നല്കുന്നതിനുമായി തൃക്കലങ്ങോട് കുടുംബശ്രീയുടെ നേതൃത്വത്തില് ചക്ക ഫെസ്റ്റ് നടത്തി. സംയോജിത കാര്ഷിക ക്ലസ്റ്റര് പദ്ധതിയുടെ ഭാഗമായി പ്രവര്ത്തിക്കുന്ന ഉപജീവന സേവന കേന്ദ്രത്തിന്റെ നേതൃത്വത്തില് നടന്ന പരിപാടി ഗ്രാമപഞ്ചായത്ത് പ്രസിഡന്റ് എന്.പി. മുഹമ്മദ് ഉദ്ഘാടനം ചെയ്തു. സിഡിഎസ് ചെയര്പേഴ്സണ് ഹസ്നി അധ്യക്ഷത വഹിച്ചു.
ബ്ലോക്ക് പഞ്ചായത്ത് അംഗങ്ങളായ ഷിഫ അബ്ദുല് ജലീല്, മഞ്ജുഷ ആമയൂര്, പഞ്ചായത്ത് അംഗങ്ങളായ സുധീഷ് കരിക്കാട്, സജാദ് നെല്ലിപറമ്പന്, മുനീര് മച്ചിങ്ങല്, മജീദ് പാലക്കല് എന്നിവര് പ്രസംഗിച്ചു. ഫെസ്റ്റിന്റെ ഭാഗമായി ഒരുക്കിയ വിപണനമേള ശ്രദ്ധേയമായി. ചക്ക കോഫി മുതല് ചക്ക ബിരിയാണി വരെയുള്ള 50ലധികം വ്യത്യസ്ത വിഭവങ്ങളാണ് മേളയില് വില്പ്പനക്കായി തയ്യാറാക്കിയിരുന്നത്.
പദ്ധതിയുടെ ഭാഗമായി 101 തരം ചക്ക വിഭവങ്ങള് ഉണ്ടാക്കുന്നതില് പരിശീലനം നല്കുന്നതിനായുള്ള രജിസ്ട്രേഷനും അവസരമുണ്ടായിരുന്നു. കാരക്കുന്ന് 34-ലെ കുടുംബശ്രീയുടെ ഉപജീവന സേവനകേന്ദ്രം വഴിയാണ് പരിശീലനവും ചക്കയുമായി ബന്ധപ്പെട്ട മറ്റ് സേവനങ്ങളും ലഭ്യമാക്കുന്നത്. മേളയിലെ പ്രധാന ആകര്ഷണങ്ങളിലൊന്ന് പാഴ്വസ്തുക്കള് ഉപയോഗിച്ച് നിര്മിച്ച ഒരു കൂറ്റന് ചക്കയായിരുന്നു. തൃക്കലങ്ങോട് ഗ്രാമപഞ്ചായത്ത് അസി. സെക്രട്ടറി ശ്രീകുമാറാണ് ഇതൊരുക്കിയത്.
Tags : Local News Nattuvishesham Malappuram