കൽപ്പറ്റ സെന്റ് ജോസഫ്സ് കോണ്വന്റ് സ്കൂൾ ഓഡിറ്റോറിയത്തിൽ സ്പർശ് പദ്ധതി നാലാം വാർഷികാഘോഷവും സ്നേഹസംഗമവും ടി. സിദ്ദിഖ് എംഎൽഎ ഉദ്ഘാടനം ചെയ്യുന്നു.
കൽപ്പറ്റ: വേദനിക്കുന്നവരെ കരുതലോടെ ചേർത്തുനിർത്താൻ സമൂഹത്തിന് കഴിയണമെന്ന് ടി. സിദ്ദിഖ് എംഎൽഎ. ഓട്ടിസം ബാധിതർക്ക് കൽപ്പറ്റ ചാരിറ്റബിൾ സൊസൈറ്റി സ്പർശ് എന്ന പേരിൽ നടപ്പാക്കിയ പെൻഷൻ പദ്ധതിയുടെ നാലാം വാർഷികാഘോഷവും സ്നേഹസംഗമവും സെന്റ് ജോസഫ്സ് കോണ്വന്റ് സ്കൂൾ ഓഡിറ്റോറിയത്തിൽ ഉദ്ഘാടനം ചെയ്യുകയായിരുന്നു അദ്ദേഹം.
സ്വാഗതസംഘം ചെയർമാൻ അഡ്വ.പി. ചാത്തുകുട്ടി അധ്യക്ഷത വഹിച്ചു. സൊസൈറ്റി സെക്രട്ടറി കെ.പി. ബഷീർ റിപ്പോർട്ട് അവതരിപ്പിച്ചു. മുനിസിപ്പൽ ചെയർമാൻ പി. വിനോദ്കുമാർ മുഖ്യപ്രഭാഷണം നടത്തി.
ഹിപ്നോട്ടിക് മൈൻഡ് കൗണ്സലർ ഷെഫീക്ക് എളേറ്റിൽ, കെ. സദാനന്ദൻ, റസാഖ് കൽപ്പറ്റ, പി.പി. അബ്ദുൾ ഖാദർ, പി.പി. ആലി, സലീം കാളങ്ങാടൻ, ജുനൈദ് കൈപ്പാണി, ഹാരിസ് പീസ് വില്ലേജ് എന്നിവർ പ്രസംഗിച്ചു. സൊസൈറ്റി പ്രസിഡൻറ് സൂപ്പി കല്ലങ്കോടൻ സ്വാഗതവും സ്പർശ് കണ്വീനർ ജുനീഷ് മജീദ് നന്ദിയും പറഞ്ഞു. ഓട്ടിസം ബാധിതർക്ക് മാസം 1,000 രൂപ പെൻഷൻ നൽകുന്ന പദ്ധതിയാണ് സ്പർശ്. നിലവിൽ 86 പേർക്കാണ് മണി ഓർഡർ മുഖേന പെൻഷൻ ലഭ്യമാക്കുന്നത്.